今日我開始左對公司啲同事進行復仇大計: 第六十九節

由於我最近一直專注喺湊莊神呢條麻煩友，所以我就將對付Valarie嘅重任交左喺Taylor身上。今日喺臨行到入公司門口果陣，Valarie突然出現截停左好緊張咁質問我：「你地捉左我婆婆去邊呀？」由於Taylor呢一排根本完全無通知過我佢有咩行動，所以我其實都真係唔知佢又搞啲咩黎。我答Valarie：「咩阿婆呀，我眼前咪有一個阿婆囉，你照鏡就搵到架啦。」Valarie聞言大怒，企圖想衝前將我推埋牆，我一個閃身就避開左佢，由於收掣不及Valarie成個人撞左埋牆。我見到呢個滑稽情況忍唔住哈哈大笑，盛怒嘅Valarie轉身咆哮：「你唔好咁得戚呀，我而家一心要上位，唔得閒對付你地住，你唔好以為我真係無晒符呀，到我正式坐正左之後你地一定死硬，你唔好以為辭職就無事，我要你求生不得求死不能呀。」我冷笑左一聲，哄埋佢塊面，直視住佢雙眼講：「我同你條臭八婆講呀，我唔只要你職又升唔到，我同Taylor喺你事業失業果陣會再落力踩多你兩腳，你不如小心你婚又結唔成，人財兩空好過啦八婆。」喺我同Valarie對峙住之際，原來果個唔知叫Katy同Kathy竟然咁啱路過目睹呢一幕，不過由於佢太無存在感，我地喺互鬧完之後先發現到佢存在。我見佢喺被我地發現左之後好心急咁將部電話收返埋，我懷疑佢已經將頭先嘅一幕錄低。Valarie想叫停佢，點知果件不知名物體無視我地嘅阻止急急腳行左入公司。我其實就真係唔多介意佢將頭先一幕流出，不過Valarie就應該好驚。佢無再理我急急腳咁跟住不知名物體行返入公司，而我就即刻打畀Taylor向佢了解一下情況，我足足打左六七次先搵到Taylor，佢拎起電話果陣把聲好似好迷幻，我問佢佢捉左阿婆去邊，點知佢好似未訓醒咁答我：「唔洗擔心呀，我已經送左美美去個人間仙境啦，你唔洗擔心呀？Valarie條臭八婆想搵返佢阿婆？可能佢要等佢阿婆報夢先得喎哈哈。」佢一講完就收左我線，我聽完心裡暗驚，嘩佢唔係玩到殺人呀下？我想再打返畀佢問清楚，點知條友竟然連電話都熄埋。

 

我行到返入公司之後，見到Valarie不斷哄埋不知名物體到好似想討好佢咁，但阿不知名物體就完全無理過Valarie喺度埋頭做嘢。我見狀即刻走埋去，Valarie見到行埋黎好似想發作開我波，不過礙於喺公司所以佢唯有強忍怒氣。我無理Valarie，反而喺度挑釁不知名物體話：「嘩，而家啲香港人真係乜春都要拍下片咁，係咪你無乜朋友無乜同人影相，所以部電話仲有好多位畀你影埋啲無謂嘢呀。」不知名物體擰轉頭奸笑道：「咩拍片呀？乜你地兩個好想知我頭先係咪拍過片黎咩？做咩咁緊張呀？如果你地畀啲甜頭我啦喎，我咪話過畀你地知囉‧」Valarie好緊張想開口答佢，點知畀我搶先答左：「咁你又錯啦，我一啲都唔care喎。我係見你無人理咁可憐先黎同你講幾句嘢咋，仲夠膽開口話要我畀甜頭你？你係咪食錯藥呀同事，你鍾意upload埋條片上youtube我都覺得ok呀，不過記住要tag返左同Valarie呀，到時我做左網上紅人先再畀甜頭你啦。」我望左臉驚訝嘅不知名物體同嬲到面都紅晒嘅Valarie一眼之後就走返埋位。呢個時候Judy走左埋黎，佢好細聲咁問我：「你老實答我，你有無將過我啲嘢報上總公司黎出賣我？」我好誠懇同認真咁答佢：「我可以發誓我無出賣過你。」Judy聽完我呢個答案都唔係好信我，佢打量左我一陣之後一臉懷疑地轉身走左。呢個時候Daisy襯無人為意偷偷地行左埋黎話：「你陣間打開自己個櫃會見到啲曲奇，係我尋晚整畀你個傻仔食架，你要食晒，同就算唔好食都要讚我整得好食。」「我食完之後會打返個食評喺openrice架啦，上次我食完我阿妹整果啲大閘蟹之後都有上openrice寫返個食評，個食評出左無耐之後就有好多網友話想釣我阿妹隻蟹呀。」Daisy聽完先係扮扁咀，但之後佢都忍唔住笑左出黎。我之後補多句：「咁當然啦，我個人就唔想其他網友試圖去釣你隻蟹啦，我媽媽話結婚果晚先可以用我支釣魚竿黎釣蟹架，我見其他人可以三五知己相約釣蝦釣魚，但原來釣蟹係咁麻煩架喎，哈哈。」Daisy用口型鬧左我一下就走左去，估唔到可以大條道理喺公司性騷擾女同事係咁有趣。

 

Lunch時間正當我想喺公司訓一訓果陣，一身白色意大利手造西裝嘅莊神同如常一身黑色嘅Robin突然出現喺我面前。由於公司嘅其他人都出晒去食飯，我忍唔住大叫話：「冤有頭債有主呀，你地唔好黎勾我魂啦，我係好人黎架。」莊神鬧左我一句：「你又發咩嘢癲呀？」我嘻嘻一笑道：「無呀，兩位一黑一白咁，我以為你地係引我上路咋。」Robin忍唔住問：「上咩路呀？」我哈哈大笑道：「兩位一黑一白咁，我以為你地係黎引我上陰陽路帶我飲孟婆湯咋。」莊神又黎一掌打落我度，我坐左喺個位無得閃避無奈要硬食，不過好彩唔係食過夜粥嘅Robin出手姐。莊神怒叱道：「你隻小畜牲成日咒我死，我同你講我有咩事都拉埋你落去呀。係呢你做咩唔出去食晏，你知唔知唔食午餐會死人架？我有個老友就係因為後生果陣成日唔食午餐，佢一退休果日就死左啦，你係咪好想好似佢咁呀？」「我太婆都堅持一日三餐架，不過佢最後都係死左，所以師父你就算有食午餐都可能會早死架，不過生死有命……」莊神又一掌打埋黎，不過今次因為早有準備我黎得切用手擋，但係喺隔離嘅Robin好有默契地喺我擋左莊神果招唔夠五秒，佢就一拳打左埋黎，今次我真係痛到嗌左出聲。莊神唔理痛到縮埋左嘅我，示意叫Robin拎左扎花放喺Judy張枱，睇黎佢今晚又打算好好咁玩弄一下Judy呢件新玩具。








「John，我地發展得咁快，你對我係咪認真架？」身處於某間位處九龍區嘅五星級酒店套房嘅Judy，含羞答答咁問。我心諗一句，你同人識左兩日就跟人上酒店，肯孤男寡女同人地獨處一室……不過其實都唔係孤男寡女，因為房中仲有我同Robin好辛苦咁匿埋左喺暗處，不過Judy唔知架嘛，所以唔計，佢點都係識左人兩日就跟人去爆房，仲扮咩含羞答答問人認唔認真呀。而莊神喺聽到佢嘅問題後笑而不語，佢只係靜靜地望住窗外嘅無敵海景。Judy見背對住佢嘅莊神並無反應，細聲暗駡左幾句。我望一望身邊一臉認真咁筆錄住Judy講左啲咩嘅Robin，忍唔住問佢：「酒店房入面啲多角度cam係你裝架？」Robin一臉不屑咁答：「係又點唔係又點，關你咩事？」「無呀，你連cam都識裝，同你拍拖應該都幾危險。你知啦你份人又暴力，兩句唔埋就鍾意郁手郁腳，一陣你男朋友出去偷食，客不易畀你裝定cam發現到之後，釀成血案架。」點知Robin聽到之後只係冷冷地一笑話：「我唔介意叻嘅男人去逢場作戲，不過好似你呢啲咁嘅垃圾人渣就無資格啦。」一聽就知佢真係畀莊神洗晒腦，我同佢真係完全溝通唔到，為免再自討沒趣我都係將注意力放返喺莊神Judy兩人身上。呢個時候，我見到背對住Judy嘅莊神叫Judy拆開枱上嘅一盒長形物體，Judy即時喜上眉稍，甜甜地同莊神講左句多謝之後，就滿心歡喜咁拆禮物。點知一打開盒嘢之後佢即刻面色一變，因為佢點估唔到眼前呢個富豪，喺同佢第一次爆房嘅時候，竟然會送左一支洗陰水畀佢。佢強忍住怒氣去等莊神解釋，點知莊神仲竟然扮到好興奮咁問Judy鍾唔鍾意份禮物，Judy無奈之下唯有硬擠起笑容點頭。莊神上前拖住Judy雙手，好誠懇咁話：「Judy呀，去到你呢個年紀真係要注意妹妹清潔架啦，如果唔係好易有病痛同異味架，我知你而家好開心好感動。你估唔到我竟然會咁細心同體貼，我唔只關心你，仲關心埋你個妹。我明架啦Judy，我過兩日會叫人送多兩箱畀你，等你可以成日都幫個妹洗白白啦。」 仆你個街，如果唔係見到支洗陰水，真係會以為Judy有個妹妹要人照顧。

 

Judy強忍住怒氣迎合莊神，而莊神則扮到開始對今次幽會好興奮咁。佢同Judy講：「Relax，Judy我聽聞你係一個好有品味嘅人，平時都鍾意睇下啲藝術電影同實驗電影咁，仲對藝術好有心得。我早排出資畀幾個讀緊電影，好有熱誠嘅後生仔去拍左套實驗電影，佢地今日剪接完送左畀我睇呀。唔知Judy你賞唔賞面同我一齊睇呢？」Judy係成日吹嚧自己不同一般港女，佢講過咩台劇韓劇都唔係佢心頭好，佢興趣係鍾意睇下法國電影咁。喺我地仲未交惡嘅時候佢曾經同我講過佢最鍾意嘅導演係新浪潮大師尚盧高達，我當時答佢我都好鍾意高達架，我屋企仲有幾十盒高達模型，此答案一出換黎嘅當然係佢不屑嘅神情啦。不過Judy喺呢一刻見到莊神提出啲佢擅於嘅嘢，佢當然樂意奉陪啦。電影一開始，係見到一個阿伯喺連鎖快餐店睇報紙，我當時心諗呢套應該係啲咩人文電影，紀錄住低下層嘅生活咁，點知越睇越唔對路，因為過左十幾分鐘之後，都仲依然係影左個阿伯喺度睇報紙。不同嘅只係見到阿伯喺睇完體育版之後就轉左去睇睇肉版，即係風月版。Judy雖然睇到一臉不解咁，但為左扮識嘢佢都仲係好專心咁睇住個螢幕，到再過左十幾分鐘之後，阿伯終於睇完報紙啦。正當我以為終於會影阿伯做下其他嘢之際，點知阿伯竟然又拎起左第二份報紙黎睇，仆你個街，個阿伯有無咁鍾意睇報紙呀。呢個時候莊神同Judy講話：「你覺得套電影點呀？」Judy無奈答莊神話：「啲鏡頭幾表達到老年人想同社會接軌嘅果種渴望呀……」我心入面暗佩服Judy講得出呢個答案，莊神亦都好滿意地點頭話：「咁就好啦，套戲我投資左幾球嘢架，我打算拎各地電影節參展架。」Judy忍唔住講左句：「唔係掛呢套嘢要幾百萬？」莊神即時黑住面咁反問：「你意思係覺得我洗左冤枉錢？」Judy即時答：「唔係嘅，藝術好難用錢去衡量，我覺得John你好有心呀。」

 





大慨莊神都在努力忍笑，佢突然起左身行去拎左一袋衫出黎，佢問Judy：「我嘅要求可能有啲唐突，而且呢個要求可能都係太快提出。但Judy，請問我細佬今晚可唔可以黎探下你妹妹呀？」仆你個街，如果唔係睇埋莊神飢渴嘅眼神，就咁聽呢句說話，真係會以為莊神想介紹個細佬畀Judy個細妹識。Judy交足戲扮晒羞澀咁話：「人地都跟得你上黎啦，你話事啦。」莊神答：「你畀我話事啦好啦，Judy呀，我覺得你好襯呢套制服呀，你換黎畀我睇好唔好？」Judy大發嬌慎咁話：「咦我唔制呀，你第一次就同人玩制服，咸濕呀你。」口裡雖說不，但語畢佢都係拎起套衫入廁所換。過左一陣之後， Judy著住一身制服出黎，不過佢身上套制服唔係護士呀空姐果啲，而係一套清潔阿姐嘅制服，仲連埋水靴同圍裙。佢一臉無奈咁問莊神：「John呀，你係咪拎錯左呀，呢套制服好似有啲奇怪。」何止奇怪，直頭係痴撚線啦。莊神竟然又忍到笑，佢扮晒急色咁話：「我一向都覺得清潔阿姐好sexy好吸引，估唔到襯喺你身上都咁有味道呀，Judy我地黎啦。」Judy無奈點頭之後自己爬上床，正當我以為佢地準備大戰之時，莊神電話突然響起，莊神睇完個訊息之後扮晒緊張咁拎起Judy個名牌手袋放喺佢手上，之後一邊推住Judy出去一邊話：「對唔住呀，我老婆突然殺到，而家佢喺樓下啦，你快啲走先啦，畀佢見到你的話我怕佢會對付你呀。」就係咁，仲係著住清潔阿姐裝嘅Judy拎左個名牌手袋畀莊神推左出酒店房門外，佢連換衫嘅時間都無。一臉迷茫嘅佢，而家應該好希望套清潔阿姐裝係有連埋口罩等佢可以遮住塊臉，相信而家佢撞到人都唔知應該點同人解釋佢點解會著成咁出現喺酒店。