今日我開始左對公司啲同事進行復仇大計: 第八十七節
我尋晚一向阿油提出不如合作搞APP賺錢，佢就立即將Miki嘅事拋諸腦後，好興奮咁多謝我，話我終於發現到佢嘅才能。其實我又點忍心同佢講，佢係我識嘅人之中，唯一可以算係精於電腦嘅人。我同阿油約左喺今日放工之後傾下，咁我晏晝做咩好呢？作為一個雙失仔，工又無女又無，了無牽掛做咩都得。因此我就襯機去左漫畫節度觀察一下人類，順便向其他程式發展商取經。去到會展門口，我發覺好多人大排長龍，正當我打算排隊之際，我發現到我身邊有個拎住相機嘅毒男，一臉自信地行左去另一個入口。而佢喺行去果個入口果陣，不時回頭用高高在上嘅眼神望向排緊隊嘅我地，面露鄙視。我好好奇佢究竟係咩身份，點解可以用另一個入口，唔通係因為佢年年都洗一萬幾千去買啲咸濕動畫女figure呀攬枕呀，令佢成為VIP？由於太有趣，我不禁跟住佢行，行行下我發現原來佢係使用傳媒入口入去，就更加好奇，究竟佢係屬於咩傳媒機構架呢？說時遲那時快，有一名保安行出黎攔住佢，代我問佢呢個咁有趣嘅問題。當佢被問及身份之時，佢冷笑左一聲，之後喺袋中拎左張卡片出黎話：「我就係網上人氣Blogger兼YouTuber樂少啦，你睇下我生得咁似余文樂都應該估到我身份啦，乜你唔上網架？」該名保安一臉為難：「但係我地要先登記左記者證，先生你有無記者證呀？」呢位我睇極都唔覺佢似余文樂嘅樂少頓時惱羞成怒，大喝一句：「我個樣就係記者證，你即係睇少我地網上media姐，我唔想同你呢啲咁低級嘅人交涉呀，你再唔行開，信唔信我影低你個樣放上我個blog呀啦，到時我果十幾萬fans一定唔會放過你呀。」呢個時候一位生得都頗為清秀嘅女子行左埋黎，示意叫保安哥哥行開，之後同阿樂少講：「唔好意思，我係大會公關，其實我地一向都好注重網上media架，我地大會今次都有請左幾位blogger同YouTuber入去，不過可能唔記得左請先生你姐。不過跟據我地規矩，我都要請先生你去排隊買飛入場。」
樂少估唔到對方完全唔畀面佢，就連廿蚊都唔肯蝕畀佢，而經佢剛才一鬧，場中好多人都望住佢。佢苦無下台階，唯有大吵大鬧，話一定會寫衰對方。不過果位PR姐姐眼尾都唔望下佢就行開左，我隱約聽到身邊人群有人叫囂話：「我成日上網都唔識你呢個咩樂少，學咩人話係blogger呀，二十蚊都唔畀，正一begger黎架。我頭先都拍左片架啦，樂少你等畀人起底啦。」喺身後嘅我倒抽一口涼氣，暗暗地講左句好彩，因為我見樂少自稱blogger果陣，我都有諗過拎我張人類行為觀察者卡片出黎，打算蒙混過關，好彩無姐，如果唔係就到我畀人起底啦。我見狀唯有都行返去，死死氣地排左成個鐘。到終於入場果陣，我發覺我身邊最多係兩類人，一班係悉心打扮嘅Cosplayer，另一班就係拎住部相機對佢地起勢咁影嘅龍友，反而話漫畫迷就幾乎絕跡。不過呢啲都唔係我感興趣嘅嘢，我特意喺會場行左一個圈，我發覺漫畫節真係同以前好唔同，而家多左好多遊戲公司同手機app開發商參展，當中以手機遊戲就最為巴閉。我忽發其想，喺研發小器簿APP之前，我係咪應該叫阿油寫隻game黎大賺一筆先呢？至於寫咩game其實都唔重要，我到時求其搵隻外國賣得嘅game，加入啲香港元素咪ok囉。正當我為著自己嘅聰明才智感到驕傲之際，我發覺我眼前有一個拎住部單反，一臉猥瑣嘅男人，正好努力地高抄緊一位打扮非常性感嘅cosplayer。而呢一個咁猥瑣嘅男人，正係我舊友相機基。我即時好大聲咁同佢打招呼：「嘩相機基你唔係為左影啲女仔對波同裙底，連份工都辭埋黎影呀下，你份人都幾狼死架喎。」果位Cosplayer聽到我咁講之後，即刻向相機基講左句粗口，之後就轉身跑開。相機基衝左埋黎掩住我把口話：「James哥你唔撚好亂講呀，一陣啲cosplayer以為我係變態佬，就會唔刻擺pose畀我影架啦。」我推開佢，之後笑笑口問佢：「咩以為你係變態佬呀，你根本就係變態佬。」
相機基拉左我去小食部，買左罐汽水孝敬我，等我唔好再笑佢之後，就跑開左繼續影啲性感少女。而我就拎左罐汽水，觀察場中人類。其實我真係無諗過，自己會辭左份工黎搞生意，我喺好似場中班小朋友咁大果陣，一直會認為自己大學畢業之後就會靠拎社會福利為生，而我更加估唔到嘅係我會搵左阿油黎做我嘅partner，唔知身在遠方嘅Miki，知道左會點呢？一諗起Miki，我就不禁感到有啲失落，我離開左會場，行左出去灣仔碼頭度，一路望海一路強忍淚水。呢個時候，阿油打左黎提醒我今晚要同佢共商大事，唔知點解聽到阿油呢條毒男，咁興奮地想要搶一番事業，我都覺得自己唔可以輸畀佢。我突然之間諗到，既然要寫隻game黎打響頭炮，就算話係參考外國大hit遊戲都好呀，我都起碼要搵多啲資金黎請多兩條友呀，就算請個啱啱畢業嘅友仔都要畀最低工資啦，我又唔想向莊神低頭，相信阿油都應該唔會識啲咩有錢人架啦，正當我又再次苦惱果陣，我望住我無乜幾個朋友嘅電話contact list中，見到Taylor個名。係喎，佢而家有咁多老細照住，應該都有啲錢，佢都畀人包得多，應該都想試下包返人轉頭，不如就搵Taylor黎包起我地啦。