今日我開始左對公司啲同事進行復仇大計: 第九十三節
大明呢位攝影大師收左錢之後，就真係兌現承諾幫我拍左條片。初初我都有驚過佢係想借此報仇，但佢又開始拍到拍完期間，都無做過啲咩奇怪嘢。阿秀喺片中無被要求過作啲咩性感演出，而Jasmine都只係需要行行企企。由於我地其他人正忙完幫隻game埋尾，所以我見大明正正常常咁拍嘢之後，就無再理過呢單嘢。點知，咁就出左事。由於我畀左大拿拿一萬蚊大明，所以我亦都好理所當然地要求佢幫我剪片。雖然我知平時叫幾個龍友去影婚禮都要幾皮嘢落樓，一萬蚊叫個有啲名嘅友仔黎拍片真係好過份，不過鬼叫我而家窮咩。喺大明正式剪好段片，而我請返黎班ive仔求其睇左兩眼就幫我upload左上網。就係咁，我地開心骨場嘅第一條宣傳片，就正式喺網上流傳。由於大明而家喺香港龍友界都叫有啲名，所以由佢操刀嘅片好快就畀班龍友熱烈share。我初初聽到我手下班ive仔話條片好多人討論，我都好開心。點知原來一眾網友並唔係因為個廣告有趣而興奮，原來大明聲稱用左啲咩後現代新浪潮藝術手法去拍攝條片。仆你個街，成個廣告都見唔到阿秀同Jasmine個樣，成程除左影住張按摩床之外，就係影住個地下，最多都係影到下阿秀同Jasmine對腳，我初初以為大明係想報仇想玩我，我好嬲咁質問佢。點知佢答我：「今次係我一個攝影手法嘅實驗，我想表達一個畀人按摩緊嘅人，由佢主觀視點所見到嘅嘢。我個人覺得呢條橋應該會引起到共鳴……」由於我只係出左一萬蚊，所以我基本上真係無say，聽佢咁講完之後，我唯有慨嘆自己運滯。經過相機基畀人拉左，大明又幫我拍左條咁有藝術氣息但又咁乞啲網民憎嘅片之後，我開始懷疑我係真係唔適合創業，我應該都係返去打份office工，整下啲同事過日晨好啲啦。我成日睇人地果啲創業故事，成日以為當中果啲一波三折劇情都係為左吹噓。點知我而家真係陷入左呢個困局。
我將呢排發生嘅事，總結左喺一封好長嘅email中send左畀Miki。但過左成個星期佢都無覆過我，或者係因為我連小小嘢都搞唔掂，所以佢唔想理我啦。Taylor呢個最大投資者睇完段片之後勃然大怒，佢要求我盡快再拍多段片去補鑊。但係連續衰左兩次之後，我仲邊有面去搵Jasmine同阿秀幫手呀，更何況我真係無錢再請人黎拍片。原本正進行啲如火如荼嘅開發工作，亦因為啲網上評語，而搞到所有人都士氣低落。萬念俱灰之下，我一個人走左出街度周圍行，打算散下心。點知喺無意識地亂行之下，我去到前公司嘅樓下。由於正值放工時間，街上有好多人，為免撞到舊同事，我正打算轉身離開。點知喺茫茫人海之中，我咁都會撞到熟人，喺我轉身之時有一隻手搭左上我膊頭，而我亦feel到我身後果個人由於高度問題，所以佢要搭隻手去我膊頭都有啲吃力。我轉身一看，原來係久違了嘅哈比人Daisy。我望向周圍，諗住Evans應該會喺佢附近，點知原來得佢自己一個。無見一段時間，佢都無乜點變過，起碼無增高到先。佢見到我有啲喜出望外，問我：「咁耐無見，你係咪專登返黎探我地架？」其實頭先佢明明見住我走，但而家又調返轉問我係咪黎探佢地，都唔知係咪玩嘢。我唯有求其答佢只係咁啱經過公司樓下，順便睇下會唔會撞到舊同事。就係咁，我同佢就企左喺公司樓下寒喧左一陣，而為免逗留得太耐會撞到熟人，我就拉左佢去另一區嘅café坐低慢慢傾。喺廢話左一輪之後，我忍唔住問佢：「係呢點解唔見你男朋友搵你嘅？」佢聞言之後笑得好開心，甜絲絲地反問我：「做咩呀？想試探我有無男朋友呀？如果我答無，你係咪會想追返我呀？」對於佢嘅回應，我感到非常驚訝。首先我真係無諗過佢會會錯意，覺得我會想追返佢；而且佢唔係同左Evans一齊啦咩？由於太多疑惑，我選擇以沉默應對。Daisy見我無出聲，即刻話：「同你分左手之後，我都無再拍拖啦。你又點呀，有無新戀情呀，聽聞Miki去左外國喎，即係你地都無一齊？」
估唔到佢同Evans始終都係撻唔著，等我當初仲懶大方。面對住Daisy嘅問題，我都只係苦笑應對。我刻意拉開話題，同佢繼續講廢話，唔講任何認真嘅嘢。我打算同佢講到咁上下之後，佢就會覺得悶而走人。點知佢之後嘅問題令我更加唔識答，原來佢喺阿油身上得知我喺辭左職之後就專心創業，但只係因為我好似刻意失蹤咁，所以佢唔敢直接問我而家搞成點。不過Daisy畢竟都係一個女仔，再加上佢曾經都係我女朋友，所以畀佢盤問左一輪之後，我終於畀佢知道我而家嘅困境。我仲以為果陣我都叫hurt過下佢，佢而家活得比我好，佢一定會覺得自己係勝利者，最多對我講下啲敷衍同情說話了事。點知佢聽完之後，眼角竟然泛淚，我見到佢咁即時大吃一驚，但又唔知講咩好。喺相方沉默左一輪之後，佢拎左張單去埋，之後拉左我去樓下嘅ATM度，由於佢全情默不作聲，我仲以為佢係叫我去撳錢畀返頭先杯嘢飲嘅錢佢。但佢喺撳左幾千蚊出黎之後，格硬塞左喺我褸袋中。我初初有反抗，點知佢話如果我反抗的話佢就會叫非禮。就係咁，我喺不情願之下收左佢幾千蚊，佢之後紅住眼框咁話：「James雖然你果陣都係選擇唔要我，不過我其實都無嬲你，我到而家都好想你會成功。呢幾千蚊就當我借畀你，到你第日成功左之後，你要十倍還返畀我。」講完之後佢就連多謝都唔畀我講句，轉身跑走左。估唔到我喺受完Jasmine恩惠之後，而家又到受Daisy恩惠。我呢一刻雖然好感動，但對於Daisy果句十倍奏還，我都忍唔住自言自語講左句：「嘩借財仔都唔洗十倍還咁高息啦。」