喺半年前,我辭左份工之後,就決定同阿油一齊開發遊戲開心骨場。喺呢半年裡面,我幾乎日日都喺阿油屋企渡過,阿油嘅工餘時間全部投入左喺寫game上面,而由於有Taylor呢個財主支持,我地仲可以請左幾個喺City讀緊IT嘅友仔黎做part-time幫手寫game,呢幾條友仔係阿油嘅網友,雖然一睇就知係毒男,不過都尚算幫得下手。阿油唔知係咪同個呢幾條友仔講我係毒男販子,所以佢地都好似好驚我。由於我對IT方面真係一曉不通,因此我都樂於被佢地幾個恐懼。起碼佢地會因為驚畀我賣去中東,而努力幫我寫好隻game。喺呢半年入面,我除左依然都係無覆過Evans一個電話之外,我連莊神同阿秀等人都無乜見過。至於喺半年前突然消失左嘅Miki,佢喺呢半年入面總共透過e-mail搵過我三次。不過三次幾乎都係我單方面報告自己近況,而佢就完全唔肯透露自己身處何方,同做緊啲咩。當佢知道我同阿油開始寫app嘅時候,佢無畀到任何意見,只係叫我加油。但我有預感,當我呢隻app終於做到成績嘅一日,就係我同佢再會之時。不過其實經過呢半年無業生活後,我遇到一個非常實質嘅問題,就係我自己個人嘅現金開始短缺,由於大部分從Sam姐得黎嘅錢都放晒去開發隻game,再加上我本身又無乜儲蓄習慣之下,喺三餐開始成問題時。我唯有厚住面皮向莊神求救。不過其實我都唔係話好食懶飛,一開始已經打算攤大手板問莊神攞錢。Taylor曾經介紹過我去跟佢搵食,不過由於一開始佢已經彈左件荀嘢畀我,果位富婆本身係大陸人,好多年前嫁左畀個香港有錢佬。當時我作為一個男人,由於睇唔過眼佢洗老公錢,仲要拎黎包養男人呢個行為,本身應該係服侍佢嘅我,忍唔住直接同佢講:「仆你個街,你個賤女人攤大手板咁享用你老公嘅資源都仲唔夠,仲要拎黎貼其他仔,我真係頂唔順你呢啲蝗蟲行為呀。」當然,呢一句出左口之後,我嘅食軟飯生涯係幾乎未正式開始之時,已經終結。

 

其實阿油一直都好想叫莊神投資落我地隻app度,特別係喺其後當佢知道原來我係莊神嘅入室弟子,佢就更加認為我地應該搵佢投資。不過可能係我有啲好勝,我好想做返啲嘢威畀佢睇,所以我一直都無咁做。呢半年內,我只係間唔中打畀佢話畀佢知我仲未死,而佢都從來無問過我究竟喺度搞緊啲咩。甚至當我話畀佢知道我打算創業之後,佢都無乜大反應,亦都無乜畀個咩反應我。因此我更加覺得如果我今次真係成功的話,一定會令佢刮目相看。不過現實歸現實,我都要錢開飯,所以就算我再唔想認低威都好,我都要去搵佢。喺坐車去觀塘途中,我心裡面一直掙扎,我究竟應唔應該去搵佢呢?不過由於經過呢半年日以繼夜嘅努力,隻game唔洗過多幾耐就可以面世,我無理由喺呢一刻先黎放棄。既然決定左,我唯有硬住頭皮去求佢。其實我都有心理準備,佢一定會恥笑我,不過唔緊要啦。到他朝我成名,有記者訪問我果陣,我都仲可以拎黎大造文章話:「我果陣為創業好X慘架,窮都飯都無得食,要忍辱問人借錢先可以開飯呀。不過唔緊要啦,我而家都發左達,我餐餐食魚翅都可以呀,唔同你地班賤人為左供樓呀仲要日做夜日做呀。」雖然到時我未必會講後面果幾句,不過作為一個為左寫個app而要問人借錢渡日嘅人,我唯有咁激勵下自己。終於,我到左莊神公司,當我步入佢公司嘅時候。同半年前Miki走果日一樣,都係得阿秀自己坐左喺度睇書,就連莊神、Robin同莊神秘書都唔喺度。由於一排無見,阿秀見到我之時都表現得幾喜出望外,不過女大真係十八變,無見半年,阿秀就算無十八變,都起碼有十五變啦。跟左莊神一段日子後,佢已經由一個屋村妹,變成一個識得打扮嘅屋村妹。個感覺就佢原本只係石峽尾feel屋村妹,一下子提升至華富村級數。

 

阿秀作為人類行為觀察者一員,佢無問我嘅來意,因為佢已經估到。佢喺某處拎出一個信封,而信封中有一張支票,佢話:「喺你辭職嘅時候,你同公司無計清楚啲錢就走左,其實公司仲有啲糧未發畀你。莊老師見狀,就一直代你張啲錢保管,而且佢仲話將啲錢代你投資。所以呢啲錢其實係你自己嘅。莊老師其實一早已經預左你會上黎,不過你畀佢想像中遲左幾個月。佢喺幾個月前吩咐我,如果你上黎拎錢的話,叫你唔需要介意,或者覺得有咩虧欠左佢,因為啲錢係你應得嘅。」我真係無諗過呢個所謂嘅師父莊神,會為我做左件咁貼心嘅事。我仲以小人之心,心想黎到肯定會畀佢奚落。我強忍住淚水,因為我知道以莊神嘅性格,佢一定匿左喺某處觀察緊我嘅反應,雖然我係好感謝佢為畀左呢筆錢我,但我係唔太想畀佢沾沾自喜。正當我準備快啲轉身離開,行到出去先放心落淚之時,阿秀叫停左我話:「James哥哥,我其實一直都想搵多份part-time做呀,你可唔可以請我呢?」佢呢個突如其來嘅問題打亂左我正感動緊嘅情緒,我苦笑道:「阿秀妹妹,我邊有錢請你呀。」阿秀上前捉左我對手話:「唔緊要呀,到你賺到錢果陣先出返糧畀我啦。如果唔你遇上你,我嘅命運都唔會改變,如果可以幫到你達成你夢想嘅話,我唔仲介意幫手。」一下子畀呢個小妹妹哄到咁埋,講啲咁深情嘅說話,連我都忍唔住面紅。不過喺近距離凝視佢嘅俏臉之時,我突然靈機一觸,我的確有用得著阿秀妹妹嘅地方。