今日我開始左對公司啲同事進行復仇大計: 第九十二節
因為Jasmine突然無條件相助，我仲以為我嘅創業大計終於踏出成功一步。但我竟然突然畀警察請返差館協助調查，警察一朝就踩上門，當我仲以為係我果個港女細妹唔知係咪學人搞倫敦金騙案，因而被人查之時。原來警察係搵我。當時我真係好驚，因為我好記得讀我中學果陣，曾經因為畀人偷左部當時最新款嘅Nokia 8210而報警。當時個警察黎到之後，只係敷衍了事，一味只係話留返份口供同填返啲表咁。我見佢根本無心幫我，鑑於當時我仲係一個血氣方剛，又帶有幾分淆底嘅年青人，我不禁細細聲自言自語咁問候對方娘親，點知果個警察又非常之好耳力，竟然聽到我講咩。佢喺報案室度好大聲咁問我頭先係咪用粗口鬧佢，我淆起上黎咪話：「唔係呀阿Sir，我係問你表…….表你有無咋……」佢聽到之後依然勃然大怒，仲聲言要打去同我學校訓導主任講又盛，不過最後都係不了了之。但對於呢個警察嘅姓名同編號，仲有當時所有細節，我都已經記晒落小器簿。當時見到班警察臨門搵我之時，我即刻心入面盤算，一定要將小器薄交畀律師。就算我因為當年涉嫌向警察講粗口，過左咁多年之後畀人低調拘捕，我都仲有本小器薄喺手，可以喺法庭上向個官詳述返當年嘅事情經過。一諗到呢度，我諗到宣傳小器簿嘅廣告好稿。所以喺果刻，我已經無心情亦聽清楚警察為咩搵我。因為我已經諗緊，當開心骨場成功為我賺左一大筆錢後，我就可以搵我偶像E-Kids Tommy仔黎拍呢個小器簿廣告。廣告中嘅警察角色，我就打算搵國際巨星Justin Bieber黎做女警。至於主題曲啦喎，就緊係搵Mr.啦，搵到一隊Mr.就等如搵左幾隊國際勁Band，真係好抵。正當我想得入神嘅時候，我已經被帶左返警署。我身邊嘅警察見我十面九唔應咁，一定以為我係驚到唔敢講嘢，佢地又點會諗到我竟然喺度思索緊條絕世好橋。
我坐低左之後，即刻問眼前差人：「拿我澄清返，我當時唔係講粗口呀。」果個警察呆左一下，之後反問：「先生你講咩呀？咩講粗口呀？我地係請你返黎協助調查單涉嫌性侵未成年少女嘅案件呀。」原來，因為相機基之前成日搵啲毛都未出齊嘅小妹妹去影佢口中嘅藝術相，之後終於上到山多，畀人拉左。不過由於警察喺佢啲相入面，發現到阿秀同Jasmine，所以查查下就查到我，雖然阿秀仲未夠十八，不過好彩果佢日影嘅相都只賣可愛無性感演出；而作大膽演出嘅Jasmine就已經二十有幾，所以我只係黎協助調查。警察問點解無端端會同兩個女仔去搵阿基影相，但當時我唔可以透露隻game嘅細節，所以只係求其同個警察講話整左隻手機game要影啲宣傳片。點知今次輪到個阿Sir好細細聲咁自言先語：「挑，咪又係抄下隻其他game之後，搵條女出黎整色整水，呃啲廢青宅男玩。」本身我有諗過想投訴呢個阿Sir，不過我怕最後投訴唔成立的話，特首會要求我向呢位阿sir道歉，所以我都係就此作罷。不過由於阿基哥所有架生連名儲存裝置都畀警察充公作做呈堂證明。所以果日阿秀同Jasmine咁辛苦所拍嘅嘢，都已經化為烏有。我係好贊成拉相機基呢啲人渣，亦好期待佢會入去畀其他倉友玩下後欄，不過當而家影響到我嘅時候就唔係咁好了。而我步出差館嘅時候，驚見久違了嘅大明，我見到佢果陣好心寒，畢竟佢都曾經想將我置於死地。而佢見到我之時，表情則相當平和，仲不帶半點恨意。唔知點解，果一刻我雖然好驚，但我又好好奇想知佢點解會身在此處，所以我走上前同佢打招呼。
大明一直係我心中一根刺，因為我除左令佢性無能同搞到佢工都無埋，我仲間接搞到佢婚都無得結，我以為佢一定對我恨之入骨。但此刻嘅大明，面上沒無半分恨意，而且神情仲帶點祥和。佢身穿白色鬆身長袖衫，配以一條黑色牛仔褲，身上仲有一部菲林相機，流露出攝影大師風範。我問佢點解會喺差館門口出現，佢答我：「無，我聽到其他相機友講阿基惹到麻煩，諗住相識一場，關心下佢姐。」果一刻我真係懷疑我自己認錯人，大明以前明明係一隻小器狗公。點解而家竟然會關心昔日大敵相機基呢？更奇怪嘅係，佢竟然可以同我閒話家常，好似當左我係一排無見嘅蕭友咁。而仲痴線嘅係，佢竟然提出請我食老麥聚下舊。我雖然係好驚，不過又忍唔住接受左佢嘅邀請。去到喺食漢堡包之際，佢畀左一堆外國雜誌相我睇，攝影師一欄竟然寫住大明個名，唔係掛，大明真係做左大師？原來當日大明深感生無可戀，拎左僅餘嘅積蓄去旅行，打算去完之後就自殺。點知當佢去到印度遇到幾個大師，經佢地指點之後，佢除左放低仇恨，找到心中平靜之餘，佢仲發現自己好鍾意攝影，既然再無俗事牽掛，佢就決定全身投心攝影。而咁啱有個鬼婆雜誌編輯去左印度靈修，佢地相遇之後展開左一段異國戀情，個鬼婆成功令大明雄風再起，之後仲畀機會大明喺外國雜誌影相。就係咁，大明返到香港後，佢就由一個咸濕龍友，變成外國雜誌攝影師，可以話係一登龍門升價十倍。眼見佢竟然成為大師，而我隻game喺未展開第一輪宣傳，就已經搞左單咁嘅嘢，我真係有啲失落。喺無計可施之下，我打算盡地一搏，向呢個昔日大敵求救，叫佢出手幫我影段片。點知一副大師格，仲聲稱已經放低仇恨嘅佢，畀左個出人意表嘅答案我，佢用既又平靜又莊嚴嘅聲線同我講：「幫你影嘢無問題呀，畀錢啦，平時呢啲小事我幫朋友就算免費都得呀。不過你條撚樣咁乞我憎，一口價一萬啦。」下？大師都係收一萬？仲要係仇人價，我懷疑佢其實都唔係撈得太掂，不過既然一皮嘢就搵到個外國攝影師影相，就算對方係大明我都制。