Valarie好清楚Evans係佢最大嘅對手,喺我忙於應酬莊神嘅時候,佢並無放慢手腳,佢幾乎日日都公開留難一下Evans。就以今朝為例,Valarie一返到公司就行埋Evans身邊話:「Evans呀,你小心啲呀,呢排警察好似好努力咁翻舊帳拉你地呢啲社運仔呀。我唔係話睇唔起你地,覺得你地正事又唔曉做,剩係識反乜反物呀,我係擔心你呀。哎呀唔記得其他人唔知你以前成日去示威呀遊行呀咁,我都係聽返黎架咋。你唔介意我話畀人知架呵?死啦好似係我唱緊你咁。」在場人士除左Miki同我之外,基本上所有人都係唔知Evans嘅過去,就連Daisy所知都係什少,所以大家都好驚訝咁望住呢個表面上無乜威脅性嘅有錢仔。Evans向我投以求助嘅目光好似想我幫佢解圍咁,但我都係一聲不響,因為佢而家都搞唔掂呢啲小事的話,第日畀其他更高層嘅人質問佢又可以點算呢?唔通又要我幫佢解圍?但係一向深愛住Evans嘅Miki唔同我,佢心痛一臉無助嘅Evans,忍唔住出聲話:「Val姐,同事嘅私生活係佢自己嘅問題姐,我地應該無乜資格過問掛?」Valarie即刻奸笑住道:「咁又唔係呀,Evans話晒都同我地喺同一個地方共事,一陣佢唔知惹埋啲咩人返黎自焚呀絕食呀,我地都好麻煩架喎。係啦Miki,你做咩咁緊張呢?我問Evans咋嘛,佢都未出聲你就爭住答?睇黎你好似睇中左個荀盤咁喎。」唔知點解,我見到Valarie連Miki都串埋果陣,我真係血氣上湧,我忍唔住出聲話:「喂auntie Valarie,我聽我二叔公個三姑姐話呢,你個千年人瑞阿婆都一樣好關心政治架喎,雖然年過百歲,次次有咩撐政府活動佢都扑到去,仲要下下都企最前驚死人忍唔到佢咁架喎。咁我照返你頭先嘅論調,你直屬家人係漢奸走狗賣國賊,呀唔係,我意思係走狗愛國賊…….呀又講錯,更正返先,係愛國人士,你一陣都可能會招惹到唔知咩人返黎食蛇宴呀搞抽獎咁,我地呢度明明係office黎架嘛,一陣變到議員辦事處咁就無謂啦下話。話時話,唔知其他同事又知唔知你阿婆原來係咁出位架呢?你唔介意我話畀人知架呵?死啦好似係我唱緊你咁。不過又唔係喎,我而家真係唱緊你喎,吹咩?」

 

Valarie聽到我仲提起佢阿婆,佢當然即刻急怒攻心,正當佢想發作嘅時候,Evans終於出聲為自己辯解話:「各位同事,我向大家保證,我個人喺政治方面嘅取向,不單止唔會影響到公司嘅營運。我仲可以承諾大家,我如果有幸做到大家上司果陣,我絕對會貫徹返我自己對勞資問題嘅信念,盡可能幫大家爭取返最大嘅利益。Valarie,你係我老前輩,我知道我仲有好多嘢可以喺你身上學習,例如做人處世呢啲嘢,我知我自己仲有好多不足呀,不過希望將來就算大家喺職位上有咩變動都好,你都肯輔助下我啦。」我心入面暗地對Evans嘅呢番說話讚好,估唔到佢除左識得串Valarie係老嘢之外,佢仲暗示自己會壓住Valarie,我當然係指職位上,而唔係體位上啦。不過Evans呢條友仔總算學到下嘢,唔再成碌木咁要人踢先識郁。呢個時候,阿油突然喺隔離拉一拉我衫袖,好似有嘢想同我講咁,我亦都好識做咁畀Evans繼續攞彩,同阿油行出去公司出面傾。去到後樓梯果陣,佢好緊張咁同我講話:「James哥,早幾日Valarie佢突然之間走黎問我有無方法可以拎到人地電話入面條短片,我驚佢係想對付你呀,所以即刻向你匯報。」睇黎阿油應該仲以為緊我係毒男販子,佢一有機會就想討好我,好似怕我真係會捉左佢去賣咁,其實一聽佢咁講,都知Valarie係想拎度阿畸聲稱拍左嘅短片,不過由於太有趣,我忍唔住想捉弄下阿油,我扮沉思左一陣之後同佢講話:「阿油,你記唔記得我上次話走失左啲貨嘅,你唔洗知道詳情,亦都唔好問我啲貨係咩黎。總之件貨喺走失左果陣,我咪要去捉佢返黎囉,咁Valarie幾個路人又唔知點解喺果陣行過,其中一個過路人又影低左我係捉件毒男……呀唔係,我意思係件貨嘅過程,阿畸當時好似影低左,唔知佢係咪想用條片黎舉報我……我意思係舉報我喺出面秘撈咁。不過阿油,件事你都係當無聽過算啦好唔好?你知道左對你無好處架,其實我覺得你份人都幾好幾有義氣,我唔想無左你呢個朋友呀。」

 

「我…….我咩都唔知呀James哥,你當我無搵過你啦好唔好?Valarie佢剩係問左我用咩方法可以喺人地手機到拎到段片咋,佢無同我講係關於你擄人勒贖…..呀唔係我意思係你做秘撈架。」我即時黑住面咁大聲喝阿油話:「咩擄人呀,我邊有同你講件貨係毒男呀下?你唔好亂講嘢呀,雖然我份秘撈都係正當生意,但我個老細就唔係太好脾氣架咋,畀佢知道你話佢做犯法嘢,佢嬲起上黎捉左你條死毒男賣去啲第三世界做鴨,再賣你去中東畀啲有錢佬玩呀。我地真係正當商人黎架,我警告你真係唔好再亂講呀。」阿油即時驚到口都震埋話:「大佬……我……我知錯啦,不如我做啲嘢將功補過呀,你要我將計就計陰返Valarie都無問題架,最緊要你唔好殺我就得架啦。」「傻啦,我點會殺你姐,我都係個普通人黎咋嘛,不過你個提議都幾好,等我考慮下啦。」睇黎又有嘢玩。








「阿油,其實你真係唔好誤會呀,我真係無做過啲咩犯法嘢架。」阿油喺我堅持之下,無奈要同我一齊食晏,我睇得出佢應該真係好驚,好似真係怕我一個心情唔好就會賣佢去中東咁。為左增加說服力,我故意同佢去一間比較偏僻而且少人去嘅茶餐廳度食,而果間茶餐廳其實由我中學已經開始幫襯,所以我知道當中由老細到企堂都曾經係江湖人士,不過自從佢地開始撈正行之後,都已經變晒做好人。但可能礙於習慣問題,佢地由外型,打扮到談吐都係畀人覺得有種揮之不去嘅江湖味。阿油本身已經好擔心我係想殺佢滅口,到我帶佢黎到間餐廳,同呢班咁有江湖味嘅人士打招呼果陣,佢就更加驚。「喂阿油你即管叫嘢食啦,呢度啲嘢食唔錯,不過係間唔中有人會喺隔離枱講數……」阿油聽到之後即刻好驚咁望一望隔離枱,隔離枱係一班神情古怪嘅阿叔,不過以我多年幫襯呢間茶記嘅經驗話畀我知,佢地只係一班失業又唔可以返屋企畀人知,所以唯有叫杯奶茶喺度過下日晨咁。我煞有介事咁樣拍一拍阿油,之後示意叫佢地唔好再望,我細細聲咁話:「喂你唔好望住人地得唔得呀,我話佢地講數,即係佢地可能係做會計精算果啲,咪要講數囉……總之你黎到呢度唔好成日周圍望人啦,好易惹麻煩架。」阿油即刻垂低頭,細細聲咁反問我:「不如我地飲杯嘢就走呀,我唔慣喺呢啲地方留太耐呀。」「咁又唔得,呢度啲嘢真係好好食架。同呢度個老細,即係你頭先見我一入黎就打招呼果個金毛阿伯蛇尾哥,如果見到我坐低唔食嘢會好唔高興架,你都睇得出佢唔係易話為架啦。」呢個時候一個企堂行左埋黎,雖然我都唔係好知佢係咩哥,不過幫襯左呢度咁多年,我同佢都認得到大家,佢一行埋黎就好熱情咁話:「哥仔你咁多年都係食常餐架啦,你個四眼仔朋友想食咩呀。」阿油好驚咁話:「我……我唔係好肚餓呀……」果位企堂大哥即刻笑住口答道:「唔肚餓咪食個午餐B囉,今日個洋蔥豬扒飯唔係好大份架咋,就咁話啦。」佢唔理阿油反應就幫佢落埋單。

 

企堂哥哥行開左之後阿油好細聲同我講話:「其實我唔食得洋蔥架,一食我就會反胃。」「咁你頭先又唔自己開聲講?」「你講到佢地咁惡,我怕佢地會鬧我呀嘛。」「唔好講咁多廢話先啦,阿油,你近排同Miki點呀,有無再進到一步呀?」一提起Miki,阿油神情就變得好委屈,佢話:「我早兩日放工又走去跟住佢,我真係唔係話想管佢呀,不過Miki咁靚女,我怕佢一個人行夜街會發生危險先想暗中保護佢咋。不過好衰唔衰,我由於太投入去欣賞佢嘅美貌,我跟跟下畀佢發現左,佢知道我又跟住佢就好嬲,佢話以後唔會再同我講嘢。」其實Miki行夜街真係會有危險架,不過呢個危險咪就係阿油囉,我真係好擔心佢唔知會唔會畀Miki拒絕多幾次之後就獸性大發。「你今日都見到架啦,Miki同Valarie嘅不和已經放左上枱面架啦,我唔想再多講架啦。要得到Miki歡心,你自己諗下可以點幫到佢對付Valarie啦。你個老表阿虎仲係量緊地R緊你爛腳架嘛,你自己睇下點樣可以利用埋佢令你得到Miki嘅芳心啦。」講到呢度,阿油碟洋蔥豬扒飯終於到左,不過佢由於喺呢度覺得有啲壓力,再加上佢係唔食得洋蔥,所以佢都只係對住碟飯督下撩下咁,無乜食過。頭先果個企堂哥見狀即刻走上黎問阿油:「哥仔,係咪個飯有咩問題呀,如果係我幫你同廚房講聲都得喎。」阿油即刻耍手擰頭咁話:「唔係呀,我見我朋友啲嘢食未到,打算等埋佢先食咋嘛。」我不懷好意地笑左一笑,之後話:「傻啦,大家都係男人老狗,洗咩等黎等去姐。你快啲開始食啦阿油,個飯涷左就唔好食架啦。」呢個時候,連我個餐都及時上埋,我同企堂哥哥都同時間話:「時間啱啱好啦。」阿油無得再推搪,佢用求助嘅目光望住我,不過我即時埋頭食自己個沙嗲牛肉麵無理佢,企堂哥哥再次催促阿油話:「哥仔,我地碟洋蔥豬扒飯真係出撚晒名架,呀對唔住講撚左粗口,不過你真係要快啲食呀,好多人黎到想食點知賣撚晒,就真係無撚晒計架啦。我係見你係阿哥仔啲朋友,先專登醒碟過你嘆架咋。」

 





阿油無奈之下唯有鼓起勇氣,爬左啖飯落口,點知佢連啖飯都未吞到就忍唔住噴左出黎,我好彩早有預備先無畀佢噴到一臉都係,企堂哥哥見狀即刻扯晒火話:「仆你個街呀,我本住四海之內皆兄弟,專登畀碟我地餐廳最撚耍家嘅嘢黎招呼你,你夠撚膽喺我面前食到想作嘔咁?你真係同我過唔去姐。你知唔知我地全餐廳上下幾撚用心製作食物呀,我地以前行走江湖果陣呀,劈友呀收數呀都唔會放咁多心機呀。我地為左間餐廳喺果個open乜春嘢度多啲正評,我地真係碟碟嘢都精心製作架。點知你個契弟要我三催四請先肯食都算架啦,你仲要食到好似食屎咁?你而家係咪黎玩嘢呀。」阿油驚到好似想喊咁話:「大俠饒命呀,我係唔食得洋蔥……」「你而家耍鳩我呀,唔食洋蔥仲嗌洋蔥豬扒飯?你唔晚得嗌其他汁架咩?」「頭先……頭先你你幫我落單,我無叫架……」「哦而家你即係怪我自把自為,你唔食得洋蔥你唔撚識出聲架咩?」我喺呢個時候充當和事佬,我搭一搭企堂哥膊頭話:「唔好咁扯火喎,我地而家要佢食晒碟嘢佢,證明你地啲嘢好食到唔食洋蔥都會愛上洋蔥好唔好。阿油,你快啲同我食左碟嘢佢,陣間貼士要畀五百蚊,安撫返畀你任性傷害左嘅餐廳上下。」就係咁,阿油喺我地望住之下好勉強咁食左半碟洋蔥豬扒飯,而且仲要一路忍住嘔咁拎左張五百蚊出黎做貼士,之後佢仲要同返餐廳老細同企堂講多謝,但佢講到一半就奪門而出,衝左去唔知邊度嘔了。




喺阿油食緊個洋蔥豬扒飯果陣,我收到Daisy個message,大意係今晚佢地想幫阿Kate留喺公司搞個farewell party,佢叮囑我一定要到。係喎,我都唔記得左阿Kate姐始終一日都係要走,唔洗幾耐Valarie或者Evans就會登上寶座。由於我有預感今晚個party將會有嘢玩,我即時通知莊神叫佢記得上埋黎,不過除左係想預埋佢一份之外,我仲諗住今晚屈佢一筆,話晒佢都係高層呀。到左收工時間,本身大家都係一到五點就會烏獸散,所以當見到大家唔係要OT但收晒工之後仲喺公司度打躉,呢個情況其實幾古怪。唔知係咪Miki定Daisy教路黎,據聞今次個party係Evans揸旗話要搞,佢仲鬼馬到以公事為由留住Kate姐,話等佢有個surprise咁話喎,呢條友仔真係越黎越有前途呀。由於阿Kate真係唔知大家會喺今日幫佢搞個surprise party,所以當佢正準備叫Evans入房傾野,但又見我地個個都仲坐晒喺度果陣,佢又真係有啲愕然,不過好快佢就同Evans入左房傾嘢。而呢個時候,大家都忙住把握時間去報置一下office。當然呢啲粗重嘢就唔洗勞煩到本少爺啦,我將啲嘢交低晒畀阿油同文員輝之後,就落左去公司樓下望下行人思考一下人生。突然之間有人從後攬住我,而我又feel到攬住我嘅人好似有啲吃力,我雖然無後眼,但我都感覺到我同佢嘅高度唔太就位,而最重要係我feel到自己背脊好似有啲軟淋淋嘅嘢頂住我,果種大小我既陌生又熟悉,唔洗擰轉頭我都知道,我身後嘅係我女朋友Daisy。我即時轉身將佢拉入後巷,之後扮晒惡咁問佢:「犯婦人,你喺條街度做埋啲有傷風化嘅事,你可知罪?」Daisy即時甜笑住話:「而家好似係你拉我入後巷喎先生,你信唔信我告返你非禮呀啦。」我淫笑住話:「而家我咁樣唔算係非禮呀,法官都判我無罪架,不過我陣間做嘅嘢就可能唔只係非禮咁簡單啦嘻嘻。」呢個時候我身後響起左一把熟悉嘅聲音:「Robin,乜而家啲後生仔咁猴急,鍾意喺大庭廣眾搞埋啲咁嘅嘢架咩?」「莊生,我地一般有受過教育嘅就唔會嘅,不過有啲畜牲就可能會喺自己公司呃埋無知少女,之後仲想慳錢,咪房都唔開,打算喺後巷搞掂啦。」

 





Daisy見自己同我親熱果陣畀莊神同Robin見到,即刻滿臉通紅咁跑返上樓。而我就冷冷地回應返Robin返畜牲論:「阿Robin小姐,後生仔係比較血氣方剛架,有時情到濃時我地都控制唔到架。不過你都係唔明架啦,你比較少接觸後生仔呀嘛,阿師父呢啲一睇就知自制力高啦,仲高到唔食藥下面唔曉升高……」莊神又再次一掌打落黎話:「收聲啦畜牲,我都未話你呀,我咪叫你觀察下同事之後畀份報告我嘅,觀察左咁耐你知道啲咩呀?」「挑師父,你估我唔洗做剩係招呼你一個咩,不過講過好消息你聽呀,你就黎抱孫……呀唔係,你就黎有徒孫啦。」「我呸,你隻畜牲自己都學藝未精,就學人收徒?不過得閒帶黎畀師父過下目,睇下佢有無資格入我門下啦。」講完之後,佢就無再理我,帶住Robin行上公司。我一路望住佢嘅背影,一路心裡暗駡,都幾十歲人架啦,連阻人好事死後要畀人燒春袋都唔知,鬼唔望佢而家在生就變單春呀。呢個時候我收到Daisy嘅whatsapp話:「以後都唔同你喺街度親熱呀,頭先我真係無地自容呀衰人。」言下之意係咪即係佢想同我喺室內親熱?不過原本慾火焚身嘅我,心入面突然有把聲問左自己一句,我究竟係咪ready同Daisy再進一步呢?諗到呢度,我又開始有啲迷茫。上到返公司,我已經見到佢地將公司變到好似小學搞聖誕聯歡會咁,竟然連十蚊店買果啲爛鬼燈飾都有埋,真係差棵一百蚊爛鬼聖誕樹就prefect架啦。阿Kate喺自己房行出黎見到大家竟然幫佢搞party,佢好似差啲感動到想喊咁。Evans一副主人家嘅姿態行出黎,宣佈話party之前有一個小遊戲,就係大家要喺一個鐘之內,去公司附近買一份禮物畀某位同事,而究竟係買畀邊位同事,同份禮物嘅budget係幾多,就要抽籤決定。我一聽到呢個遊戲真係相當興奮,喺抽籤嘅時候,我心入面一直祈求可以抽中某人,當我一打開張紙嘅時候,我嘅願望真係實現在,我見到張紙上面寫住我要送畀Valarie,而Budget係要接近四百蚊,見到呢個結果,我忍唔住打從心底度笑左出黎。

 

我一抽到張紙之後,就急急腳唔理其他人行左去買份禮物。由於呢個遊戲主旨就係想傳達友愛訊息,再加上有高層(莊神)監場,就算我買啲咩Valarie都要笑笑口咁收左份禮物,而且佢就算幾唔鍾意都好,都唔可以立亂唔要份禮物。我呢個時候偷偷地send左個message畀莊神,要佢陣間配合我,佢聽到我個計劃後都相當雀躍表示會配合。好快我就去到我嘅目的地,某間連鎖家品店,我一入到去就直奔家品部,望左一陣之後,我就搵到我嘅目標,一張價值三百七十五蚊,隻色又浪又核突嘅小圓枱,我即時叫店員拎張新嘅畀我。果位中年女店員本身好似想介紹我再揀下其他款,但我好堅定咁同佢講話:「呢張小圓枱真係好啱我架啦,你諗下,個size又騎呢,雖然好似好大張好佔地方,但實際上張枱平面又細,除左放到幾個杯呀碟呀或者幾本書之後,我就諗唔到佢仲可以放咩啦;再加上啲用料又差喎,放下重野上去都隨時會爛咁,最主要係佢隻色又娘,個外型又樣衰,作為禮物黎講呢張野真係無得輸呀。係啦,我可唔可以再加啲錢,你地搵個同事幫我拎返去公司呀,幾條街架咋。」中年女店員聽到我呢番說話之後呆左好耐,要到其他同事叫返醒佢佢先識得去幫我收錢。我相信陣間Valarie見到我呢份禮物,一定相當驚喜。



由於又要叫人送貨,而且我仲要叫人包埋花紙,所以我係最遲先返到公司嘅一個。當我拎左張小圓枱返到公司一刻,其他人都目瞪口呆咁望住我,相信喺果一刻大家都對我份禮物感到又好奇又恐慌。呢個時間作為今次party揸fit人嘅Evans喺眾人嘅禮物上面貼上號碼紙,我份禮物被貼上七號,我覺得都算有啲意思呀,寓意某條七頭將會拎住呢份禮物返屋企。由於其他人嘅禮物都唔算大份,所以佢地都可以安放喺會議室張枱上面,唯獨係我份禮物要放喺地下度。莊神同Robin由於唔屬於我地office嘅一份子,所以佢地係無份參與呢個遊戲,因此而家枱面上總共係有十份禮物。枱面上第一號嘅禮物係屬於阿畸嘅,而送出呢份禮物嘅係今晚主角阿Kate,份禮物budget係二百蚊以內。當時我慶幸唔係由我抽到送禮物畀阿畸,對於一個共事左咁耐我都唔記得佢叫咩名嘅人黎講,我都唔知應該送咩畀佢好。阿畸打開份禮物之後,原來份禮物係一個平板電腦套黎嘅,而且個套上面仲要有一隻Hello Kitty公仔喺上面,點知阿畸見到份禮物之後默不作聲,其他本身想慶高采烈問下佢感受嘅旁人都立時接兵不動。呢個時候阿Kate 鼓起勇氣問佢話:「我見你舊果個套都用到污糟晒啦,都係時候換過個新架啦,同你之前都用緊Hello Kitty……」Daisy呢個時候好唔好意思咁話:「Kate姐我諗你誤會左啦,你見到果個套應該係屬於我嘅……」阿畸呢個時候忿忿不平地話:「我除左連平板電腦都無部之外,仲最憎Hello Kitty,真係多謝晒你啦Kate姐。」接住落黎又係一場難堪的沉默,我忍唔住開聲話:「喂,今日主角係Kate姐呀,你唔鍾意個套陣間私下賣畀我啦,拎返兩舊水現金走你就心足啦,喂二打六唔好再搶鏡啦,下一份係邊個架?」二號禮物,係由阿輝送畀Judy,budget係七百蚊,可以話係帶住阿輝出身嘅莊神,聽到呢個戲碼之後就向我打左一下眼色。佢之後再望住上次畀佢玩到好甘嘅Judy,點知Judy就故意逃避莊神嘅眼神,死都唔擰去莊神果邊。Judy一大開份禮物之後面色一沉,佢好似唔想畀其他人見到份禮物係咩,我見狀即時一個箭步上前搶左袋禮物……

 

雖然我都知阿輝係一個無咩分吋嘅變態佬,佢平時只係壓抑住自己,但近年經過一連串事件之後,佢又好似越唔越唔想掩飾自己變態嘅一面。阿輝送畀Judy嘅禮物係幾套情趣內衣,而且仲要一睇就知佢唔係頭先先買,而係一早買定左。其他人見到呢幾份禮物,都應該暗自替當時人Judy感到尷尬,除左Valarie應該係幸災樂禍緊。正當Judy想大事化小,收埋啲禮物喺一邊就算,阿輝竟然仲要加把咀話:「Judy,你試完身話我知啦,唔啱size都仲可以換架,不過當然最好係你影埋幅相畀我先可以作準啦。不過以我咁耐以黎一直都觀察住你個body,三圍應該都fit身架啦……」Evans為免阿輝越講越離譜,即時插咀話:「相信阿輝都係貪玩架姐,Judy都唔會介意嘅,不如我地有請第三號禮物嘅得主……」莊神呢個時候插咀話:「我覺得呢位阿輝嘅玩笑可能係開大左,咁啦,我出七百蚊買返呢幾套內衣,我陣間叫Robin幫我揀果份禮物畀Judy小姐啦。」點知Judy冷冷地話:「莊生你有心啦,不過我都唔係第一次畀人咁樣開玩笑法,再大嘅玩笑我都試過啦,呢幾份禮物我會照收架啦,唔需要你費心。」可能Judy以為莊神會因為畀佢當眾咁落面而有咩大反應,點知莊神都只係微笑點頭,無再畀其他反應。可能Judy會以為莊神對上次咁玩佢而有咩悔意,但當佢見到莊神好似完全無上過心咁,佢終於忍唔住話要去廁所而奪門而出。不過在場其他人應該都以為Judy係不甘受阿輝輕薄,所以應該都無人會懷疑係關莊神事。為左緩和緊張嘅氣氛,Evans即時叫第三號禮物得主Miki上前領獎,而份禮物係由我女朋友Daisy送出,當Miki見到份禮身唔係由Evans送出,佢眼神即刻閃過失望之色;同樣地Evans對於收唔到Daisy送嘅禮物,佢都好似有啲失望。而喺Miki拆果份三百蚊Budget嘅禮物之時,Daisy一直都係望住我,好似想睇下我有咩反應咁,而我當然就要扮到無嘢咁啦,不過唔知點解我心底都有啲想陣間會收到Miki送嘅禮物。

 





由Daisy送畀Miki嘅禮物一啲驚喜都無,都只不過係啲Miki用開嘅化妝品牌嘅化妝工具,而Miki都唔係顯得特別開心,佢地都只不過客套地互相多謝左一輪之後就完事。睇到呢一幕,我心入面有啲不快,因為佢地兩個以前明明都係好姊妹呀,但由唔知幾時開始,佢地雙方之間就好似多左重隔膜咁,我覺得有啲可惜。不過人生就係咁架啦,人際間嘅立場往往都會因為啲小事而慢慢改變。到左第四號禮物啦,份禮物係由阿畸送畀Evans,而且Budget仲要係得一百蚊。剛剛當眾受辱完嘅阿畸,喺Evans拆開份禮物果陣,佢眼中閃過一絲殘酷嘅快意,我估份禮物都唔會係咩好嘢。一打開,原來係啲火水同紅油,Evans見到啲禮物一臉不解,但我一睇就知佢送畀Evans嘅用意,佢好明題係串Evans平時會去遊行示威,暗串佢可能會有激進行為,即係淋人紅油同自焚咁。我相信阿畸本身對Evans,什至係遊行示威呢啲嘢本身都係無咩恨意嘅,不過由於佢一直都被人無視,所以搞到心理有啲唔平衡。不過由於Evans生性大方,所以佢都無乜hard feeling。



去到第五號禮物,得主係我女朋友Daisy,而送出嘅人竟然係Valarie,Budget係五百蚊。Valarie喺Daisy拆禮物果陣一臉熱情咁話:「Daisy呀,我好肯定你一定會鍾意呢份禮物架。」其實我自己都喺心入面暗想,如果我抽到要送禮物畀Daisy的話,我會送啲咩畀佢呢?我思索左一陣,但我發覺我其實都唔係好知佢鍾意啲咩,不過既然佢鍾意得我,我估佢啲口味都應該有啲異於常人架啦。我諗如果畀著我,我會送佢一部Nokia舊式電話,等佢第日再遇到咩危險都好,都可以自保呀嘛,而且仲可以幫佢人手入埋鈴聲,幾咁sweet呀。不過Valarie呢啲凡夫俗子,又點會有我咁有創意呀。佢咪又係送埋啲一定無死,唔會出事嘅護膚品,咩面膜套裝畀Daisy。我見到忍唔住講句:「Daisy仲好後生咋,唔同Val姐你呀,你幾十歲人就真係應該敷多啲mask啦,雖然話女人唔保好易老。不過而急切程度黎講,都係Val姐你拎黎自用會好啲啦。我知啦,其實你買呢份禮係想Daisy覺得唔啱用的話,你可以扮晒嘢拎返黎自用嘅,高招喎你。」Valarie聽到當然即刻黑面唔出聲,而其他人都只係喺度偷笑幸災樂禍,Evans又再次出黎主持大局話:「好啦事不宜遲啦,睇黎Valarie都花左唔少心思去揀份禮物呀下,不如我地就快啲請六號禮物嘅得主出黎,睇下先,原來六號禮物係由Judy送出,Budget係兩百蚊,而得主係阿輝喎。」我即時叫囂道:「嘩交換禮物咁sweet,不如今晚合巹交杯埋呀,唔知真係以為係你地兩個嘅結婚party咁呀。」呢個時候Judy返左黎,睇黎佢而家收拾左心情,佢無理到我嘅說話就坐返埋一邊。阿輝一打開份禮物,原來係一個香薰座黎,佢即時好大反應咁話:「仆你個街,八婆,你而家係咪真係暗串我好臭先,即係臭到影響你,所以要送個香薰座黎癖咪咁話啦喎。」我笑笑口咁插咀話:「其實阿輝你又唔好咁敏感啦,你近排有清潔返自己之後,已經由堆填區級別,變返去垃圾房架啦,雖然都係會令旁人難受,不過Judy坐咁遠又未必會聞到嘅,佢都應該係唔太熟你先求其送啲嘢畀你架姐。」阿輝拎住個香薰座無奈坐返低。

 

終於去到第七號禮物啦,大家都喺度估究竟係邊個會拎到我份禮物呢。我忍唔住自己開始講話:「當我知道我會送禮物畀呢個同事嘅時候,我覺得自己好似發緊夢咁。估唔到連個天都覺得我應該要藉住呢個機會,去表達我對呢個同事心中嘅敬意。正所謂家有一老,如有一寶,我竟然可以向我地公司嘅寶表示敬意……」去到呢個時候,大家都知道份禮物嘅得主係邊個,而禮物得主應該都sense到有啲嘢,所以佢打算行開唔收份禮物。但同我裡應外合嘅莊神竟然喺呢個時候出聲話:「James,我雖然見你成日平時口沒遮攔,不過估唔到你都會敬下老,唔錯唔錯,收到你份禮物嘅同事一定會好開心架啦,等我宣佈禮物得主係邊個先,咦,原來係Valarie。」我即刻對住Valarie話:「Val姐,我知你好快會結婚搬新屋,我覺得呢份禮物真係好適合你呀,你快啲拆開花紙啦。」Valarie好唔情願咁行埋份禮物度,不過佢一開始都刻意同份禮物保持距離,好似驚有嘢會彈出黎咁。到佢見到原來係一件傢私,佢就變得非常驚訝。由於盒面上有幅小圓枱嘅完成圖,佢一見到張小圓枱係咁嘅樣之後,就開始問:「我屋企其實唔係好大呀,我可唔可以退貨或者換其他嘢咁呀。」我一臉委屈咁話:「但係我真係好有心機揀份禮物架喎。」莊神即刻一臉正色咁話:「Valarie你咁就唔啱啦,話晒都係同事嘅一番心意呀,你無理由唔拎返屋企用架喎,咁啦Robin,你陣間記住幫Valarie call架貨van啦,咁佢咪可以拎走囉。」Valarie面有難色咁話:「但係盒嘢好似好重喎。」莊神繼續一臉正色道:「盒嘢之所以重,係因為包含住同事對你嘅敬意,你咪都係做下Gym囉,老人家唔多啲做運動好易死架,其實同事真係對你好體貼架啦,我作為旁觀者見到都有啲感動,ok,next,下份係邊位同事架,等我睇下先。原來已經黎到八號架啦,哦原來八號得主係屬於我地今晚嘅主角阿Kate,送出呢位同事叫咩名話?」我插咀道:「莊生佢叫做阿油呀。」阿油送畀Kate嘅禮物,Budget係四百蚊,而阿油送畀阿Kate嘅嘢,竟然係一隻外型有啲似成人玩具嘅USB手指。

 

大家初初見到隻USB手指,由於都誤會左係啲咩成人玩具,再加上阿油又猛話呢隻野好快好勁,所以全場靜晒無人識畀反應。到大家知道係一隻USB手指之後,都不禁鬆左口氣,話晒阿油唔同阿輝,大家都無預計過佢會做啲咁破格嘅事。到左第九份禮物啦,得主係我,而送出禮物嘅係Evans,Budget好似係四百蚊。Evans送左一支墨水筆畀我,我估佢係想暗串我平時鍾意用小器簿記低人嘢,由於佢咁公然咁串我,我當然會用呢支墨水筆寫佢落小器簿啦。不過講真,支筆望落都幾靚,其實我收到份禮物都算係心中暗喜嘅。到左最後一份禮物啦,由於剩返一個配搭,大家都知道由邊個送,同得主係邊個。阿油望住份禮物,表現得相當激動,我都相信除左呢啲場合之下,阿油都無乜機會收到Miki嘅禮物架啦,阿油打開份禮物嘅時候真係激動到落淚,雖然講到明budget係五百蚊,不過份禮物係一個應該要一千蚊以上嘅銀包,不過大家都無出到聲。個銀包打開左之後,有一個小小嘅card holder,我見到card holder攝左啲野,當我以為Miki真係咁幽默真係畀張好人卡阿油嘅時候,原來果張係佢同阿油嘅合照,雖然合照入面佢地唔係太親密,而且兩個人面上神情都有啲奇怪,不過阿油睇黎都已經心滿意足,今次算係阿油最幸運嘅一次。








收晒禮物之後,當然係有人歡喜有人愁,不過最歡喜果個當然係阿油啦,佢一路望住個銀包一路傻笑。我忍唔住問阿油:「個銀包你打算拎黎用定會放入保險箱?」阿油認真諗左一陣,之後答我:「我會自己買多個一模一樣嘅黎用,至於呢個我會好好保管收藏,到我同Miki第日兒孩滿堂嘅時候,我會拎黎做家傳之寶。」「其實你有閒錢不如拎黎睇下醫生仲好啦,不過都係算啦,你無得救架啦,有閒錢不如做下善事好過啦。」沉醉住喺自己世界嘅阿油唔理我冷嘲熱諷,繼續好似有嘢上身咁傻笑。另一方面,Valarie好似打緊畀佢個鬼佬老公叫佢黎幫手搬張小圓枱,但件鬼佬好似唔多想show佢,但又由於高層開到聲要Valarie一定要拎返屋企,所以佢都相當頭痕下。不過當然唔會有人主動向佢伸出援手啦,大家都專登喺佢隔離行過但又唔同佢講嘢,呢個時候Evans唔知係出於真心定終於識做下戲,佢當眾提出話要幫Valarie手搬返去佢屋企,Valarie事到如今又唔可以出口拒絕,又係咁Evans喺大家面前又攞左一分。呢個時候Miki行埋我身邊問我:「你連Evans會因為幫Valarie拎嘢而喺大家面前攞分都算到?」「你太抬舉我啦Miki姐,我係有計到咁,就一早呃左你上床啦係咪先。不過你又做咩良心發現突然對阿油哥咁好呀,又送銀包又盛。」Miki笑啲有點黯然,佢話:「咁佢一直以黎都叫幫左我咁多呀,不論佢出發點係咩,我都應該要多謝佢嘅。我係做唔到啲咩呀,不過如果送個銀包會令佢開心的話,我都唔介意嘅。」「你送埋自己畀佢佢仲開心呀,不過你如果想送畀我我都好樂意接收嘅。」Miki無理我,佢望向遠方喺度推緊個蛋糕出黎嘅Evans同Daisy,我即時忍唔住講左句:「嘩,唔係呀話,而家老麥搞生日會咩,要唔要拎打壽桃出黎呀,阿Kate姐走人都未派散水餅喎,有咩理由而家要我地夾左錢買蛋糕先。」啱啱行到埋黎嘅文員輝插咀話:「唔好咁cheap啦阿James,一個蛋糕洗得你幾錢姐。」竟然畀啱啱公然性騷擾完Judy嘅阿輝話我cheap,我呢一刻真係無言以對。

 

所以都話我公司真係暗藏唔少高手,剩係睇大家拎蛋糕嘅先後次序,都知大家喺心入面一早排左位。第一個拎嘅當然係女主角Kate姐啦,而之後亦好理所當然係莊神拎。到左第三個嘅時候,大家都屏息以待,Valarie當然想自己行出黎攞,不過奈何佢又怕莊神唔鍾意,而Evans當然就唔識得攝呢啲位啦,所以去到分第三件嘅時候,大家都唔敢出手。不過我就緊係唔會同其他人客氣啦,我行埋去一手拎起左第三件蛋糕畀Evans,之後再依次分畀Daisy,Miki,阿油同阿輝,至於阿畸。Judy同Robin我都有做好心喺之後分到畀佢地。最後剩低左最桃突果件,我就好大聲咁問Valarie:「Auntie Val,你咁嘅年紀仲食唔食得蛋糕呀?如果你唔食的話我陣間會拎件蛋糕落樓下餵狗架啦。不過你唔洗驚無野食呀,我知你年紀大消化慢,專登買左啲消化餅呀。我一早都話左自己係最敬老架啦,你地話係唔係先?」全場嘅人都好努力忍笑,不甘受辱嘅Valarie話:「只有啲死剩把口嘅失敗者先會覺得喺口舌方面佔左人便宜係啲好威嘅事架姐。蛋糕唔夠分唔緊要呀,大家食得開心就得架啦,我唔食唔緊要架。」「喂auntie,你係咪老到唔識數數目呀,枱面仲有一件喺度呀,點會唔夠分姐,不過果件如果畀我揀啦喎,我會想請樓下隻唐狗旺財食啦,佢好得意架,雖然Val姨你都好得意,不過都係唔夠佢得意。」Valarie唔再同我糾纏,選擇左行埋一邊講電話,我有懷疑過佢會唔會係終於忍唔住手,想吹雞搵人打我呢?不過佢一日都未知美美婆行蹤,佢一日都唔會夠膽郁我啦。呢個時候大家開始圍住阿Kate問佢之後路向,不過佢都係一臉尷尬唔係好識得回應其他人。其實可能仲有啲人不知就裡,唔知Kate姐係因為畀佢個高層男友嘅元配逼走,佢根本就無咩著落。莊神望住一臉無奈嘅Kate姐,好似覺得好有趣,佢走埋眾人到問其他人話:「你地剩係識問人後路係咩,但你地又有無幫自己鋪過後路先?不如你地其他人又答我,如果今日呢間公司執左笠嘅話,你地會有咩打算呀?」

 

大家頓時鴉雀無聲,高層問呢個問題,大家又點會敢答呀。不過阿油可能想喺Miki面前攞采,佢好大聲咁答話:「我會返大陸搵啲女返黎拍藝術片,再將啲片放上網畀人免費睇,剩係廣告費都足以令我變做大富豪啦,咸濕仔啲錢好易賺架咋。」莊神微笑反問:「呢位同事你既然咁有大志,點解而家又唔去實行呢?」阿油靜左一靜之後話:「因為喺呢間公司我仲有一個使命,我仲有需要去保護嘅人。遲啲呀,等我同我最愛嘅人成家立室之後,我就會將呢個計畫實行,到時我所愛嘅人就會生活無憂架啦。」阿油一邊講所愛嘅人,一邊含情密密咁住Miki,而Miki就專登扮同其他人傾計,想無視左阿油,點知阿油越講越興奮,佢繼續話:「其實大家都知我愛人係邊個架啦,我唔係無諗過向佢求婚以回應佢頭先公開向我表達愛意呀,不過我怕畀到壓力佢咋,過多一排呀,等我事業有成之後,我就會盡快我做男人嘅責任,畀個名份佢架啦。」我忍唔住插咀話:「但而家好似仲未有地方容許你同你隻左手結婚架喎。」阿油無視我,繼續望住Miki講:「Miki呀,我想當住大家講一次,我……」點知佢未講埋之後兩隻字,Miki亦都忍唔住講左句:「我知,你想話我地永遠都係好朋友呀嘛,得架啦明架啦,呢啲嘢在心中得架啦。」就係咁,原本開心到差啲暈低嘅阿油,又一下子畀Miki踢返落谷底。 







阿油今晚可以話係喺天堂地獄一日遊咁,佢真係可以話係現代但丁,應該都可以寫返《神曲》出黎。自從Miki公開話佢地只係朋友之後,阿油就失魂落魄咁住埋一邊,望住個銀包發呆。Miki雖然都覺得好唔好意思,不過有啲嘢謂左出口就收唔返。Daisy走埋黎細聲同我講話:「我覺得阿油好慘呀,雖然我係Miki都應該會有同一個反應,你把口咁叻,不如你今晚去開解下佢呀,我陣間自己返屋企就得架啦。」「下?乜陣間我地唔係去洞房花燭架咩?我點解要理果條死毒男喎,唔制呀,我要洞房呀。」「唔准扭計呀,阿油真係好慘呀,你去乖乖地陪下佢啦。」挑,啲女人有時真係同情心泛濫,好多人都好慘架啦,理得幾多姐。我覺得Daisy頭先整到我慾火焚身,但而家又要我去理阿油條毒男,我都好慘架,不過既然佢開到聲,我都無得拒絕啦。我走埋去同阿油講話:「睇你個樣如果今晚無人開解你的話,你都會走去跳樓架啦。我唔係話擔心你去死呀,不過我驚你跳果陣會麻煩到其他人咋,我今晚抵諗啲陪你去玩下啦。」阿油望住我,佢眼神好空洞,靈魂好似被抽走咁,良久之後佢無黎神氣咁答我:「我人生咩都無架啦,你唔洗專登理我喎,其實就算你而家賣我去中東,我都唔會反抗架啦。去到中東咪仲好,就算做人奴隸都起碼有人理下我呀,我喺香港真係無人無物,朋友又無,親人都剩係得條喺我屋企痴飲痴食嘅仆街,唉……」「你都唔係無朋友呀,Miki頭先咪公開話當你係女朋友囉哈哈哈。」我知道我呢番說話係好涼薄,不過唔講我真係對自己唔住。阿油聽到之後,忍唔住流下男兒淚,佢話:「James哥,不如你真係賣左我去中東算啦,不過你應承我就算賣都賣畀女人,唔好賣畀男人呀,我腸胃唔好受唔住呀。」我忍唔住用力拍佢個頭話:「妖,乜Q野賣你去中東呀,你啲死毒男放喺街市肉檔賣斷斤賣都無人要啦。而家失戀大晒呀,失戀就可以語無倫次呀。唉你唔好行開啦,我搵埋文員輝,今晚開解下你啦。」可能我份人都叫仲有少少人性,呢一刻我其實真係想開解呀阿油。

 

Party完結之後,Evans主動提出車晒啲女同事返屋企,不過由於佢架車唔係巴士,所以都係車唔晒所有女同事。Daisy見狀即刻提出話佢同Miki自己搭的士走就得,Evans聽到之後顯得若有所失。而莊神聽到我同阿輝今晚打算開解阿油之後,佢就一臉興奮咁表示佢想參與,而且佢仲想成為帶頭大哥,帶我地去玩咁話。我聽到之後其實有啲想抽身,不過又怕得罪莊神呢條麻煩友,所以都係唔敢拒絕。莊神見我地答應之後,即時打左幾個電話,好似安排緊啲嘢。阿輝喺一旁狀什興奮,佢雖然都識左莊神好耐,不過佢好似仲天真到以為莊神真係會安排幾個model呀明星呀畀佢歎咁。而阿油就好似活死人咁對周圍發生嘅事完全無反應,相信陣間就算有咩model 明星坐埋喺佢大脾佢都應該唔會有反應。過左一陣,莊神就叫我地落樓,一落到去之後我地就見到有架黑色房車喺度,Robin示意叫我地坐上去。唔知點解,呢一刻我有啲想縮沙,不過我亦唔想得失阿莊神,所以唯有硬住頭皮上陣。一上到車,莊神無答我任何問題,包括我地去邊同去做啲咩,佢只係叫Robin開車。阿輝喺車上表現得好興奮,興奮到好似一隻發緊情嘅猩猩咁,不過佢又唔可以畀阿油知道佢識同莊神咁熟稔,所以佢都唔敢多講。我一路望住車窗外嘅景色,都無發現有咩唔對路。因為我本身以為莊神會車左我地去啲荒山野巔度,之後要我地玩埋啲咩求生遊戲。不過見佢只係由九龍車左我地去港島果邊,而且都仲喺市區度,所以我都比較放心。無幾耐之後,佢就喺中環一棟商業大廈度停低左,阿輝細細聲同我講話:「聽聞呢啲商廈上面好多富豪先玩入得去玩嘅地方架,上面咩女都有呀,今次我地發達啦。」我唔係話唔咸濕,不過我真係對阿輝呢番說話完全無感覺,今晚唔洗喺啲咩山頭過夜我都已經好慶幸啦,我真係唔信莊神會咁好死。

 

莊神帶住我地入棟商廈嘅時候,樓下嘅保安好似認得莊神咁,無上前問過半句。我地跟住莊神上左大廈嘅十七樓,阿輝喺一旁表現得非常興奮,阿油就依然無乜表情咁。一出到lift之後,我地就被帶到其中一個商業單位,個單位喺外面睇好似好平平無奇,同其他商廈單位無乜分別咁。但莊神專誠帶得我地黎呢度,我相信事情一定無咁簡單。莊神示意叫我推開度門,我由於驚中伏,所以恐都唔肯。阿輝已經按捺不住佢湧緊出黎嘅性慾,佢搶身喺我面前行入去,點知一打開門之後。阿輝即刻由一臉興奮變到無比驚訝,單位入面的確有好多明星同model仲有無數達官貴人,但單位入面並唔係阿輝期待嘅雜交派對,相反,單位入面嘅眾人都圍住喺一張張唔同嘅枱上面,玩緊層層疊,大富翁同飛行棋。我地滿面懷疑咁回望莊神,佢淡淡地話:「乜而家有錢人唔可以約埋出黎玩益智活動架咩?不過當然,為左令遊戲刺激啲,當中可能有少少賭博成份啦,你地唔好講出去呀。」仆你個街,說穿了,呢度咪即係同旺角啲樓上café差唔多?不過呢度係高級啲咋嘛,由果一刻我決定左,我陣間一坐低一定要叫杯珍珠奶茶同叫碟飛碟黎食下。



阿油帶點不屑,細細聲地講:「唔係掛,帶我上黎有錢人café就話係為我提昇士氣?我自己夠識去登打士街玩board game啦,果度仲多花款啦。睇死你班有錢人咪係用真錢玩大富翁,有咩咁新奇姐。」莊神搖頭笑道:「喺香港咁樣匿埋聚賭犯法架,更何況錢對眼前呢班有錢佬黎講,又有咩咁刺激呢。喺呢度玩,輸左會有啲好刺激嘅大懲罰。」我聽得覺得好有趣,忍唔住問:「例如有咩懲罰呢?」莊神話:「上次有位城中名公子輸左,我地包起左泰國一間猛鬼酒店要佢喺入面自己過一晚,佢自從果晚之後,而家起身屙夜尿都要搵保鑣陪呀。」阿輝色迷迷咁望住遠處幾個打扮得相當性感嘅電視台姐仔,問莊神:「咁贏左係咪可以同果班女上床架?我平時睇電視果陣都成日幻想同佢地大戰三百回合架啦,估唔到而家竟然有機會。」莊神無視文員輝嘅問題,繼續講:「可能你地會奇怪班嬌生慣養嘅有錢人點解會肯乖乖地受罰,原因好簡單,因為佢地同時縮沙唔認數的話,就會喺上流社會無晒面。」今次輪到我不屑地道:「挑,估都估到啦,我一啲都無奇怪過架喎,不過先旨聲明呀,本少爺真係唔會同你地癲,我而家係做旁觀者架咋。」莊神望住我再次搖頭話:「呢位同事你真係一啲上進心都無,你唔諗下可以靠喺度玩遊戲識到多啲有錢人?我而家擺明畀位你地上啦,至於結果係點就睇你地造化啦。」呢個時候,有一架著住類似酒店front desk職員嘅黑色套裝,面上戴住一幅黑色粗框眼鏡,一臉精明能幹嘅女仔向我地走黎,問莊神:「莊先生,呢幾位你會介紹黎嘅新參賽者定係單純黎旁觀架?」莊神揮手示意叫呢個女仔等一等,佢轉身同我地講話:「先旨聲明,喺呢度贏左係唔可以同呢度啲女仔上床架下,再加上參賽費都唔平架,你地一定畀唔起架啦。不過如果你地邊位咁有大志想挑戰一下自己,我唔介意幫你地出錢嘅。」阿輝一聽到獎品唔係女,即時擰晒頭,而我亦都係堅持唔會參加,相反行屍走肉緊嘅阿油就話:「反正我都無咩野可以再輸架啦,好啦我參加啦,反正你地都係想睇我輸得有幾慘架姐。」

 





喺辦左一啲手續之後,阿油被各位戴住眼鏡嘅女工作人員帶左去一邊講解,突然之間我聽到阿油喝果個女仔:「咩呀,而家未見過毒男呀,你望夠未呀?你啲眼神我好熟悉呀,由細到大我都見慣架啦。」見狀我即刻行近聽下佢地搞咩,點知果個女仔非但無畀阿油嚇疾,佢仲好從容咁托一托眼鏡話:「先生你誤會左啦,我只係比較少見到你呢啲打扮得咁沉實穩重嘅客人姐,我個人都相當欣賞呢種style。至於咩毒男之類,我自己本身都好討厭呢啲標籤,我都唔怕老實同你講,我之所以有得做呢份工就係因為我本身好沉迷玩各類boardgame,如果要講的話,我都算係毒女一名啦。你放鬆啲先啦,你陣間仲要大顯身手架,我對你好有信心。」因為最後果句說話,阿油突然面紅,佢好唔好意思咁話:「對唔住呀,因為我今日失去左一個我畢生最愛嘅人,所以心情先唔好,你唔好介意呀。」個女仔笑一笑話:「唔緊要,你係客人,我有責任令你上到黎玩得愉快架嘛。我叫做Erica呀,如果你陣間有咩需要都可以隨時叫我架。」阿輝喺呢個時候一臉猥瑣咁話:「姐姐仔,我都好有需要架,我可唔可以搵你呀?」我忍唔住出聲制止佢話:「阿輝呀,你可唔可以做返個人呀?唔好搞到自己好似頭發緊情嘅狗公咁,無時無刻都好似要磨人隻腳咁好唔好?你唔尊重自己都尊重下同你同行嘅我啦。」阿輝不懷好意咁笑一笑,之後話:「你又知我最鍾意腳嘅嘻嘻。姐姐仔呀,你而家著緊果對絲襪反正都穿左個洞,不如畀我返去做留念呀,你到時入返條數落莊生度就得架啦。」Erica依然係一臉笑容咁話:「頭先莊生交代落話,如果你地兩位旁觀者惹事生非的話,我可以全權處理,呢位先生我希望你會收返頭先嘅說話,如果唔係我就叫保安架啦。」佢講完之後,望一望遠處果兩個印巴藉大隻佬,阿輝亦都即時乖乖收聲。

 

無幾耐,阿油就被安排左去同幾個model同一位貌似二世祖嘅友仔玩層層疊,枱上嘅幾個人一見到阿油,就即刻訕笑,某位平時看似高貴大方嘅model笑笑口咁話:「不如咁啦,呢條友咁騎呢樣衰,我地陣間邊個輸左就罰同佢上床啦。」阿油怒啤左果位model一眼,佢話:「我雖然係死毒男,不過我都有taste架,我只會同我心目中嘅女神共渡春宵,你呢啲大眾公廁,請我都唔要呀。」估唔到失戀之後嘅阿油會變到咁有霸氣,睇黎Miki畀佢嘅刺激真係好大。果位貌似二世祖嘅友仔聽到阿油嘅反應之後笑得好開心,佢拍一拍阿油膊頭話:「雖然我唔知你係何方神聖,不過你頭先嘅表現好有guts,我相信同你玩會係相當刺激。」阿油依然一臉不忿咁話:「唔好講咁多啦,你地輸左會罰咩?」喺枱上嘅第三位參賽者,應該唔係model就係明星嘅貌美少女話:「今次呢個哥哥第一次玩,我地玩細啲啦,陣間我地邊個輸左就要喺街bear hand去拎啲dog shit啦,好唔好?」阿油拍枱話:「唔得,陣間邊個輸左的話,仲要同我食埋舊狗屎呀。」枱中三人呆左喺度,阿油話:「你地唔係淆呀下,淆就不如唔好玩啦。」頭先畀阿油笑完係公廁果位model心有不甘,即刻話:「玩咪玩,我同你講你今次食硬狗食啦食屎狗。」點知,阿油唔知係咪作為一個毒男,喺遊戲方面真係有啲心得;又或者係上天喺要佢經歷左咁多不幸之後,都想畀佢威返次,佢竟然贏左。而輸左要食狗屎嘅,就係果位被阿油話係公廁係model,不過公廁裝屎又好似幾合理呀。