【校園,籃球,友情故】兩年前,我係個毒撚。今日,我打緊美國高中籃球聯賽。: ~第二章~ 大手怪
鐘聲響起,我慢慢咁行翻上課室,一坐底就趴係檯上面發白日夢,企係黑板前果位講緊啲咩我完全唔知,亦都冇興趣知。
我一直諗,究竟我班際前趕唔趕得切練波呢?
我諗下諗下就一隻手攞起左個籃球
「哇痴線架」
話我痴線嘅呢位係Oscar,佢係我校籃球隊隊員,被稱04最強嘅一位怪物。
我冇同佢打過波,因為佢係我眼中根本係「神級」,同啊詹同佢班friend根本唔同層次。
「咩痴線啊,你話我啊」
我好疑惑咁問,我完全唔明佢做咩無啦啦鬧我
「係就係你,不過我話緊你隻手囉」
佢好驚訝咁指住我隻手
「我隻手?做咩啊」我笑左一笑,心諗我隻手有咩咁特別
「你隻手咩構造架,大到咁嘅?」佢講完就捉住我隻手同佢比左一比
結果係,我大佢成截。
「奇怪,你明明高過我,又大隻過我,點解隻手會細過我嘅?」
「你知唔知邊個係Kawhi Leonard?」
「知啊,馬刺去速龍果個吖嘛,做咩無啦啦講起佢嘅?」
「你知唔知正常人要幾高先可以有佢隻手咁大?係3米」
「咩話!?3米!?」我好驚訝 仲以為自己聽錯
「只要將你隻手嘅直徑乘以9就可以計算到幾高嘅人先有你隻手咁大架啦 你試下」
228cm,冇錯係228cm,結果係要228cm嘅人先有我隻手咁大
我知道自己隻手唔細,但係估唔到咁誇張
「咁但係隻手咁大對我打波有冇好處架?」我好奇咁問
「梗係有啦,攞籃板同埋block人你輕鬆好多」
「咁但係點解我都係咁廢。。。」
「係你唔夠經驗,捉唔到個timing姐,你身體素質唔錯架,臂展又長,班際預埋你架啦」
比個04最強咁樣讚一讚突然有啲輕飄飄
班際就不嬲都係靠班入面嘅校隊取勝,校隊隊員多咪贏囉,一隊班際波一般都係幾個校隊,其他全部都係蛋散,我就係咁多蛋散入面其中一個。
果日放學翻到屋企我就上網search有關Kawhi Leonard嘅highlight,我睇下睇下開始有啲鍾意上佢果種防守意識同埋進攻嘅果種強悍同低調。
我開始睇佢嘅生平,開始留意佢打波風格,開始留意佢嘅笑聲,發現原來佢真係可以成場波都唔笑。
每個球星都有佢嘅入球慶祝動作,唯獨係佢永遠都面無表情。
我仲開始睇佢高中失去父親嘅故事,睇一啲分析佢防守方法嘅YouTube片。
我發現自己好想變成佢咁,好想好似佢咁盡力守好每一球,好似佢就算用最單調嘅進攻方法都可以係籃球最高殿堂入面打出一個位置。
我唔知原來無意之中佢已經成為我嘅偶像。