Taylor打黎向我報料話:「經過長期體力勞動之下,美美婆婆嘅精神終於面臨崩潰。喺為左可以甩身返香港,佢開始爆緊佢個好孫女嘅嘢啦。原來Valarie個醫生前夫竟然又諗唔開想同返佢一齊,不過佢仲未知阿Val姐已經同條鬼佬談婚論嫁,咁你都知Valarie果條鬼佬其實無錢架啦,所以Valarie咪諗住當阿醫生係ATM咁拖住佢囉。」呢條情報的確係新嘢,而諗返起之前我有次撞破Valarie同個醫生曾經一齊食過餐飯,睇黎美美婆都係所言非虛,我決定好好記低住呢個情報睇下可以幾時運用。另一方面,尋晚自從阿油受左咁大刺激,激發左佢霸氣嘅一面之後,我就覺得阿油個氣場好似唔同左。尋晚佢喺勝出左之後,畀佢話係公廁果位model就要聽佢話去食狗屎。本身另外兩位參賽者都好似有啲不忍,佢地不斷提議話可唔可以罰過第二樣嘢,不過阿油都一口拒絕左。可能真係抑壓左太耐,阿油一有機會發洩就真性情盡露。佢聲稱話因為怕街上面見到果啲狗屎唔係真嘢,佢專登帶左成班人去搵佢屋企附近果隻流浪狗,由於阿油平時都有同隻流浪狗玩下,所以隻狗見到佢都相當熱情,肯食阿油餵佢食嘅嘢,之後我地成班人就不斷喺度等隻狗屙屎,阿油話要阿公廁model當眾食隻流浪狗嘅新鮮狗屎喎。由於我自己本身就無睇人食屎嘅癖好,所以我無等到落去就走左返屋企,但我走果時文員輝仲係一臉興奮,好期待果一幕咁。到左今日一朝起身,我睇返文員輝尋晚偷拍果段片,呢條友真係相當無人性,由於佢當時過份興奮,所以段片不斷都係左搖右搖咁,我懷疑佢當時可能仲係單手揸機,再加埋佢嘅喘氣聲,我真係覺得呢段片唔應該再喺人間流傳。所以我決定將段片save去我個小器檔案庫度,希望果位公廁model唔會有得罪我嘅一日啦,我都唔想用呢啲嘢去威脅人咁賤格。我一行出房果陣,見到一個令我相當驚訝嘅嘢,我果個一向粗聲粗氣嘅細妹,竟然嗲聲嗲氣咁服侍緊一個男人,無理由架,佢男朋友明明出左trip。

 

到我見到果個男人係邊個嘅時候,我就更加唔識反應,我點都估唔到呢個男人竟然係第二次自己走上我屋企嘅莊神。雖然我一向都好少過問我個妹嘅感情生活,不過見到佢竟然對住一個大佢咁多嘅男人咁親熱,我都唔知應該點。我見到莊神好似拎住啲嘢畀我個妹睇咁,而我阿妹由從後俯身去睇,結果咪請晒阿莊神食波餅囉,我個妹仲要一路睇,一路嗲聲嗲氣咁話:「真係架?John你好勁呀,我平時識果啲男仔都無你識咁多嘢嘅。」而我亦都望到莊神個樣好受落,我一臉滿足咁答返我個妹:「咁你平時識果啲後生仔,點同我人生經歷咁豐富呀,不過我有啲經驗仲豐富呀。」我喺一旁目睹,真係唔多識反應,不過我又諗深一層,阿妹平時都成日出去溝仔架啦,但溝黎溝去唔係啲剩係識9up自己識幾多有錢人嘅股票經紀呀地產經紀呀,一係就係果啲大大隻隻但一睇就知非常花心嘅紀律部隊。反正佢都係要溝架啦,起碼莊神雖然都係出黎玩,但點都會睇左我份上善待個衰妹呀,而且佢又咁疊水,阿妹如果跟左佢之後就唔洗成日問我借錢找卡數,莊神又會好似欠左我人情咁,真係一舉兩得呀。喺考慮完之後,我決定唔現身喺佢地面前,等佢地兩個繼續發展落去。莊神成日叫我觀察人類行為呀嘛,我而家咪觀察下呢個色途老馬喺一個妙齡少女強攻之下,佢招唔招架得住囉。未幾,我個妹嘅攻勢就更加劇烈,佢竟然話熱而要入房換衫,佢好似無理過我都係喺間屋度咁,佢竟然唔戴bra,剩係著住件小背心就行左去哄埋莊神度。見到自己個妹咁落力去色誘莊神,我雖然真係有啲唔好受。但另一方面我都喺心入面暗暗祝佢成功,我知道自己一世都未機會畀啲有錢女包起,而我個妹亦都唔係啲嫁入豪門嘅材料架啦,不過做人二奶都無問題姐,香港地笑貧不笑娼,我地全家食粥食飯就靠呢鋪架啦。喺我個妹嘅猛烈攻勢之下,莊神竟然真係跟住佢入房,不過佢喺行入去嘅時候都不斷張望,好似驚畀我發現咁,但呢度話晒都係我屋企,我要匿埋佢又點會搵到我呀,再加上我阿妹亦都不斷向佢保證我有排都唔會訓醒……

 

喺過左一陣之後,佢地兩個行返出房,而我就氣定神閒咁坐喺廳度,飲住杯茶等佢地行出黎。莊神不愧為莊神,佢見到我都一啲慌張都無,只係好淡然咁話:「頭先見你未起身,你個妹妹帶我入去畀我睇而家年青人興啲咩咋嘛。」我冷笑左一聲之後話:「佢係畀你睇而家啲年興人鍾意玩咩花式定係畀你睇而家家後生女興著咩內衣黎引仔呀。」我個妹即刻創住答話:「阿哥你唔好亂講啦,莊神都唔係呢啲人黎,我地傾下計咋嘛。」莊神一直都顯得氣定神閒咁直視住我,絕對無顯出有咩愧疚,連我都分唔清楚佢地頭先究竟係咪咩都無做過,唔通莊神只係設計黎反觀察我,睇下我如果見佢同我個妹上過床的話我會有咩反應?喺呢一刻,我同莊神不斷咁用眼神黎對峙住,不過睇黎好似我係處於下風果個。