我娶左個台妹做我老婆啊！: Chapter 20

頌賢爸爸既視角：

我就開左個衰仔架FD2出去，認真試下佢。講真自從換左Stepwgn之後我都冇咩點揸過本田既棍波車，而家揸上去就好似返返去當年買EG9既感覺，當年新車落地出牌之後係咁係太子道、公主道一路飛入將軍澳同大清水，又試過用呢架車同慧敏拍拖，送頌賢返學，假日又一家三口去游車河，啲回憶真係返晒黎。

你問我而家會唔會飛車？答案一定唔會啦！最多上去大山到著下Tec，係咁意玩下算啦。你估我仲係十八廿二咩？

開車嗰陣，我就打比我大佬。

「喂，大佬係邊？出黎冷車？」我問。





「屌你，揸左頌賢嗰部FD2？」大哥話。

「架車我買既，當然我有份啦，正確啲黎講係四個人都有份。」我笑住咁講。

「嘩，你個死仔咁快娶新抱啦？步我後塵WO！」大哥話。

「差唔多啦！你係元朗啊？去唔去沙皮狗到啊？」我話。

「去大圍咁撚遠？好啦！陣間見啦！」大哥話。





我就行大埔道，過左20分鐘好快咁去到大圍。沿途見到部改到好MK既白色福士Scirocco，我望一望，又係班MK仔係到飛車。又係到慢駛又閃燈HI我。屌，擺明又想搵我撚啦。


大佬，話就手痕姐，但始終同呢班死MK仔癲好似又冇必要，我就由得佢行，仲比佢係到挑釁。阿叔心情好，唔同你地班臭飛計較。如果我仲係頌賢嗰個年紀既話，實同你地玩，推到你填海。

果然「人在做，天在看」，一去到沙田嶺嗰陣就有Road Block，架Scirocco唔知係咪身有屎，就比行地板油衝Road Block。好衰唔衰就炒埋架泥鬼到，成架車撞到廢鐵，醫返都晒氣。

我就無視嗰個Scirocco司機既生死，所謂「自作自受」，就係咁既意思。由細到大，我同老婆都教頌賢揸車最緊要安全，唔好下下都鬥快，鬥快係人都識啦，但係⋯⋯快而穩先係最重要，先至溝到女。

去到大圍站，我就揸架車入去積福街其中一個車房。見到大哥架黑色R32 GTR停左係門口，人呢就去左食煙。留意返，佢呢架既改裝就同當年日本賽車電影《首都高速》裡面既土屋圭市揸嗰部一模一樣。








同大哥傾緊計既，就係呢間車房既老闆沙皮狗，佢係HKU既工程系畢業，係一個賽車方面既工程師。對改JDM、舊款德國車都好有研究，曾經到過日本受訓過。好多人話車房老闆都係啲暴發戶，但沙皮狗其實好好人，同周邊啲車房、以至其他店鋪既老闆關係好好。我架Stepwgn、EG9、以至我舅仔架寶馬M3、保時捷911、Land Rover Discory都係係佢嗰到做定期保養。

「喂沙皮狗，返左啲咩啊？」我話。

「呢，咪呢幾箱野囉！」沙皮狗話。

「你個仔知唔知佢會改車啊？」大哥話。

「放心啦，我實改得個衰仔同阿女一定滿意。」我話。

「係咪⋯⋯阿欣啊？唔怪得你個仔咁開心啦，原來有新女。」大哥話。





「你地明架啦！沙皮有冇啲咩新野返，可以落架FD2到啊。」我話。

「一早留左啲好野比你。」沙皮狗話。

我望真啲，原來係Yokohama既Advan Racing RSD既18吋黑鈴，Cusco避震，Toda Racing Exhaust System，Mines既電腦，MoMo軚盤，Endless剎車系統，Mugen水箱。嘩嘩嘩⋯⋯真係落場啦！我就咁既，玩車唔係單純改馬力，比起馬力，我更加鐘意佢嗰種操控感，令到自己好揸啲。係香港，最緊要「人要惡過車」，學識控制好自己架車，先至係重點。如果唔係，就會好容易出事，冇左條命就咩都做唔到，到時變成馬路炸彈，害死人就唔好啦！

「嘩，沙皮果然係沙皮！收埋啲都係靚野！」我話。

「之前入多左，知道你有需要。我知你地兩父子一定會岩用。」沙皮狗話。

「係啊，內籠我就唔改啦，原裝件都要留返。」我話。

「你睇下你幾時過黎整，我今晚唔開工啦，搵日啦！」沙皮狗話。





「唔緊要啦，我今日都唔得，架車要比返個衰仔，佢聽朝要返早。」我話。

「咁食埋宵夜都得啦掛？」大哥話。

「好！不過你請。」我同沙皮狗話。

「屌你啦！」大哥話。

我地三個就走左去附近既茶記食宵夜同吹水講返當年既往事，然後各自返歸。講真好耐都冇試過同一班死黨傾得咁開心，好在我老婆都算開通，仲成日跟我玩埋一份，我先可以好放心。講起我同老婆，我地由拍拖到而家都感情好好，好恩愛。點解？？做人老公，時時刻刻都要當佢係你女朋友咁哄，唔好當你屋企既煮飯婆。Hey，陣間返去可以見到老婆，想起都開心。