就算我幾咁努力去做嘢,失眠嘅問題都好影響到我嘅生活。公司近排簡緊人升職,我唔可以因為Nicole而影響左自己嘅前途....所以有一日我請左半日假,去左睇醫生。醫生話我有少少情緒病,但又未至於抑鬱症。佢開左啲安眠藥比我,我拎住啲藥返左屋企。因為近排訓得好差...所以我一返到去就連衫都未除就訓著左。

.......嗯?我聽到有人打電話比我....
「喂....?」
「喂~呀叔」Rachel話。
「Rachel...?做咩啦」
「冇呀,你岩岩訓醒咁嘅?你病左呀?」
「唔係呀...我請左半日假休息下炸嘛..」
「哦..好啦,本身仲諗住約你出去」佢有少少失望咁話。
「你本身想約我去邊?」


「冇呀~我朋友近排去左旅行,佢比左佢隻狗狗我湊。我見你都咁鍾意狗仔,你近排又唔開心,咪諗住帶佢陪你去散下步」佢話。
「嗰隻哥基仔?」我有印象佢講過佢朋友隻狗。
「係呀!屎忽大大嗰隻!」
「...嗯...咁你等我一陣..我換件衫出嚟」我望一望鐘,原來都六點幾,佢應該放左工返左屋企。
「唔洗啦!你休息下啦」
「唔啦,訓左好耐了~我都要食啲嘢,係喎你食左嘢未?」
「未呀,一齊食啦,我而家過嚟」
「我嚟啦,你唔係要帶埋狗狗咩,我揸車方便啲」我話。
「好啦,我住觀塘xx...」
「嗯,你等我~你諗定食咩啦」我話。


「嗯~掰掰」
「掰~」我收左線就換衫,拎左鎖匙同車匙落樓。好彩我未食安眠藥,唔係真係唔知點揸車。架車已經整返好,上次呀健都過左條數比我,起馬唔洗揸住架凹左個頭嘅車。就到觀塘嘅時候我打比Rachel叫佢落樓,然後我搵地方泊車。我見到佢嘅時候,佢著住好普通嘅T恤,熱褲同拖鞋,好街坊look。
「狗狗呢?」我問。
「緊係我地食完飯先啦~唔通困佢係你架車咩」
「好~咁食咩呀」
「我地食xx茶餐廳好冇?」
「哈哈可以呀~」
「你唔好睇佢好似好頹呀!好出名嫁!」佢話。
「我咩都冇講哈哈」我地去左間茶餐廳食,講真我真係冇諗過係食茶餐廳。唔係我唔鍾意,只不過係冇諗過會由佢口中提出要食茶餐廳。我地食完飯佢就上返去帶左隻狗狗落嚟。



「布甸!布甸!乖!唔好咁啦...!」Rachel拖左隻哥基落嚟,隻狗係咁跑向我度。
「哈哈,嚟,等哥哥摸下你」我望住布甸講。佢跑左過嚟控埋我隻腳度,我痞低摸佢。
「衰女...冇啲矜持!」
「人地對住靚仔緊係冇矜持啦~睇下你!布甸!咁可愛嘅你~!」我話。
「靚仔你個頭!布甸鍾意呀叔嫁~」
「係啦係啦」我好敷衍咁講。
「你咁鍾意佢,比你拖嫁啦,你小心呀,佢有時跑得好快」佢比左條狗帶我拎。
「好..有啲緊張添」我話。之後我地又去到觀塘海濱,兩個人一隻狗,一齊享受飯後嘅時光。布甸比我拖住嘅時候都唔算曳,可能真係因為佢係女仔,痴男仔多啲。
「拿~都話有小動物係度,個人都開心啲嫁啦」Rachel話。
「嗯~我都想養返隻,但真係驚冇時間」
「都係嘅..你仲要自己住」
「唉..而家開心都冇用,去到夜晚我都係訓唔著」
「你仲好似上次咁打哂冷震...?」佢好擔心咁問。
「我唔知..不過有時起身都飆冷汗。我今日睇左醫生啦..醫生開左啲安眠藥比我」
「下...要食安眠藥咁大獲..!唔係有副作用嫁咩..」


「咁都冇辦法....好過訓唔到...」
「你唔好食啦....」佢話。
「下..」
「一係....我....我過嚟..陪你訓.......」佢細細聲講。
「下....?」
「咁...我上次..好似...幫到你嘛..」
「都係嘅...你..可以?」
「......嗯...反正...你又唔收我租..我咪當有多個地方住」
「咁好啦..我一陣同你去買啲日用品?」
「好,我返屋企執一執嘢」
「嗯..咁布甸呢?」我問。
「我屋企人會睇住佢嫁啦」佢講完之後我地帶返布甸上樓,Rachel都拎左啲衫。然後我地去超市買左啲日用品,再揸返架車返我屋企。上到去我將佢啲嘢放係我間房,然後將所有地方清空一半比位佢放。
「我遲啲幫你配條鎖匙啦」..我諗起Nicole。
「嗯...好呀」佢尷尷尬尬咁講。
「我清左啲位比你啦,有空位嘅地方你隨便擺啦」


「好」
「咁....我沖涼先啦」我話。
「嗯~你去啦」

我發夢都冇諗過
Rachel係第一個正式搬入我屋企住嘅女人