我相信喺交左Evans呢個朋友之後,我將會越黎越接近真相,Miki嘅真面目同佢一直以黎嘅目的將會好快揭盅。每次一幻想到Miki畀我踢爆之後果個驚訝萬分嘅樣,我就忍唔住想仰天長笑。我承認Miki不論喺外表以至行為談吐,都係一個好誘人嘅女人,相比Daisy,佢更加能勾起男人最原始嘅慾望,不過對我黎講,喺精神上挫敗佢遠比得到佢嘅肉體有趣。喺每次同Miki交手嘅時候,雖然大多數都係我佔下風,不過我無因為而氣餒。相反每次嘅失敗,只會令我更加期待我反敗為勝果一日。

 

今朝返到公司果陣,拎住早餐嘅我照常咁打算行去搵Daisy。但去到佢個位果陣我竟然發現佢唔喺度,呢個時候Miki喺暗處行出黎,對住稍微嚇左一驚嘅我講:「你唔洗搵啦,Daisy畀Kate姐欽點左,今朝返左總公司做嘢,而家得返我同你。」我聽到之後專登行埋去哄到好埋咁講:「咁你係咪打算陪我食早餐呀,你唔怕我食左你咩。」佢見我哄埋黎不但無避開,而且佢仲專登哄返埋我度,我呢一刻同佢之間嘅距離近到可以感受雙方嘅氣息,面對住呵氣如蘭嘅佢,大慨一般男人已經把持唔住,不過一心想同佢鬥智分高下嘅我,縱使我體佈嘅血液已經不爭氣地開始向下流,但我都絕對唔會就此認輸。喺雙方互相凝視左一陣之後,Miki甜笑道:「你唔怕呢一刻阿油撞入黎,佢又發癲咩?」「你好明顯喺有備以黎打算同我共商大事,心思細密嘅你點知唔預早洗開阿油呀,你一直咁努力咁喺阿油面前經營出純情少女嘅形象,我相信你唔會自毀長城。」Miki聽到之後好滿意咁笑左一笑,同時將自己嘅身體挨埋左我度,之後繼續問:「咁你唔怕我係講大話,Daisy其實只係行開左,好快會返返黎咩?」

我頭先之所以主動咁哄埋去,唔係因為想食佢豆腐,而係想引佢問呢句,我答佢:「Daisy同你比算係啲咩呀,你先係我朝思暮想果個,尋晚我一路諗住你,一路用左一盒紙巾呀嘻嘻。」Miki聽到之後先係呆左一下,之後即刻成個人縮返後。佢好明顯係畀我呢下突襲嚇到呆左一呆,我決定唔畀佢作出反應住,我繼續哄埋佢度講:「我幫你對付Judy,什至鋪埋條路畀阿Kate個位你坐都無問題呀,條件係我除左要知道晒所有關於你嘅嘢之外,我仲要得到你。」喺多次同Miki交手之後,我學會左又不按常理出牌,事情越荒謬,我試探到Miki露口風講真話嘅機會就越大。本身呆左嘅Miki聽到我開出嘅條件之後不怒反笑,佢好快又回復返佢又自信中又帶點嫵媚嘅聲線同我講:「我幾時話過我係為左升職先要你幫手。就當我真係想升職,我都無準備為左呢個位做咁大嘅犧牲喎,更何況要對付Judy我自己都得,唔一定要靠你姐。」「如果我同你合作唔到,咁我就唯有搵Evans同我合作架啦。不過你唔會介意架呵?」佢聽到Evans個名之後面色即刻一沉,佢好努力咁抑壓住佢憤怒嘅情緒,用盡量平靜嘅語氣同我講:「唔好拖埋啲唔關事嘅人落水,你自己呢幾日同佢相處,你都知佢係一個單純嘅好人。」「佢係好人,但我唔係喎,你又知呢幾日我同佢玩得好埋?你跟蹤我呀?不過唔緊要啦,一人一次當扯平啦。」「總之你唔好搞佢,畀啲時間我,你開出個條件我會考慮下。」

 





我勢估唔到佢竟然一聽到Evans個名之後,就連啲咁離譜嘅條件都肯話去考慮下,究竟佢地之間係咩關係?不過跟住落黎佢講嘅嘢相當出人意表。其實我估對佢黎講我開出嘅第一個條件,要佢將所有野和盤托出,可能仲畀話我要得到佢難以接受。突然,佢嘅神情變得有啲哀傷,佢眉宇之間所透露出果種愁緒我相信唔係扮出黎,佢話:「我知你而家一定好想去打聽我同Evans之間究竟係咩關係,又或者好想喺Evans身上知道我啲野。不過我勸你唔洗白費心機,因為你一定會大失所望,唔會打聽到啲咩。」講完之後,佢就頭也不回咁行返埋自己個位。

 

之後全日我都留意住Miki同Evans有咩交流,但除左寒暄幾句之外,我睇唔到佢地雙方有咩交集。而Judy成日都好努力想搵位攝親近下Evans,好可惜Evans都只係禮貌性咁回應下佢就算。而我見到咁有趣嘅情況點可以唔加把腳,喺襯無乜人嘅時候。我行左去Judy身邊同佢講:「聽聞啲番書仔好得鍾意MILF架,即係Mum I like to f…個f word你知係咩黎架啦。Judy姐以你呢個年紀黎講我敢講句你算風韻猶存呀,你都未必唔夠班後生女鬥架,我支持你架。」Judy聽到之後只係講左句無聊就唔再應我,但我點會咁快收手。我繼續講:「Evans唔係啲咁膚淺嘅人黎架,佢應該唔介意母子…呀唔係係姊弟戀架,放心啦我唔會爆你同阿權啲野畀佢知架喎。係喎講開阿權做咩呢排唔見左佢嘅?」Judy聽到阿權呢個名真係面色一變,佢警告我唔好同Evans亂講野之後就走左。我諗我聽日都係時候再出阿權呢隻牌黎搞下局。