今日我開始左對公司啲同事進行復仇大計: 第八十二節

其實我都而家都唔明，點解啲人每次有咩不願意嘅事，都鍾意借酒消愁。我認因為Miki生死未明，我的確感到好困擾，但我都唔打算而飲酒黎麻醉自己。相反，我決定將自己嘅憂鬱，發洩喺他人身上。之前喺認識阿愁嘅時候，我無意中得知果件唔知叫咩名嘅物體阿畸，因為暗戀果個快餐店男經理，而成日走去食早餐。雖然阿畸聲稱自己係因為想睇到大結局而留喺公司，但我相信就算到左而家大局已定啦，佢都係會賴死唔走，因為佢仲未溝到果條仔。喺今日個朝早，我決定做一場即興短劇，黎將呢一段未萌芽嘅愛情抹殺。我之前專登一晚無訓，雖然唔多唔少係因為我擔心Miki所以訓得唔好，但我要營造到我好似好憔悴，就黎精神崩潰咁。經過一夜無眠，我雙眼滿佈血絲地行左入老麥，我感覺到身邊嘅人都應該注意到我嘅異樣，所以都不自覺地行開。我一行到埋counter，就無視周圍嘅人大聲講：「乜你地呢度除左有賣雞之外，仲會將人地老婆當係雞架咩？」幾個貌似仲讀緊中學，黎打暑期工賺外快嘅細蚊仔，見到我咁情緒激動，顯得不知所措，佢地唯有請佢地炸間暑餅嘅經理埋黎，果位令阿畸心動嘅靚仔好有禮貌咁問我：「先生我有咩幫到你呀？」我好大聲咁話：「我點敢仲要你幫呀，你都已經幫我搞到我老婆欲仙欲死，唔識返屋企啦。你幫我老婆咁多，我仲點好意思要你幫呀？我得條jer架咋，你唔係連jer都識幫我含呀下？」佢當然一臉大惑不解地問我：「先生我諗你誤會左啦，我係教徒黎，唔會進行婚前性行為，更何況我都無女朋友……」「嘩你為左甩身，當住面扮青頭仔？你都算高手啦，唔怪得我女朋友畀你呃得咁透啦……」隔離一個收銀妹妹話：「先生，你頭先又話係老婆，點解而家又係女朋友。你如果再喺度搞事，我會報警架。」聽到佢篤爆我，我其實都差啲忍唔住笑，不過我都係要繼續發惡話：「阿女你咁有正義感又咁有偵探頭腦，去參加少年警訊仲好啦，黎做老麥把鬼咩。」個女仔好細聲話：「痴線，做少年警訊無錢架。」

 

果位一臉驚惶嘅經理，把聲都震埋咁話：「先生，你信唔信都好，我真係無搞過你太太，我而家連女朋友都無。後面仲有其他客人架，不如你而家走先，搞清楚先再返黎啦。」其實當時仲係清晨五點，後面得一個阿伯同阿婆喺度，個阿伯好開心咁話：「唔阻呀，我可以等下，你地不如搞清楚件事先啦，我睇埋你地解決件事先食早餐都唔遲，反正我陣間都無嘢做。」而另外一個阿婆都拍晒手掌咁讚好，果位經理見到勢色唔對，再哀求我話：「你信我啦，我無搞過你老婆呀，我咁大個仔都剩係同過初戀情人上床咋，我信左教之後都無再同人上床啦，點會搞過你老婆姐。你會唔會係認錯另一個經理呀，另一個都同我一樣好高架，不過可能佢有時有戴眼鏡，有時又無所以你唔認得佢姐。」我好惡咁大聲喝佢話：「你係咪當我傻架，你唔好同我黎呢一套啦，我肯定係你搞我老婆架啦。你知唔知我係邊個呀，如果你知道我係邊個，你一定會後悔當日點解要同我老婆性交呀。我同你講，我癲起上黎，我都唔知自己會做咩架。」果位經理已經被我嚇到差啲想喊咁，佢嘅聲音開始哽咽起黎話：「咁我真係無做過呀嘛，我真係好耐都無扑過嘢呀，我都想扑嘢呀先生，不過教會啲牧師叫我唔好扑嘢，你估我真係唔想扑嘢咩，我不知幾想，我連發夢都想呀，我好想扑嘢呀，但我又真係好耐都無扑過啦。我忍左好耐，我連頭先見到企喺果邊個中學妹烏低身炸暑條，個pat形現晒出黎果陣都硬晒呀，大家係男人你應該都明啦，我真係無呃你呀先生，我好耐無扑過嘢呀，早排阿高皓正仲連飛機都叫我地唔好打，我就黎谷到爆啦。」見到佢呢番情急下的自白，隔離果位咁有正義感嘅妹妹，突然聽到自己竟然係靚仔經理嘅發情對象時，即刻面色蒼白。而果位經理亦都好似想喊咁，我見到此情此境，本身竟然鬱結同愁緒之心，不禁豁然開朗起黎，睇黎都係時候要完左呢一個趣劇。

 

我喺電話度搵左我之前偷影阿畸果幅相出黎，遞畀經理睇，之後問佢：「你答我，你真係無同個呢個女人搞嘢？」佢望左好耐，之後大叫出黎話：「我認得佢，呢個女人日日黎買早餐架嘛，仲要一個人分開幾次買幾個餐，不過我除左喺serve佢果陣同佢講過嘢之外，我地之間無其他交流架啦。」果件不知名生物真係慘，估不到就算有人認得佢都好，都係因為佢嘅怪異行為。我好努力地忍住笑咁話：「咁好呀，你地其他人答我，我老婆係咪成日剩係黎買早餐，同呢個谷精靚仔係咪真係無路。」果位得知自己係經理發情對象後，嚇到應該唔敢再去炸薯條嘅小妹妹聲細細聲話：「我唔知呀，不過佢又真係成日黎買嘢食，同成日都望住阿經理，不過我而家都唔敢講經理會做出啲咩呀，我以為佢係好人黎，又幾靚仔，但估唔到佢成日都敢望我。」個經理好驚咁話：「我雖然係會有性慾，不過先生係老婆咁樣衰……唔係，我意思係我對你老婆呢type無興趣呀。我真係無同佢講過嘢架，先生你信我啦。」我聽完佢呢個答案之後，就好滿意地轉身走左，我心情的確開朗左，而且我亦都好期待當阿畸再黎食野果陣，老麥啲人會點對佢呢。