我考慮左好耐,究竟應該幾時返去公司到拎返走自己啲嘢,同應唔應該同Evans作正式交代,但最後我都係決定逃避解釋,我唔想見到Evans呢個大男人對住我喊苦喊忽。所以我選擇,襯佢地收晒工無晒人嘅時候,先返去公司度執拾細軟。我由五點幾開始一直喺公司樓下等,因為我要確認Evans同Daisy走左之後,先返公司執嘢。直到差唔多七點,我終於見到Evans同Daisy一齊行出黎,雖然佢地仲未有啲咩親密舉動,但本人作為一名人類行為觀察者,單單從佢地散發出黎嘅氣場,我已經知道佢地發展應該尚算順利。我嘅不辭而別,應該會成為Daisy安慰Evans嘅契機,相信因為咁佢地嘅發展會更加瞬速。其實我都算係Evans嘅大恩人,位又幫佢上埋,女又幫佢鋪埋路,我開始喺度諗除左小器簿之外,我係咪應該開本人情簿,詳細記低自己幫過咩人,留待他日我有需要果陣好收返啲人情債。係目睹Evans同Daisy離開之後,我就去食個晚餐,諗住食完晚餐之後,公司應該咩人都走晒啦掛。點知喺我終於上到公司果陣,竟然有一個人仲未走。而果個人,就係正忙於對住Judy個杯瘋狂自瀆嘅文員輝。佢見到有人入黎果陣,即刻驚到跌左個杯落地,但當佢見到係我果陣,佢就執返起個杯繼續進行佢嘅大事,完全無因為我在場而停手。佢只係淡淡地講左句:「你見我而家忙緊架啦,你等我一陣先啦,我搞完再黎搵你。」我怕佢嘅體液陣間會淺到我身上,所以我立即返埋自己個位唔敢打擾佢。過左一兩分鐘之後,阿輝就一臉滿足行埋黎同我傾計,由於佢未洗手,所以我唔係太想同佢行得太近。不過阿輝好神態自若咁拉左張櫈坐埋黎,一啲都無對自己嘅行動感到羞恥,佢閒話家常咁問我:「點呀James哥,突然之間劈炮唔撈,係咪出面有咩好路數先。不過你又真係好神化嘅,推到你老友上左位之後,明明而家係你地世界架啦,但你又走黎辭職,係咪有咩好路數先,係就預埋我啦James哥,我實好好服侍你架喎。」

 

「服侍我?我知阿輝哥你喺手淫方面好有心得,不過呢啲粗重嘢我自己做返就ok架啦,你咁好手勢都係留返你自己嘆就ok啦。」「不過呢幾日公司真係靜過靈堂呀,你又唔喺度,Miki又唔喺度,Valarie又請埋假去搞婚禮。」「你有無去過靈堂架輝哥,靈堂一啲都唔靜架喎。不過出黎做嘢係咁人浮於事架啦,我唔係有好路數呀,不過近掛我悟左道,所以先唔想再留喺公司虛耕人生咋。」阿輝無再理我,同我虛應幾句就離開公司。我喺收拾自己啲嘢果陣,先發覺原來我都無乜放過咩私人嘢喺公司,我原本準備左個大紙箱去執嘢,點知我根本無乜嘢放入去。或者由始至終,我都無真正屬於過呢一度,我一早已經認定自己只係過客一名,留到Evans上左位先走,根本就已經遠超我預期。喺離開公司果陣,我以為自己會對呢度有一絲留戀,但去到呢一刻,我發覺我連對Valarie Judy佢地嘅恨意都消減左,我無後悔過不求回報地搞咁多嘢,我亦唔覺得自己有浪費過時間,不過我只係驚訝自己原來對呢間公司係無乜強烈嘅感覺。我一路打算喺同呢間公司道別之後,我就會正式開始我嘅小器簿生意,但Miki嘅突然離開,令我開始頓失動力咁。我諗喺開始任何嘢之前,我都應該要放自己一個假期去洗滌一下心靈先。自從我尋日喺莊神度不辭而別之後,阿秀就不斷地搵我,好似驚我會睇唔開去自殺咁,連Robin都有問我想唔想知Miki去左邊,要唔要搵佢。但我無回應過佢地,因為連我自己都唔知我係咪應該去搵Miki,而搵到佢之後又點呢?既然呢一刻我人生無晒方向,我就打算讓自己繼續迷失,我唔認為人一定要時時刻刻都有目標,既然人有權積極過活,我都有權消極地頹廢下先姐。

 

唔知點解,我行下行下就去返Miki屋企樓下,我明知佢唔會再出現,不過我都係忍唔住坐低左,呆呆地自己沉思。呢個時候,我發現喺不遠處有一個熟悉嘅人影坐左喺度,果個人就係阿油。雖然佢之前好似發左癲咁不斷針對Miki,但當Miki喺佢眼前消失之後,佢應該再次發覺自己最愛嘅依然係佢。佢見到我之後走埋黎問我:「你喺度做咩?」我唔係好想應佢,所以想起身離開,點知佢已經坐低左開始講:「我雖然同Miki有緣無份,不過都仲係會擔心佢安危,我黎係想知佢好唔好安姐,點知我黎左幾日都係見佢唔到。如果你知道佢嘅近況,可唔可以話畀我知等我了左件心事?」我見到阿油少數地咁認真問我,所以我亦都少有地認真答佢:「以我所知,佢應該唔喺香港架啦,不過我諗佢都算係安好嘅。」阿油聽到之後鬆左一口氣:「即係連你都溝唔到佢啦,好彩姐,你唔洗扮嘢啦,一睇就知你都係鍾意佢啦。我一直都喺度諗,我比你有才華,人品又好過你,我無理由會輸畀你姐,而家咪好囉,我地大家都輸晒。係呢,你辭左職有咩撈呀?係咪專心賣毒男去中東呀?不如預埋我一份啦,我講真架,我今時唔同往日啦,你睇下連莊生都搵我幫佢寫程式就知啦。」我忽發其想,如果我個小器系統,搵阿油幫我再寫過嘅話,係咪可以出APP賺錢呢?而家啲人抄人隻game出APP都可以賺幾百個,上晒報做成功人士架嘛。而家我自創喎,話唔定我就可以做香港Steve Jobs啦,諗到呢度,我又覺得我或者唔應該放假住。