今日我開始左對公司啲同事進行復仇大計: 第八十三節
今日返到公司，Kate姐終於離開左。而佢原本間房，亦都有人上黎進行簡單嘅佈置，預備畀Evans搬入去坐。輸家Valarie據聞已準備結婚為由，突然向公司請左個大假。Miki同Evans嘅位，據聞會好快請新人黎頂替。不過公司一時間少左兩個人，的確係靜左好多，而且感覺上我亦覺得眼前嘅境象好陌生，而且亦都有啲悲涼。雖然我嘅目的已達，我應該心滿意足至係，但唔知點解，我喺呢個環境逗留多一分鐘，我就覺得我人生虛耗多一分鐘。由於經過之前咁多事，再加上我同Daisy已經分手，周圍嘅人再次同我形同陌路，我亦都唔多想同佢地講嘢。原本因為終於受到賞識而意氣風發左一下子嘅阿油，亦都因為Miki搞成咁，而變回一個沉默嘅毒男。而阿輝由於無人陪佢一齊癲幫佢壯膽，所以佢喺一眾女同事面前又變回一隻死狗。成朝我都係自己一個坐喺個位度沉思，無同過任何人講嘢。我開始喺度思索我嘅去向，我嘅未來。我相信如果留喺度繼續賴死，我會因為有Evans照住而扶搖直上，但我如果係恨上位嘅話，我一早自己上左位啦，仲洗益Evans呢條二世祖咩。但如果唔留喺度，我又可以做啲咩呢？我有諗過向莊神尋求意見，但我又唔想畀佢得戚覺得我要求教佢。但我呢一刻又真係好迷茫，根本唔知做啲乜好。由於百無了賴，我拎返我果本久違了嘅小器簿出黎翻閱，我發覺關於公司入面嘅人和事，對呢一刻嘅我已經唔重要。如果我再留喺度，我嘅小器簿都唔會再有咩嘢好寫，我突然覺得好驚，我好怕有一我連小器簿都唔會再用到，我嘅人生亦會變得如其他人一般無聊。正當我望住本小器簿驚到手都震埋嘅時候，我腦海中突然閃過一個念頭，我突然地發覺，我一直都係捉到鹿唔識脫角。小器薄呢個劃時代偉大慨念，都係時候要畀世人認識到。雖然呢一刻我仲未有咩idea點進行，不過我起碼清楚知道，我嘅未來仲有希望，仲會有其他可能性。
Evans一朝早都係忙住指點人去佈置佢間房，而Daisy就好似女主人咁喺隔離畀意見。見到此情此景，我不禁聯想到佢地就好似佈置緊新房咁，如果佢地照咁樣發展落去，其實都幾好呀。呢個時候，久遠了嘅Sam姐突然又喺公司出現，唔講都唔記得佢星期一係有習慣會上黎開下會，不過咁多人都唔喺度，仲開乜鬼嘢會呀。佢一上到黎，就用眼神示意叫我跟佢入會議室，不過我由於無乜心情，所以故作睇唔到唔理佢。佢過左一陣之後，死死地氣親自走埋黎請我入去傾下計。我初初都唔肯，到佢講埋唔該之後，我先跟佢入去。一入到去之後佢好緊張咁問我話：「Valarie果陣有我把柄喺手，你應承會幫我解決，而家Evans都升埋職啦，但你好似都無同我交代過，究竟件事搞成點呀？」搞成點？我根本就無左回事，嚴格黎講，我連Sam姐嘅存在都完全忘記左，更何況啲枝節嘢。不過我呢一刻已經豁左出去，我直接答佢話：「Sorry喎，我已經無左件事啦，乜我有應承過你咩？不過有都無用呀，因為呢我患左一個怪病叫信口開河病，醫生話暫時無藥醫架。你唔信我應承你下次我畀張醫生證明你睇呀。不過就正如我所講我有信口開河病，所以就算我而家應承左你，都未必會真係畀張醫生證明你睇架，係咪好神奇呢？」佢勃然大怒地拍枱話：「你唔好唔記得你一早寫定張辭職信架，你而家呃我，我一樣可以幫你畀封信去人事部。」我聳一聳肩，一臉不在乎地話：「你要公報私仇，我都吹你唔脹。不過又係嘅，如果唔係你一開始公私不分，你都唔會有把柄揸喺人地手啦。」佢見我喺度耍無賴，無晒我乎，頹然地坐下話：「而家你就目的已達，但我就成世都有把柄喺佢手，你就梗係唔care啦。」我突然靈機一觸，諗起同樣地Valarie都仲有把柄喺我手，佢個阿婆都而家都仲未搵得返。而我為左我光明嘅未來，我又的確需要啲錢去實現大計，一念及此，我知道我應該點做啦。我不禁對自己嘅聰明才智感到沾沾自喜，我望住Sam姐問佢話：「正所謂有錢洗得鬼推磨，睇你都知你咩都無，錢就大把架啦。而家香港同性婚姻又未合法，你都未洗擺酒之類架啦，只要你畀啲甜頭我，我保證幫你解決啦。我個病其實有得醫架，只要有錢嘅話，我就唔會信口開河架啦。」
你可以怪責我墜落，竟然去到要要脅人畀錢我。不過換個角度睇，呢個社會財富分佈咁不公，我呢啲咁有夢想又有承擔嘅年青人，想做啲嘢去貢獻社會都唔得，而Sam姐呢類老屎忽就正正係霸住晒啲社會資源。我而家都算係劫富濟貧呀，講真為成大業，手段呢啲嘢有時真係唔可以太講究嘅，我都叫做係自食其力呀。正當我準備聯絡Taylor準備叫佢配合我之時，Evans突然恰熟狗頭咁行埋黎，搭住我膊頭話：「你一直以黎咁幫助我，我而家終於可以大展拳腳，努力去貢獻社會啦都係多得你咋。」「係呀，無我你真係無今日架二世祖，咁你想點報答我呀，係咪而家即刻已身相許，想同我入廁所執返劑呀？咁好似係我益你而唔係你益我喎。」「唔係呀，我爸爸都好apperciate你嘅努力，佢話只要你一直幫我睇住我，佢都唔會待薄你。」果然薑是老的辣，阿uncle話咁快已經吩咐個仔，留住我做佢地兩父子嘅忠犬，呢啲咪高手囉。我不置可否地笑一笑，之後轉移話題反問佢：「你而家就威啦，事業愛情兩得意啦，睇頭先Daisy表情，你應該得米啦。巴閉啦而家，過黎向我示威咁話啦。」佢一聽到我咁講，即刻面都紅晒支支吾吾咁，我無理佢就轉身走左，睇黎佢地應該都真係可以好好發展落去啦。