我中出咗副校: 39. 基吧

「喂？我宜家走喇，你話嗰間bar 喺邊㗎？」我打比嗰條仆街。

「喺麼地道附近㗎咋，漫夏天附近都應該有車搭過嚟。」佢連邊間酒店都知，有無咁恐怖呀。

「好啦，預我半個鐘到到。」宜家都十一點半，佢又真係可以將啲時間預得啱啱好㗎喎！

我行翻出大馬路，去翻九龍塘會對面個站上咗架81c 一路坐到尾站。

唉，公事又要煩，副校又要煩，宜家仲要走埋助理呢個威脅出嚟，叫我點搞呀！



隨住巴士到達總站，我就落咗車，沿住麼地道行，果然見到嗰間叫唔知咩 sogei bar 嘅基吧。

好彩呢邊啲bar 平民啲，如果係近天文臺嗰邊又或者係老蘭嘅話都唔知點好。

「喂！呢到呀！」助理坐住喺酒吧嘅露天位置，而佢上身只係着住嗰啲大隻佬背心，展露佢引以爲傲嘅肌肉。

我入到酒吧，就坐低喺佢對面，靜謐嘅街道唔知點解散發住濃烈嘅壓迫感。

「你究竟搵我嚟做乜，仲要攞條片嚟威脅我嚟呀。」我冇咁得閒同佢講廢話。



「冇呀，淨係想見下你啫。我啲兄弟都好鍾意你呢type 㗎！」佢深情咁望住我，搞到人地打嗮冷震。

我轉一轉身，先見到一大班男人好似見到獵人見到獵物咁虎視眈眈，怪唔得知成個氣氛咁奇怪啦。

觀測下整間酒吧，只見酒吧入面嘅大多都係大隻佬，姣到出面嘅男人同埋啲普普通通嘅中佬阿叔。

我真係冇諗過自己會咁受歡迎，不過係仔嗰隻。

「你唔好再講廢話喇，你究竟有咩想講。」其實我都有啲驚成間bar 嘅人係會溶咗我，只不過關鍵時刻係應該保持冷靜嘅。



「其實我手上有啲校長嘅黑材料，就想你幫手散出去。你負責IT 㗎嘛，應該唔難嘅啫。」

「你地咁快就當我係自己人，做低其他對手喇？」雖然我係想升職，但辦公室政治呢家嘢真係難搞啲。

「我哋有嗮你嘅把柄囉，你又點唔做隻忠心嘅狗呢？」我宜家先意識到佢嘅笑容放翻落女仔到應該會好甜美。

「咁點解你又要做副校身邊嘅一隻忠心嘅狗呢？」我聰明地反問翻佢。冇理由成世都係佢哋捉住我嘅把柄㗎嘛！

「點解呀？因爲私人助理都唔係我嘅正職。我嘅正職係副校嘅戀愛顧問！」