今日我開始左對公司啲同事進行復仇大計: 第七十七節
「唔好話我唔提你，時間無多架啦，你再唔諗下計就玩完架啦。」喺我面前，莊神一路咬著雪茄一路輕描淡寫咁同我講，的確結果係點都好其實都對佢無咩影響。佢從來在意嘅，就只係過程有無趣。「你夜媽媽叫我黎觀塘搵你？唔係為左同我講阿媽係女人掛？」「唔洗咁心急喎小畜牲，逐樣逐樣黎。首先我想問你做咩果晚喺ball度不辭而別，你有無尊重過我呢個師父架？」我搖搖頭話：「你又黎啦，明知我答案係咩都仲要問，師父你係咪已經開始腦退化啦。不過果晚我走係因為我撞到我上次同你提過，好有潛質果個小妹妹呀。」佢即刻好激動咁問我：「你做咩唔畀我見佢呀畜牲。」我心入面嘅答案係，如果畀阿莊神見左，容乜易又多個無知少女成為呢隻色途老馬嘅甜品呀，不過我口果句係：「咁你老婆呀，你啲生意partner呀商界朋友呀都喺晒度，唔係咁好意思拉走你嘅。況且我地之後去啲地方唔啱你架師父，好多細蚊仔迫埋一齊架，有啲咩事要走人，我驚你畀人撞親條腰骨頂唔到呀，你睇我幾有你心呀師父。」莊神無理我講啲咩，佢好心急咁打左畀Robin話：「喂你快啲揸架車過黎，我陣間有撻地方同條畜牲去呀。」我喺隔離一臉不解咁問：「咩呀？我地夜媽媽仲去邊呀？」莊神好緊張咁話：「我唔理你呀，你而家快啲打畀果個妹妹仔，呢啲咁有趣嘅人你點可以收埋呀，拿拿臨約佢出黎啦。」「下？人地仲係小妹妹黎，你夜媽媽叫人出黎見我地兩個麻甩佬？師父你有無諗清楚呀？」「你慌而家啲小朋友會早訓咩，佢地平時自己出去玩都唔止呢個時間啦下話。況且有我呢啲喺社會有頭有面嘅人睇實佢，佢父母應該放心先啱。唔好講咁多廢話啦，我地快啲起程啦。」其實我認為，正正係因為社會充斥住莊神呢類人，啲家長先會咁唔放心囉。我本身都唔知阿秀住邊，不過上次喺同佢喺旺角樓上酒吧走左之後，我送佢返屋企，所以我而家連佢住邊棟樓咩室都知道左，我知我阻唔到莊神，我唯有帶佢去啦。
喺車上面Robin細細聲問坐喺佢隔離嘅我：「究竟你又喺邊度搵左啲咩人返黎，搞到莊生咁興奮咁？係咪女仔黎？」我壓低把聲答佢：「喂小姐你唔好講到我好似係扯皮條咁喎，我唔係話介意做扯皮條，只不過做扯皮條係有錢收架，但我無收過錢好似做義工咁。不過你放心啦，雖然果個係女仔，不過都仲係一個中學都未畢業嘅小妹妹黎，而且佢係正經人家黎。我知你想講咩，你想話即係唔似得我個妹咁生性放蕩呀嘛。」Robin努力忍笑咁話：「拿唔係我講架，係你自己講架咋。」我喺倒後鏡度買住坐喺後座嘅莊生，佢好入神咁睇緊個美市走向，我識佢咁耐都係第一次見佢做正經嘢。Robin好似留意到我神色有異，所以同我講：「你唔好睇莊生平時成日玩世不恭咁，但當佢認真做嘢果陣，你就會明白佢點解搵到咁多錢，佢嘅分析力真係世間少有架。」Robin不愧為莊神嘅頭號fan屎，咩世間少有真係誇張。不過我諗莊神有錢得黎又咁鍾意花時間做埋啲無聊嘢，就可能真係世間少有啦。我都唔明點解佢唔可以好似普通有錢人咁玩下名錶呀，飲下靚酒度日算，係要搞埋啲咩人類行為觀察者，真係痴線。唔經唔覺，我地就到左阿秀住嘅果條屋村，聽阿秀講佢由細到大都係喺公屋成長，父母又喺附近開鋪，所以佢可以話係一個不折不扣嘅草根少女。由於我先前已經whatsapp左同阿秀講莊神會殺到黎，所以佢一早已經企左喺停車處度等我地。莊神一向都唔係果啲會介意人出身嘅人，佢眼中只有兩類人，就係有趣同唔有趣。佢一落車就走去同阿秀握手，阿秀畀佢呢個舉動嚇到手都震埋。莊神第一句就話：「阿秀妹妹下話？我叫阿John，我聽過好多你嘅嘢，放心我無惡意嘅，相反你可以當我係獎學金，只要你喺我門下肯努力學嘢，我可以經濟援助你，等你可以放心上大學。」我忍唔住插咀道：「嘩師父，你連學生資助辦事處果份都撈埋？唔爭在你做埋社署，向我發放埋綜援，再唔係你可以做埋房署畀屋我住架。」
我真係無諗過，莊神會就咁殺上阿秀屋企度。剛剛收鋪返黎嘅阿秀雙親，一開始見到我地都呆左，佢爸爸仲好激動以為阿秀做錯左啲咩事惹麻煩上門。不過當莊神唔知喺邊度拎左啲參茸海味出黎之後，佢地態度就180度轉變，笑得相當開心。不過莊神唔知係有意定無意，佢無表明過來意。而阿秀嘅阿媽好快就自作聰明地將我理解為搞大左佢個女個肚嘅廢柴富二代，莊神就係黎幫我補鑊嘅老豆。佢一黎就笑晒口咁話：「你地都見啦，我地湊大幾個仔女，好辛苦架，特別係阿秀係大女，我地真係重點養育佢架。不過唔緊要啦，女生外向，佢始終都要嫁人架啦。你地後生仔情投意合就得架啦，不過喺禮金方面我地唔多唔少都要收返啲。」阿秀想開口解釋，不過畀我阻止左。莊神二話不說地拎左張支票出黎，我雖然睇唔清楚價碼係幾多，不過當阿秀個老母收到之後，佢難掩笑意，而阿秀老豆望到之後都立刻點頭。莊神呢個時候先講話：「如果兩位都同意嘅話，你地嘅千金由今日開始就係我嘅學生，而佢學成之後都會係我嘅僱員黎。你地放心啦，我一定會將佢培育成才。」講完之後，佢就拉走左阿秀，剩低左一臉驚訝，呆左望住我嘅阿秀父母。我呢個時候先話：「唔係我誇口呀，如果我做你地女婿嘅話，你地就會知道咩係家門不幸架啦，而家你地應該感恩先啱。」