今日我開始左對公司啲同事進行復仇大計: 第八十一節
我鼓起勇氣問Daisy，點解佢要慫恿Evans去篤Miki出黎，點知換黎嘅係佢淚流滿面，力竭聲嘶地反過黎指責我話：「我只不過係跟住你嘅意思去做姐，再者Miki之前都再三請求我要喺呢件事上幫佢手。點解反過來會係我變左衰人，你根本剩係關心Miki，既然你無信過我，亦都唔關心我嘅感受，不如我地分手啦。」我分唔清佢究竟係出於幫我呀，定係因為妒忌Miki而去做呢件事，我亦都無打算向Miki求證佢係咪真係搵過Daisy幫手，既然事已至此，每個人都求仁得仁，出發點係咩其實都唔太重要。而我呢一刻面對嘅問題，就係決定挽唔挽留提出分手嘅Daisy，我唔係唔鍾意佢，不過一諗起今後，我都唔會再信任佢，我就決定畀佢離開。我一直任佢鬧我，鬧我唔緊張佢呀，唔關心佢呀，甚至係指責我根本無鍾意過佢，我一直無還過半句口，直至佢鬧到攰，唔理我離開左，我都無出過半句聲。我拎左部電話出黎，whatapps話畀Evans聽，機會黎啦飛雲，而家Daisy好唔開心呀，佢要乘虛而入而家係一個好好嘅機會啦。Evans之後追問我同Daisy究竟發生左咩事，但我只係話畀佢知不要問只要信，Evans都算係個好仔黎，而且而家佢又肯上進做返個人，咪符合晒Daisy想要嘅要求囉，佢地兩個其實好應該喺埋一齊呀我覺得，咪當我提早送份升職禮物畀阿Evans賀下佢，連女朋友都送埋，我呢個朋友算唔話得啦掛。一念及此我又喺度諗，我送左份咁厚禮畀Evans，直頭連佢老竇都無對佢咁好啦，我係咪應該問佢拎返份回禮呢？不過到左呢一刻，我根本唔知自己仲有咩想要，我一直搞咁多嘢都係唔想畀班八婆上位，而畀我嘅兄弟上位姐，我而家都目的已達啦，我唔係應該開心架咩？不過一諗起前途未明，衰啲講句直頭係生死未卜嘅Miki，我就笑唔到出黎。我相信有莊神喺度，佢唔會畀Miki要坐監，但係佢為左成全自己愛嘅人不惜行到呢步，仲要之後佢都會畀佢最愛嘅人當係犯，其實值唔值得呢？
呢個時候，Valarie打電話黎，我一聽電話就喊晒咁話：「我求你畀返個阿婆我啦，我已經搵晒九龍西，港島西，新界西嘅老人院都搵唔到佢。」係喎，仲有佢個阿婆喎，我忍唔住笑笑口答佢話：「你份人咁西，我以為你已經搵到佢一家團聚，不過剩係掛住向西邊搵，你有無諗過佢可能喺西貢或者西灣河咁呢？」佢聽到我咁答之後，好緊張咁話：「西貢，你地唔會收埋佢喺越南個西貢掛？」我無佢咁好戲，講左句：「你上google map慢慢開個street view搵下佢啦，我無收埋過佢，我Q知佢喺邊咩。」講完就忍唔住收左佢線，我其實都唔知Taylor幾時先會玩完佢阿婆，我亦都無乜興趣再理佢嘅死活。我而家唯一想知嘅就係Miki嘅下落，其實我呢幾日都有不斷去搵佢，不過偏尋不獲。其實我隱約地覺得係莊神幫助Miki匿埋左，而且我亦都肯定係莊神專登要同我作對，唔畀我搵到Miki。不過就算知道Miki至小而家安然無恙，我都忍唔住擔心同著急。既然搵極都搵唔到，我唯有返去自己屋企度再作打算。點知我一返到去屋企，就見到莊神坐左喺張梳化度，而我個妹亦好親熱地餵緊佢食提子。佢地見到我不單無感到尷尬，而且莊神仲示意叫我行埋去。不過由於我一見到佢呢條死老嘢就無名火起，我無望向佢，問我個妹話：「同你做左咁多年兄妹都唔知你咁有善心，會去老人院做義工，而且仲見佢行將就木，帶返黎我地屋企畀佢感受下家庭溫暖。不過如果佢就黎唔得你就好拿拿臨帶佢去返醫院畀佢善終啦，我唔想有人死喺度呀，好影響樓價架嘛。」莊神聽到我咁講不單唔嬲，仲哈哈大笑咁話：「你都就黎三十歲架啦，仲好似個小朋友咁，我知你嬲我一直將你蒙在鼓裡呀嘛。」我忍唔住反駁話：「阿師父，即係任何人話我幼稚都得，不過由你把口講真係未免太諷刺啦掛，唔好話我就黎三十歲呀，你就黎死都仲係咁幼稚啦。」莊神依然笑容滿面，佢好從容咁話：「不過不同在於我喺三十歲時雖然幼稚，不過都已經叫有啲成就呀，唔似你咁仲係一事無成。不過我今日上黎唔係要教訓你，反而係要讚下你。」
我其實真係無心情同佢糾纏落去，我冷冷地同佢講：「你上黎讚我？多謝你呀，真係辛苦你啦。既然咁辛苦你，不如你早啲返去休息啦，你太夜返去老人院，一陣嘈親其他院友呀。」佢睇黎今日心情真係非常好，我無論點鬧佢佢都係笑笑口，而我個妹亦一直無出聲，只係一臉陶醉地服侍佢。佢喺飲左啖我妹手上嘅不知名cocktail之後，同我講話：「唔洗我讚唔緊要呀，不過我其實都有獎賞架，你一直咁努力去搞咁多嘢，去到呢一刻都算係將Evans推左上位，咁我都叫完成左對佢老竇嘅承諾呀。而且最近又搵到個阿秀黎娛樂我，你呢個徒弟都算係合格架啦。你放心啦，我唔會待薄你架喎。」「唔需要同我講咁多廢話啦師父，你都知我喺呢一刻剩係關心一件事。」莊神故作無知咁話：「我點知你而家關心咩事，而且你又點知我會有答案呢？」「唔好同我黎呢一套啦，Miki而家究竟點？」莊神哈哈大笑，而我個妹亦喺一旁陪笑，我要好努力控制自己，先忍到唔走上前打佢一身。佢邊笑邊話：「做錯嘢嘅人，就梗係受緊懲罰啦，不過我又唔係警察，又唔係法官，我真係答唔到你而家點，或者之後會點。」睇黎莊神係唔打算畀答案我，雖然佢把口係咁講，不過我知道佢點會睇住Miki唔會畀佢有事，但唔知點解我心中暗地覺得，Miki佢唔會想再見到我，佢會一直匿埋，呢一世都唔畀我見到。