因為ex，我決定向全世界嘅女人報仇: 生日驚喜

「你係...？」佢覆我。今次，我唔會再錯過機會...我即刻typing....
「.....我係Nicole...」我打完個心跳得好快好快..究竟佢會點覆我。
「..........」..佢咁覆我姐係好無奈..？定係點...呀文......
「你究竟去左邊....點解而家先出現返...」佢又覆我。好彩...至少佢比機會我解釋...我即刻打字覆佢，但我又唔知點解釋比佢聽。我決定要進取啲，我唔可以放棄任何一個機會。
「我...我一言難盡.....，你得唔得閒...我可以而家去你屋企同你講」我話。我真係好想見你....
「我....我有啲攰...」佢話。...真係攰..？定係佢唔想見我炸...又或者係有第二個人係屋企..？
「咁好啦...我下次再上嚟」我話。我點都要留個機會比自己，我唔可以再失去佢。
「我屋企近排唔得呀...一係再約？」佢話。....係咪因為個女仔....，如果唔係..我咁耐冇見佢佢點會唔想我上去。
「哦..咁....咁好啦....你幾時得閒？」我問。
「再搵你？..」..再搵..姐係幾時..我唔想又再等...我想即刻就見你。


「嗯...！生日快樂」我話。
「哈哈..多謝....但你點解知我生日嘅？」佢問。
「下次見到面同你講啦～」我話。希望你會因為好奇心而肯同我出嚟....
「..好」
「咁好啦，你攰就早啲休息啦！」我話。我只可以扮冇事...但以女人嘅直覺..佢屋企應該真係有人係度。
「知道啦～你都係」佢講完我就冇覆佢。我冇諗過咁耐冇同佢傾，佢竟然好似一啲都唔開心咁。死啦我係咪遲左...我...我........我明明已經好努力做好...我連婚都離埋。呀文..你應承過我嫁...。我以為今晚會係開心嘅一晚..因為我地隔左咁耐冇傾，佢會好掛住我....。

我越諗就越唔開心，成晚都冇訓過...，我不停睇返我地呢段短短嘅對話，直到天光我先有少少睡意。我訓左一陣就扎醒左，但我真係好想見佢。我落去食左嘢之後就不停不停諗起佢，今次，我真係再忍唔住啦。我返左屋企化左個妝，就決定買啲嘢上佢度煮嘢食，就好似當日我生日咁。我精心打扮左一陣，著左件我第一次同呀文去睇戲嘅裙，我想佢記得我同佢嘅回憶。我落左樓，去買返當日我生日買過嘅牛扒，再買埋我地一齊食過嘅蛋糕....。

搞掂哂啲嘢我就搭的士去佢屋企，因為架車已經唔屬於我。去到佢屋企樓下我又係一袋二袋咁上去，今次我係佢門口我冇猶豫過，直接禁密碼，好彩冇轉到密碼。我入𨋢，禁17樓。架𨋢關門，慢慢升上去，而我個心跳就同架𨋢一樣直線上升.....。我真係好緊張..緊張到個人有少少唔舒服。𨋢門打開，我一步一步咁踏出去。我嚟之前已經幻想過好多情節，個房有女人、呀文自己一個係度、呀文趕我出去....我基本上將每一個有機會出現嘅結果都預測一次..但臨到佢屋企門口，我都仲係好緊張....。求下你，呀文...比次機會我好冇....。我伸手入褲袋拎鎖匙....，我隻手係半空中震緊....，我用右手捉住我左手...呼...我嘗試穩定我自己一直震嘅手。我慢慢將條鎖匙插入去.....咔.....我扭轉條匙......，道門就咁比我打開左。



我一望入去........
「Nicole....！？」
「呀文....！！！」

分開一千天　
天天盼　再會面
只怕是你　先找到我
但直行直過　
天都幫你去躲　


躲開不見我