今日我開始左對公司啲同事進行復仇大計: 第九十一節
阿秀雖然跟左莊神呢條古惑阿叔一排，不過嚴格黎講佢都仲算係一個清純少女。起碼當我提出要佢做開心骨場嘅代言人之時，佢除左面紅都不知所措之餘，都畀唔到第二個反應我。見到佢咁猶豫，畀著半年前嘅我應該會就此放過佢，不過正值存亡之秋，我諗喺短時間內我好難可以搵到令一個妙齡貌美少女幫到我，最重要仲係佢唔收錢。對唔住都要做一次，我即時對佢動之以情：「阿秀呀，我知呢個要求係好過份，迫你拋頭露面。不過你諗下喎，如果你唔幫我，就無人幫到我架啦。」阿秀見到我竟然低聲下氣懇求佢，都有小小動容，不過可能呢個要求真係頗為過份，佢都仲係有啲遲疑咁話：「我唔係唔想幫你，James哥哥你係我大恩人，但我唔知我爸爸媽媽會唔會介意呀。」我心諗你阿爸阿媽當日見到莊神有啲錢，就拿拿臨想賣女咁，佢地會Q介意你做乜咩。而且我都仲叫有啲人性，我唔會要阿秀作太性感嘅演出，只不過要佢擺出清秀女神嘅款黎吸引下班仲肯洗錢嘅毒男先。因此我捉住阿秀雙手，用既堅定又誠懇嘅語氣同佢講話：「阿秀妹妹，你放心啦，我唔會難委你，不過如果你今次肯幫我嘅話，他朝我成功之後，我一定會好好咁答謝你。」阿秀畢竟都仲係一個小妹妹，喺我嘅誠懇攻勢之下，佢終於都答應左我。而當事後莊神知道左之後，佢都無怪責過我，相反佢只係擺出一副等睇好戲嘅神情。喺得到阿秀嘅應承之後，我即刻同阿油商討點樣利用阿秀黎作宣傳。阿油諗左一陣之後，就畀左一大堆短片我睇，佢話：「好多而家啲咩YouTuber，其實都係掛羊頭賣狗肉架咋，表面上就拍啲咩搞笑短片，但其實就係推啲女出黎吸引人，不過你又吹佢唔脹喎，人地真係大受歡迎喎。」的而且確，如果人地喺YouTube search開心骨場呢個名之時，只係見到入面有一大堆麻甩佬喺度，係十分大煞風景。相反就算阿秀唔洗著得太性感，但有佢個靚樣睇下，應該都ok啦。因此我地就決定左第一波宣傳，就係搵阿秀拍片。
我專誠搵左相機基操刀，去拍攝我地開心骨場嘅處女宣傳片。當阿秀去到拍攝現場（其實只不過係相機基喺工廠大廈租左個爛鬼單位做studio）之時，相機基喺唔知邊度拎左一堆性感女裝出黎，我即時用驚訝眼光望住佢：「嘩基哥估唔到你有著女裝嘅癖好喎。」相機基一臉不屑地話：「所以話你呢啲外行人真係咩都唔識，我作為一個專業嘅人體攝影師，為左要捕捉每位model唔同嘅獨特美態，當然要一早準備定唔同嘅衫畀佢地架啦。」我拎左啲所謂攝影師嘅衫上手一望，忍唔住鬧相機基：「喂基哥呢啲唔係叫衫，呢啲係布碎黎架喎。啲女仔著左上身之後，遮得前面又遮唔到後面，你呢啲所謂獨有美態，說穿了咪又係走光。」阿秀見到堆衫之後，即刻嚇到面都青埋。我當然唔會畀阿秀著呢啲衫啦，但相機基就勃然大怒地話：「只有喺攝影方面，我係唔會同任何人妥協，我今次肯唔洗錢幫你拍片，就係因為有阿秀妹妹做攝影對象。如果你要質疑我喺攝影上嘅決定，好呀，你搵過第二個人拍啦。」由於我唔好話畀錢去請攝影師，就連想畀錢買啲見得下人嘅攝影器材都有困難。因此我就十分苦惱，阿秀喺一旁嚇到唔敢出聲，我知如果我堅持的話阿秀可能都真係會著起啲布碎任相機基去影。但我真係過唔到自己果關，我唔想阿秀真係要著到咁去拋頭露面。正當我唔知點算好之際，突然有人撳門鐘。相機基開門見到門外嘅人果陣，佢目瞪口呆，唔識反應。門外嘅人唔理相機基，推開佢行左入黎。我見到呢個人嘅時候，同樣同相機基一樣呆左，不過理由同相機基唔同。相機基係因為畀對方嘅美貌嚇呆左，而我就係因為估唔到會喺呢一刻再遇返呢個人。呢個人，就係久違了嘅Jasmine。
Jasmine一入黎就拉我埋一邊同我講嘢，我本身仲想扮無嘢咁同佢打招呼，點知佢一黎就好直接咁同我講：「點解你唔同Evans交代清楚想離開，你有無當過佢係你朋友？」我面帶歉疚咁講：「大家都係男人老狗，你叫我點解釋姐，況且佢咁大個仔啦，唔應該再要我湊住佢，佢要自立架啦。」佢表情依然係冷若冰霜，佢繼續問我：「咁我呢，係呢大半年入面，你搵都無搵過我，如果唔係John話畀我知你匿埋左學人創業，我仲以為你已經死左。」「咁你都識講我創業啦，我仲邊有心情去理其他嘢呀。係呢，你上黎搵我係為左咩事呢？」佢冷冷地答：「無事就唔可以搵你？你睇下你呀，淪落到要迫個小妹妹著到咁性感幫你拍嘢。我估唔到你除左對我同Evans都咁負心之餘，你仲無人格到要呃細路女。」面對佢突如其來嘅指責，我好想反駁佢，不過就連我自己都唔知可以搵到啲咩藉口。佢行去拎起地下上果埋布碎，再望住一臉驚惶嘅阿秀，連連嘆息。相機基喺呢個時候開始催促我話：「喂你叫多條女上黎都無用架喎，究竟仲影唔影架，你個阿秀如果係咁巴閉，你地就走人啦。我係攝影師，我係唔會同人妥協架。」聽到佢咁講，Jasmine走左上前兜巴星左相機基一下，相機基喺毫無準備之下，畀佢打到跌左落地下。正當我喺心入面暗嘆一句今次無啦，正盤算仲可以搵到咩人幫我做揸機之時，Jasmine向坐左喺地下嘅相機基問道：「死咸濕佬，如果我代替阿秀著你呢啲Bikini。咁你肯唔肯畀阿秀著返普通衫去影？而家一次過有兩個靚女畀你拍片，你肯開始未？」相機基聽到Jasmine咁講，即刻忘記剛畀佢打左一巴，成隻狗咁話：「雖然我係攝影師，不過我都唔介意聽model嘅意見，呢位咁美麗嘅女神，你點話點好啦。」我完全無預計過Jasmine會突然出手幫我，我唔識反應，Jasmine見到我咁，本身仲係嬲爆爆嘅佢突然講左句：「雖然你係賤男，係人渣，不過我唔係，我唔會見死不救，你唔洗多謝我。係我自己傻先會幫你。」