我同Rachel傾左咁多日,我地都冇刻意話要約對方出嚟見面,大家都係順其自然咁發展。我地亦都冇交換wtsapp ig fb,每次都只係用tinder傾計。Match到佢之後都有幾個女仔有傾過計,但大部份都傾左一陣就冇傾,Rachel係我第一個match到嘅人,同時係而家唯一一個同我係tinder傾嘅女仔。
佢係係太子一間獸醫診所度做,佢好鍾意小動物,超級有愛心。大部份人話自己鍾意小動物都係鍾意啲睇落可愛嘅動物,例如貓、狗、倉鼠、兔仔...但識左Rachel之後令我對「鍾意小動物」呢個term有全新嘅睇法。因為佢係連所有爬蟲類都鍾意,差在未話鍾意曱甴...但佢係唔會討厭佢地。佢對人同對動物都一樣好有愛心,加上佢本身個樣偏可愛,齊陰大眼水汪汪(相入面係咁...真人唔知),有時都真係幾得意。佢話自己24歲,但睇相睇落似20,可能係髮型嘅原因。

今晚我同平時一樣,放工食完飯返到屋企就打開tinder同佢傾計。突然見到有個wtsapp group嘅通知。
「Eric食咁多女得唔得嫁?」呢個係我大學時候同Major嘅group名...有時呢啲 group名就係咁九唔搭八。
「約食飯?好耐冇見你地啦!」其中一個女仔講。
「好呀!!!」另一個女仔秒覆附和,我極度懷疑係私底下PM叫佢覆...
「可以呀,你地想幾時?」我過左陣見冇人應就答,廢時比人見到我藍tick唔覆。
「我都OK~」呀婷話。死啦...一時間唔記得呀婷都係呢個group..不過冇嘢嘅...食餐飯姐,又唔係單獨見。屌...我幾時變到咁驚見到佢...
佢地約左今個星期五,約左係旺角嘅一間雞煲。



到左星期五,我因為要OT,大概7點先係公司走。佢地約左7點半旺角等,我仲要過海,所以我點都會遲到。
「sor我要遲少少呀,岩岩OT,盡快過嚟。」我係group講。
「你係公司岩岩走?」呀婷無啦啦PM我問。
「係呀..岩岩先走,做咩?」
「你搭地鐵?」佢問我。
「係呀,呢啲時間廢時塞巴士啦..」
「我都要遲少少吖,不如我係尖沙咀等埋你一齊過去,反正順路。」
「唔洗啦!你去先啦,我而家先行緊去地鐵站炸。」我話。其實係怕尷尬。
「唔緊要呀~我都未係公司走,你就到金鐘wtsapp我啦。」呀婷咁講...我都冇辦法拒絕佢。


「好啦,如果你早走真係唔洗等我呀。」
「知啦~長氣~~~」佢覆我。
算啦,應該都唔會好尷尬姐...唉,一陣再算。
「我到金鐘啦。」過左十五分鐘我覆佢。
「好~我行緊去尖沙咀地鐵站。你再同我講你係邊一個車卡啦!」
係遠處我已經見到呀婷,佢冇平時咁著得咁暴露,應該係因為返工。佢著左件白色V領恤衫,下身係黑色嘅長闊腳西褲。唔知點解普通一件衫著係佢度特別有feel,唔係因為佢個樣,而係因為佢本身襯衫好叻同埋佢偏高,好似咩衫著落佢個身都好似model咁。
「HI~快啲行啦,我地遲哂到啦。」呀婷笑住咁講。佢唔尷尬嫁咩...定係佢扮冇事。雖然就話已經過左一段時間,我始終都會覺得有啲尷尬。
「好呀。」
我地兩個入左地鐵,平排咁企。因為地鐵有啲逼嘅關係,佢有少少逼左埋嚟我度。我一隻手扶住扶手,佢冇扶到所以成日企唔穩。架地鐵係尖沙咀去緊佐敦,臨到站嗰下chok左一chok。呀婷一嘢撞左落我心口度。
「Sorry呀...」佢話。


「...唔緊要呀..你扶實呀。」
「..嗯..」
繼續由佐敦去緊油麻地,佢因為唔夠手長去扶個扶手,所以嘗試打開隻腳企穩少少。我本身都想讓個位比佢扶,但奈何真係好逼,我自己都郩唔到。臨到站嗰下又嚟一次平衡力考驗,都唔知係咪個司機玩鳩我...
可能因為佢著高跟鞋嘅關係,今次呀婷又企唔穩,差少少撞到隔離嗰個男人。臨撞到之前嗰下我一嘢用另一隻手扶住佢膊頭。
「冇事呀嘛...都叫你小心...」我用少少怪責嘅語氣同佢講。
「...冇事....sorry呀.....因為唔慣著呢對新鞋...」佢dup低頭細聲講。
我突然諗起我隻手仲放緊係佢膊頭度,我即刻縮返隻手。
「嗯...冇事就得..」我話。
架車終於由油麻地去到旺角...呢3個站係我呢世人搭得最長嘅3個站。

我地上到去嘅時候佢地已經食緊嘢。我逐一同朋友打招呼,其中有一個fd無啦啦做鳩我地。
「喂你地一齊左咩?一齊嚟嘅?」佢用講笑嘅語氣問。明眼人都知佢講笑,反正大學嘅時候我同呀婷都係人地會誤會嘅關係,但我地兩個聽落就好尷尬。
「係呀係呀,生埋仔啦。」我覆。然後坐落淨低嗰兩個位嘅其中一個。呀婷坐左係我隔離,因為得返呢兩個位。
開始食嘢之後因為有其他人係度所以冇顯得咁尷,我地都各自融入返個圈子。我食飯嘅時候習慣將部手機放上枱食,雖然Sophia會好唔鍾意,成日都話污糟。唔知點解又係啲細節位諗返起Sophia。但佢對我嚟講,已經慢慢變到間唔中會諗返起,而諗起已經唔會好大感覺嘅人。