因為ex，我決定向全世界嘅女人報仇: 交友App

就係咁過左一個月。呢一個月Nicole同呀婷都冇搵過我，我間唔中想搵下賢狗打機，佢都約左Judy。佢地兩個真係有D痴線..放工見完返到屋企仲要Face time。我自己亦都唯有係忙碌嘅工作入面渡過，直至有一日返工聽到個同事係度講...
「喂，Steven，我上次咪話識左個女仔嘅～佢約我一陣收工食飯！」坐我隔離個肥仔同事講。
「真咩，就係你上次話交友app識嗰個？你係咪冇放相出嚟嫁，佢咁都濟？」Steven拎住杯水企左係佢後面笑住講。
「食屎啦，人地話同我傾計好舒服，佢呢Ｄ好女仔講心唔講樣，你識條鐵咩！」
「叻仔喎肥仔，條女有冇圖睇下呀？」我答爹。
「拿。」肥仔將部手機比左我。個女仔都唔算差，四四正正。如果十分滿分我會比六分啦。但以肥仔唔合格嘅分數，佢真係算係執到。肥仔咁嘅質素都識到女仔，我開始對交友app有啲好奇。
「隻app叫咩名？」我問。
「文哥你都有興趣？你咁多女。」Steven話。
「屌啦，識多Ｄ朋友冇壞嘅。」
「岩呀～我幫你單啦。」肥仔拎左我部手機。



返到屋企我都好好奇，坐左係梳化，打開左隻交友app。連Facebook..？都係唔好，比人見到我玩咪好柒。都係用手機號碼啦。拿拿林set左Ｄ資料，放左幾張相。我用左幾張側面同背面嘅相，唔係對自己個樣冇信心，而家想留Ｄ空間比對方，等佢對我有興趣，會想見我。

Keep住玩左一陣，match左個唔差嘅女仔。佢叫Rachel。
「Hello~我叫呀文呀。」普通開場白。
「HI ! 我叫Rachel~」佢覆。
「你好鍾意小動物嫁？」第一次玩交友app嘅我嘗試係佢D相入面搵話題。
「係呀！你又知嘅？」
「你啲相入面有張係抱住隻狗仔呀嘛～」
「哈哈係喎！我自己都唔記得左添xd」佢覆我。


「隻狗係你自己養嘅？」我嘗試係呢個話題繼續落去。
「唔係呀～朋友隻狗嚟嫁，我自己都好想養呀..不過屋企人唔比。」
「我都好鍾意狗仔～但我驚冇時間湊佢..」我答。
「同屋企人一齊湊呢？」
「我搬左出去自己住呀haha，所以唔得。」
「你自己租定買？我都有諗過搬出去，但又好似要用好多錢咁..所以都係算了haha」佢話。

之後我地都係係度閒聊幾句，我冇好主動好aggressive 咁去approach，純粹當搵個人傾下計打發下時間。我自己認為玩交友app一嚟就好主動咁同狗公冇分別，我都係鍾意傾計傾到大家覺得有Ｄ好感先再進一步，咁自自然然就會有下文。我地開始傾到去感情嘅問題，多數傾呢啲話題，係最易令人敞開心扉。所以要溝女係必須要講感情嘢，你呻一句佢安慰一句，好易就會令關係更加密切。
「你呢..？拍緊拖？」佢問我。
「冇呀，上個月先分左手。」


「Sorry呀..我唔係有心提起嫁！」
「傻啦～都過左去。」
「咁你仲有冇好掛住佢呀..？」佢問。
「開頭都會有，但我冇諗過我會咁快就唔痛。因為我同佢一齊左四年，我以為自己會痛返一頭半年先放得低佢。但原來諗諗下，佢對我又好似唔係想像中咁重要。始終，佢最後選擇嘅唔係我，我都冇必要再留戀係佢度。」我半真半假咁講。因為其實我又點會咁快放得低Sophia，只不過我知道如果我同佢講我未放得低，我就冇咁易同佢有進一步嘅發展。睇落好似好有心計咁，喂大佬呀，溝女係咁嫁啦。

我地一路傾左好多個夜晚，有時會傾到凌晨三、四點都未訓。Rachel比我有另一種嘅感覺，係同Sophia同Nicole都唔同嘅。如果要講，算係有girl friend able嘅感覺..