今日我開始左對公司啲同事進行復仇大計: 第八十八節
「即係咁，我真係見係你先預你一份架咋，投資都話涉及風險呀，結婚都唔係話包生仔呀。但今次真係賺硬架喎，真係俗啲講句，畀埋位你上你都唔上就笨柒啦。」我努力地想說服Taylor入股我同阿油呢個寫APP大計。不過Taylor一臉懷疑地望住我話：「見係你James，我地一齊經歷左咁多嘢，我先老實講呀。我知道你係醒目仔，不過你本身做文員仔架咋喎，失業無嘢撈就走去學人創業。而且你仲拍住呢條毒男，佢雖然係叫做半個IT人，不過都係喺你公司度裝下Office，整下printer架姐下話。我唔係話潑你冷水呀James，不過你係咪諗清楚架啦。」我估唔到Taylor會一輪咀地指出咁多疑問，正當我諗緊點答佢之時，我身旁嘅阿油已經創住答：「Taylor哥，我第一次見你果陣，你咪又係普通狗公一隻，而家你已經成為軟飯王啦。你可以睇小James，不過你唔可以睇小我。我表面上雖然只係一個旁通IT support，不過你知唔知我用左幾多時間去鑽研寫程式呀。我敢講一句呀，我喺電腦方面嘅才能，係等同你喺對付女人方面嘅能力。」Taylor估唔到阿油呢條毒男，竟然咁自信滿滿地反駁佢，佢一時之後唔識反應，我即時補句：「拿Taylor，我地都叫患難之交呀，真心嘅，我搵你夾份唔係話想搵多個人一齊蝕。而係我見呢壇嘢真係賺硬，所以先想預埋你一份姐。不過話晒大家都曾經係戰友，我唔勉強你嘅，我都無得格硬塞錢落你袋架，你無興趣唔緊要架。」Taylor聽完我地咁講之後，依然都係一臉懷疑，好似唔太信我地會賺到錢咁。呢個時候阿油細細聲同我講話：「呢個乜鬼Taylor，本身都係死MK黎架啦，佢同我地唔同架James，唔好預佢啦。」我聽到佢咁講之後，忍唔住要辯護，不過唔係幫Taylor，而係幫我自己：「喂阿油哥咩唔同我地呀，我同你都唔同啦。你係死毒男，我係正常人，不過係我份人好唔歧視你之餘，仲賞識你畀你跟我搵食咋。你而家竟然調返轉去嫌人地，喂你而家只係叫做退左役唔做觀音兵姐，你就當正自己係做返正常人咁。」阿油即刻回復返怕事毒男本事，細細聲話：「Sorry囉。」
「James，我而家雖然叫做有啲收入，不過你都知做我呢行，啲收入好唔stable架啦。如果包我果啲女人果排家用少左，咁我份人工又少左，我而家真係搵定一舊錢，到經濟唔好果陣用架咋。我如果有好多閒錢，就真係會睇左你份上，就算到時舊錢蝕左都唔怕。好似其中一個包我嘅阿太，佢老公因為經濟差而畀人減人工，我又變相一齊減左人工。」估唔到Taylor作為一個食軟飯界嘅專業人士，都會受到大圍市道影響。呢個時候阿油忍唔住插咀話：「咪就係因為你剩係食軟飯，下下都受制於人，所以先叫你投資落我地度，自己做老細囉。你諗下啦阿Taylor，以我自己身邊一班打機朋友為例，就算經濟幾差都好，出黎做嘢果班都係一樣會洗咁多錢落打機度，最多咪返工食少餐。仲靠緊屋企養果啲更加唔洗講啦，就算佢地老豆老母畀人減人工，佢地一樣都會問老豆老母拎返咁多零用錢去玩架。如果我見勢色唔對，我都唔會同James佢癲啦，就係以我多年做宅男嘅經驗，我知道宅男嘅錢係最易搵。更何況而家都唔只老宅男會打機啦，根本而家係人都會拎住部手提電話打機，連街邊啲阿伯都轉左用iPad捉棋，師奶都識得上網打麻雀啦。」講到啲咩打機呀宅男心態呀，阿油真係expert黎，我忍唔住拍一拍阿油膊頭話：「我果然無搵錯人呀，估唔到你除左識寫下game上網hack入去人地webcam裝人換衫之外，你仲好似對marketing有啲見地呀。以一條死毒男黎講，你都算有啲用呀下。」阿油細細聲話：「其實我果陣有讀過下marketing架，不過由於班marketing同學個個都識social，得我一條毒男畀人排濟，我先走去讀電腦咋嘛。」估唔到阿油又有段咁嘅往事，不過身為一個毒男畀人排斥都係好正常，所以我同Taylor都無理到佢，我望住開始動搖嘅Taylor，決定繼續說服佢，令到佢肯夾埋一份為止，我同阿油講話：「得啦無人想知你以前幾慘呀，你快啲入正題，向Taylor講解一下我地頭炮想出一隻咩game啦。」
阿油一臉自信地拎左部手提電腦出黎，開始演示佢尋晚通宵製出黎嘅demo。不過由於個demo實在係太簡陋，我叫阿油都係收埋唔好拎出黎趕客，我決定都係由我自己講：「Taylor你記唔記得，曾經時興過隻game係上facebook做農夫，就連本身已經係小農嘅強國人都話要上網偷菜呀。」Taylor點頭話：「果陣經營農場嘅game呀嘛，不過好out架啦喎。」「Out唔緊要呀，好多嘢你只要重新包裝下，就會hit架啦。Bon Jovi啲歌夠out啦，有歌手幫佢填上中文詞之後，咪一樣hit返。」阿油細細聲話：「James你用錯例子呀，佢地係抄歌呀。」我拍枱鬧阿油話：「你收聲啦，我講緊吳國敬呀。不過就算係抄都唔緊要呀，我就係想帶出一個問題，就算我地抄人隻game都唔怕架，之後講句無抄過點認呀咪得囉。不過Taylor你唔好誤會呀，我地唔係抄人隻農場game呀，我同阿油只係借佢個慨念，黎做另一隻game。我講隻game名畀你知，你都會覺得勁，隻game暫名開心骨場，係咪好勁呢。」Taylor一臉驚訝地望住我，睇黎開心骨場呢個名實在係太勁，連Taylor呢啲見慣大場面嘅人都被嚇呆。