【校園，籃球，友情故】兩年前，我係個毒撚。今日，我打緊美國高中籃球聯賽。: ～第一章～ 我愛籃球 籃球不愛我

2019 5月 我叫啊明，14歲，175cm。

我係班friend入面係最高果個，亦都係球技最差果個。 

好多人以為籃球高就一定有優勢，事實係如果你唔識利用你嘅身高，就算你米七五都會俾個米六五嘅打爆。

冇錯，我就係米七五唔識利用自己身高跟住俾一個米六五嘅射手打爆果個。

 「喂啊明，1 on 1吖～」 叫我單挑嘅呢個就係啊詹，佢叫我1 on 1嘅目的好明確簡單，就係想屈新手，刷數據。

明知佢目的我都會照同佢打，因為我要進步，遇強越強。 

「黎緊！」

我好爽快咁應承左佢 

「你開啊」佢將個波彈地傳左俾我，做左個簡單嘅check ball。 

我接住左個波，即刻做左個好唔純熟嘅三脅勢動作，佢不為所動，因為我地都好清楚，我射就會炒，我運球就會俾佢偷。 





我放棄左投籃嘅選擇，嘗試突破，first step就俾啊詹截住，冇機會進攻。

 我做左個所有新手都會做嘅動作，攞起左粒波。

我攞住粒波，好清楚自己再走多步就係travel（走步），再運球就係double，所以我得一個選擇，射。

我輕輕跳起，將粒波向籃框方向推出去... 「啪」我一起手粒波就比佢拍走左。

 球場邊食花生嘅波友幸災落禍地做左樣令我好瘀嘅事，佢地掩住個口，扮失平衡然後發出美國街頭籃球一定聽到嘅聲。 





「Ohhhhhhhhhhhh～」

 「執波啦」
啊詹好冷淡咁對我講 

我好不忿咁行去執起粒波，簡單check ball後就擺出防守姿勢，我準備係三分線貼佢，因為佢最擅長嘅就係正角位三分

 佢一接到波就直接抽起，我完全反應唔切，只係簡單咁舉起手希望可以干擾到佢，但係個波就好似一枝穿雲箭咁就穿針入網 

「In your face！」啊詹好串咁對我講 

「Ohhhhhhhhhh～」班花生友又係到美國街頭籃球式幸災落禍 

唔知邊個係場邊叫左一句

「贏開啊，執波啦」

 我又死死地氣去左執波  

Check ball過後佢一接到波又直接抽起，今次我反應得切，同佢同時跳起，我以為呢球一定守到，可以收班花生友皮，點知佢根本冇離地，fake到我成個跳起左。
 佢直接鏟入去輕鬆上籃，佢速度太快，我爭佢成個身位，根本追唔切。 

賽果：3-0，我輸 啊詹同我臨走前串串貢咁對我講左句：「下個月班際籃球你一定要打，咁到時全校都可以睇你出醜啦，哈哈」 

我當時好嬲，但係我冇俾到任何反應，對佢冷笑左一聲就去左買嘢飲。