今日我開始左對公司啲同事進行復仇大計: 第七十五節

今日一返到公司，我見到Daisy同Evans之間好似有種說不出的曖昧，而且Daisy好似逃避緊Evans嘅目光咁。而Daisy亦都無問到我點解喺個ball度突然消失，而且亦都無交代過自己嘅去向。我同佢就好似好有默契咁無去提當晚嘅事，而事實上，我亦都唔知點解好似無乜興趣去知Daisy同Evans係咪發生過啲乜。但我無興趣姐，有另一個人就睇黎相當在意，Miki留意到Evans同Daisy咁有古怪，就走黎問我：「你同Daisy同Evans三個之間係咪發生左咩事？」「係呀，尋晚我同Evans飲大左兩杯之後，情不自禁喺街上擁吻畀Daisy發現左呀。不過先旨聲明我唔係同性戀呀，我只係想要Evans 嘅肉體咋。」Miki用不屑眼光望一望我，之後話：「連我都估唔到你為左達到目的，真係連Daisy都畀埋人都無所謂。」我冷笑回佢話：「係呀，由頭到尾我最在意都係你咋嘛，Daisy同左Evans一齊咪仲好，咁咪無人阻住我同你囉。」雖然呢番說話我係講笑咁講，不過Miki聽完之後竟然有啲愕然，比著平時佢通常都會對我呢啲說話嗤之以鼻，但今次佢竟然變到沉默，面上表情亦都相當難明。隔左一陣佢同我講話：「之前咪話Evans因為之前啲事畀人知令佢處於劣勢，而且佢又無咩立過功所以畀人睇低一線嘅，呢方面我其實諗左方法幫佢架啦。不過我想你應承我一樣嘢，我個計劃唔需要你幫我手，不過我亦都唔想你到時阻止我？」我笑道：「你都short嘅，我點解會阻止你先？即刻除非你個計劃係棟我架姐，如果真係棟我我就算而家應承左你，我到時為左自保都會阻你架。」Miki用一隻手指點住我個咀示意我收聲，佢之後好此認真咁話：「你應承左我先啦，我從來都無求過你，不過唯獨呢一次我想你應承我，得唔得？」由於佢突然嘅認真令我擔心起來，我一時間都唔知點反應，我唯到好猥瑣咁講：「無話唔得架，不過你有求於我，係咪應該有啲表示先？不如咁啦，你應承同我上床我咪應承你囉。」點知Miki依然認真，佢話：「只要你到時唔會阻住我，你想點都得。」講完之後佢就轉身走左，留低無比驚訝嘅我。 正當我行返埋位果陣，我聽到文員輝行埋去Judy度問佢：「有無著我送畀你套嘢呀Judy，應該好fit你架喎，你啲仔就正姐啦嘻嘻。」Judy企圖拉開話題：「阿輝呀，頭先我send畀你個file你係咪print左？」阿輝淫笑住回答：「我係咪偏左？你又知我碌嘢係偏左嘅？」正當Judy想發難之際，我行埋去搭住阿輝個膊頭話：「阿輝呀，講樣搞笑嘢你聽呀，聽聞有啲人玩制服玩到好偏門架，食環署呀衛生幫辨呀果啲都可能有市場架。」Judy聽到之後面色即刻一沉，阿輝聽完之後哈哈大笑話：「你係咪吹水呀，我都算咩都好架啦，我都未玩到咁偏門啦。」我無出聲，只係向Judy投以不懷好意嘅目光，Judy即時起身，同我講話：「James，部水機無晒水，我唔夠力搬，你可唔可以跟我去pantry換左桶水呀。」我微笑住點頭，之後同佢行到入pantry之後佢捉住我問：「你知道啲咩？」「我早排經過間酒店嘅後門，見到個女人著住套清潔工人裝行出黎。最有趣係佢除左同你用埋同一個手袋之外，仲要用埋同一個電話，連個電話Case都係一樣喎。我心諗無理由架，你個電話case明明係搵人痴閃石上去架嘛，點解啲閃石pattern都可以係一模一樣架呢。而果晚我又收到風你同莊生出去喎，咁我咪唯有斗膽作個假設囉，果個女人一定係另一個時空嘅你。Judy姐你份人咁貞潔，點會立亂跟老細去開房呀，就算係開房都唔會著住套清潔工人裝咁神奇啦。我果晚見到嘅如果唔係幻覺，就一定係平行世界黎嘅你啦。但我又奇怪喎，果個都唔係你，點解你而家又咁緊張咁捉住我問呢？」Judy惡狠狠咁話：「你唔洗扮嘢啦，平時你都莊生雖然扮到唔識咁，但你地成日都好似好有默契咁，我早就懷疑你地兩個一定別有內情。我畀佢玩單嘢一定係佢話你知架啦？不過點都好，如果你唔爆我啲嘢，我都唔會話畀人知你係莊生啲人，你都唔想Valarie知道架？」我搖搖頭笑道：「傻豬黎嘅，你鍾意咪同人講囉，我其實唔多care架。不過你唱完我之後唔怕我會報仇就得，你仲有大把嘢喺我手上。」 阿油自從上次畀Miki公開發卡之後，今日係佢第一日再次面對Miki。我好有興趣想知佢地嘅關係而家會變成點。所以阿油一返黎我就望實佢，佢返到黎嘅頭一個鐘都係無出聲，只係自己埋頭整電腦。但過左個幾鐘之後，佢突然拎左個打火機出黎，唸唸有詞咁跑埋去Miki度。仆你個街，收好人卡姐，阿油唔係玩到要燒死Miki呀嘛，正當我地所有人都嚇到呆左。阿油拎左Miki送畀佢個銀包出黎，之後喺銀包入面拎出左佢同Miki嘅合照，之後喺Miki面前一邊燒左幅相，一邊鬧阿Miki話：「你根本一直喺度利用我，你既然唔鍾意我又點解成日要畀啲signal我？你個賤人一定不得好死，你唔會有善終架，你除左會孤獨終老，你仲一定會落地獄架死賤人。」喺呢個時候我諗都無諗就衝左埋去拉阿Miki跑出公司，我唔係因為驚阿油會對佢不利。而係我知道頭先阿油點火果陣，自動灑水系統已經sense到，而過左唔係幾耐，公司亦都真係變左水鄉澤國，而公司其他人都變晒落湯雞，公司所有嘢都濕晒。而當我回過神來嘅時候，我先諗起Daisy都仲喺公司裡面，正當我驚緊一定畀佢怪責之時，我望返入公司，我發現佢同Evans原來頭先都唔喺公司度，究竟佢地兩個去左邊呢？

 我呆呆地望住公司果幾張濕透了嘅辦公桌，同果班因為走避不及而濕透了的同事，我忍唔住大笑左出聲。阿油坐左喺辦公室嘅一角，用怨恨眼神望住因為畀我拉走而安然無恙嘅Miki，相反Miki就用同情嘅眼神望返阿油，因為大家都心知肚明阿油今次真係畀人炒硬。呢個時候頭先失蹤左嘅Evans同Daisy，仲有剛上到黎嘅Sam姐一齊步入公司，佢地都畀眼前嘅情景嚇到呆左。我望向Daisy，我覺得佢嘅驚慌唔係黎自眼前嘅情景，而係因為畀我知道左佢頭先同Evans一齊唔見左人。我知道我應該上前質問佢，不過唔知點解我其實唔多想知佢地頭先搞過啲咩，我連小小妒忌嘅感覺都無。相反我好有興趣知道阿油去到呢個moment，佢有無一絲後悔，又或者佢會唔會因為一無所有而想玩餐勁。Sam姐喺其他人口中粗略知道左咩事之後，就入左Kate姐間房，睇黎佢應該都係準備打返總公司話要炒左阿油。而我呢個時候就打左畀莊神同佢講左頭先發生左咩事，佢聽到之後相當興奮，話陣間會上黎現場親自睇下。阿油可能都預左自己一定畀人炒硬，佢突然企左起身，開始逐一向所有人開火。佢首先行左去正喺度大聲抱怨緊阿油搞到佢全身濕晒嘅Valarie話：「收嗲啦八婆，成個公司心腸最惡毒就係你。你估我地唔知，你為左上位咩衰嘢都做得出架啦，今次畀水淋你咪算係咁囉，你呢啲人應該畀屎畀尿淋就啱啦。我而家都唔怕同你講，我地全公司都知道你件鬼佬係無錢架，你真係cheap過啲賓賓呀，佢地起碼都有鬼佬養呀，你要養返個鬼佬，人地養鬼仔你就養鬼佬。」之後佢轉向呆左嘅Judy話：「仲有你呀八婆，你都唔係好人黎架啦，日日打扮到鬼咁姣，我知呀，你根本係想引啲仔黎溝你咋嘛。你條八婆嘅存在意義就係畀男人搞，你根本都唔當自己係人，我地喺背後都一樣唔當你係人，我地當你條八婆係公廁咋。等你仲成日以為自己係上菜，我平時望多你兩眼你就黑晒面，食蕉啦你。」 全場人都唔敢出聲，除左我喺度不斷大笑，我其實真係想忍笑營造一下緊張氣氛，但我一見到阿油果幅激動樣，就不爭氣地笑左出黎。佢之後望左阿畸一眼，正當我都奇怪阿油同佢無仇無怨，佢究竟可以鬧咩呢，點知阿油只係冷冷地講左一句：「挑，我到而家都唔知你係乜水，你係咪入錯公司架其實，行開行開，唔好阻住我油哥發火呀。」聽到呢句之後，我笑到更加大聲，Daisy走埋黎喺我耳邊想叫我收歛少少，但我無理佢，我繼續好似睇緊笑片咁放聲大笑。呢個時候，Evans行左埋阿油度好似想阻止佢再講嘢咁，點知阿油好大力咁將Evans推開，之後惡狠狠咁話：「你死開啦二世祖，我全間公司最憎就係你啦。得啦知你又靚仔又有錢讀書又多啦，你咁有錢仲學咩人返工姐，間公司遲早都係你架啦。我最頂唔順就係你成日都扮晒好人咁，挑呢個年代仲邊有二世祖好似你咁成日都企喺道德最高地扮聖人架，你而家又即刻撲出黎扮晒正義使者咁啦，你收皮啦，成日扮好人你自己唔作嘔，我見到你都作嘔啦。你死開啦契弟，睇死你咪又係扮好人黎精神自慰。」阿輝畀阿油嘅霸氣震懾住，又可能係佢濕完身後畀冷氣吹覺得涷，我見佢成個身都震晒，不過當阿油望住阿輝，可能佢地兩個都係敗家犬，本住係同類，阿油無鬧到阿輝。我見狀就話：「喂阿油你有無搞錯呀，厚此薄彼喎你，無理由放過阿輝架。仲有我呢，幾時輪到鬧我呀，我而家排緊幾號籌先，我好心急呀。」呢個時候Sam姐喺房度行出黎，佢睇黎都聽到阿油喺出面大駡在場人士，佢可能唔想再刺激阿油，所以佢好平靜地同阿油講：「唔好再嘈啦，睇你嘅表現你應該都好明白我一定唔會畀你留喺度架啦。不過平時你工作表現到如果你肯自己辭職，我就唔會追究今日發生嘅所有事，你整濕左嘅嘢我都唔會叫你賠錢，咁樣已經係我最大讓步架啦。」 呢個時候突然有一把聲話：「Sam呀，而家要請個信得過嘅IT人都唔係話咁易架，而且佢又知道公司咁多嘢，你唔怕佢周圍同人講咩？」莊神應該一接到我電話就趕到黎，而見佢喺呢個「中狀元救老圖，時間啱啱好」嘅時間行出黎，我就知佢一定已經黎左一陣，等住喺呢一刻出黎救阿油。Sam姐見到係莊神親自出馬，佢都唔敢再講啲咩，佢只係好恭敬咁問：「莊先生，咁你覺得應該點處置呢個同事好呢？佢無端端返返下工拎個打火機出黎，又整濕晒公司啲嘢……」「佢拎打火機出黎燒嘢咋嘛，又唔係燒人，如果有同事生日，佢拎個打火機點蠟燭，唔通你又炒左佢咩。至於啲嘢濕晒抹返乾囉，壞左咪拎去整囉。呢啲都係意外黎架姐，最多我親自畀錢賠啦。」阿油估唔到莊神會突然出現留住佢，佢頭先仲豁出去鬧晒全場人士，所以佢一時間都唔知點反應好，佢仲有啲尷尬。我即刻出聲話：「猶咩豫呀，高層都出聲留你一條賤命，你仲扮咩上菜姐，你仲唔講多謝。」莊神揮手阻止阿油講落去，佢只係徑自好瀟晒咁行出公司門口，我望到喺佢走果陣，Miki向莊神做左個口型同佢講多謝，而莊神亦都有點一點頭。