今日我開始左對公司啲同事進行復仇大計: 第七十六節

阿油喺經過尋日霸氣鬧爆全場，但又唔洗畀人炒之後，我感覺到佢喺某程度上係變左，不過佢當時無可能從一個毒男一下子銳變到意氣風發咁啦。但係，佢的確喺有改變到少少。例如，平時佢返工果陣都係通常都唔會同人打招呼，只會好似一隻老鼠咁樣自己靜靜地死返埋個位；但今日佢返工果陣，雖然佢依舊係無同任何人打招呼，但相反，佢就喺差唔多遲到嘅時候先大搖大擺咁返黎，而且當時佢手上左有個早餐喺度，佢就好似用行動去同大家講：「連Sam姐都炒我唔到，你班契弟恨唔到咁多架啦，吹咩。」而平時佢對住Miki經常都係一臉死狗模樣，好似成日都怕激嬲Miki咁。但自從公開被拒愛，再加上佢尋日當眾燒合照之後，佢好明白佢同Miki之間已經係無可能，因愛成恨嘅佢可以話將反轉豬肚就係屎呢七個字完美演繹。當Miki因為唔小心整跌左阿油枱面嘅膠紙座嘅時候，其實如果話係Miki唔小心就好似將個責任放左喺佢身上，因為正確來說係因為阿油哥將枱亂過亂葬岡，所以其他人行過都經常會中伏，不過anyway，總之係因為Miki整跌左阿油個爛鬼膠紙座，阿油就即刻變臉當眾發圍，佢起身指住Miki大鬧：「你係咪仲嫌玩我玩得唔夠勁，而家連我個膠紙座都唔肯放過呀。唉如果你係就一次過啦，呢啲仲有啲筆筒呀folder呀，你不如一次過掃晒落地踩爛晒佢地啦，反正係平時都係咁踐踏我果顆破碎嘅心同尊嚴架啦，唔爭在啦，不如你拎起埋呢支螺絲批插死我啦，我個心都死左架啦。」呢個時候我當然忍唔住插咀話：」喂螺絲批隊唔死你喎阿油，我不同落去買定把生果刀放喺你枱面啦，就算Miki唔插死你，都方便你自己割脈呀嘛。」可惜阿油到左而家依然唔會對我發火，唔知係佢仲以為我會賣毒男去中東，定佢將我同輝當埋係佢同類呀，總之阿油除左成日當眾怪罪Miki玩弄佢感情之外，佢都係只會各Evan、Judy同Valarie發火。

 

由於尋日啲電腦差唔多全部報銷，而莊神亦都好慷慨咁即刻幫全公司換過晒新機之後。作為始作俑者，同本身IT專員嘅阿油。照理應該盡快set好晒啲新機，但阿油自從無被人炒之後，佢好似變得越黎越放肆。當Judy因為上唔到網，死死地氣要向阿油求救之後，阿油竟然變得大膽起黎，反過黎質問Judy話：「Judy你咁趕住上網做咩，你部blackberry都收到email嘅喎，如果你係上喺工作時間上Facebook或者上去果啲友緣人識男仔的話，經據公司規定我有權block左你唔畀你上果啲網架喎。你精嘅話就唔好再催我，如果唔係我block到你咩網都上唔到，等你好似喺大陸上緊網架。」Judy雖然係好嬲，不過奈何阿油講嘅嘢又好似係揸正黎做，都可以話係不無道理，所以佢都只可以敢怒不敢言。阿油作為一個死毒男，佢連反面反得陰濕過人，我真係諗唔到佢會用剝奪人上網嘅自由黎滿足權力慾。我有理由相信，呢啲死毒男就算有朝一日做到forum嘅CEO，睇死佢都會亂咁bam人。阿油唔只係一個毒男，佢仲足實地呈現將佢體內嘅中國人DNA，佢不單止反轉豬肚就係屎，而且只要有小小權力都會用黎剝削人地嘅自由，我雖然從來都無將阿油視作一個威脅，不過佢呢啲小人性格有時都真係幾令我心寒。而阿輝自從見到阿油都起黎反抗之後，連佢都好似被感染到，佢好似都不甘再做地底泥，所以當Judy被阿油公開欺凌之後，佢都即時加把咀話：「係啦，之前有啲人扮虛偽咁指責我返工時間上叫雞網睇女，挑，果啲人自己咪又係上網做免費雞等男人去搵佢。阿油今次我撐硬你呀，一於block晒全公司啲電腦囉。我最多未放左工先上網搵囡囡，我無所謂呀，最緊要全公司都一樣返工唔好做私事呀。」我返工好多時都要上網調劑下，如果真係畀佢地兩條死廢柴令到我地公司被困喺網絡長城之中，我一定會悶死。所以呢個時候我忍唔住出聲指責佢地兩個話：「你兩隻畜牲同我收嗲啦，我呢啲熱愛自由嘅人一定同你地反抗到底呀。你地試下亂黎呀，我一定同你地死過呀。」由於阿油以為我真係人口販子，阿輝又知我係莊神愛將，所以我一出聲之後佢地兩個即將收皮。

 

Daisy今日迫我同佢出去食晏，當時我地來回都要前後腳啦。成餐飯佢都好似預備定我會問佢同Evans尋日去左邊，但我又故意唔去問。其實我真係唔多想知佢地發生左咩事，唔係因為我想逃避現實，而係我真係唔多在意。而Daisy又好似有啲怪責我唔連問都唔問，好似毫不關心佢咁，所以成餐飯我地都無乜出過聲，都只係默默咁去食呢餐飯咁。我其實留意到佢喺食飯期間不斷有人whatsapp佢，而佢亦都三番四次故意喺我面前覆人whatsapp，好似想試探我幾時會出聲。不過當時我已經將心思放左去揣摩尋日Miki講嘅嘢，咩叫我唔好阻佢又乜又物咁。我始終覺得Miki唔係一個無矢放的嘅人，佢咁講得，一定係有佢嘅原因。不過奈何我始終參透唔到佢呢番說話有咩深意。就係咁，我同Daisy嘅距離由呢餐飯開始，將會拉得越黎越遠。