我娶左個台妹做我老婆啊！: Chapter 22

「準備好未啊？」我問嘉欣。

「準備好啦！」嘉欣話。

我地就著車離開左停車場，為左避免啲人返工返學既車龍，所以我就唔入葵涌，直接經貨櫃碼頭轉入機場。

「衰人，呢到去機場都幾快啊！」嘉欣同我講。

「係啊，半個鐘頭都唔洗。香港其實去邊到都好快。咁⋯⋯你以前如果返機場既話有幾遠啊？」我問嘉欣。





「都幾遠架，因為我屋企係北投嗰附近，以前要揸成個鐘頭車先返到工，不過自從機場捷運開左之後，我多數就坐捷運返工。」嘉欣同我講。

「幾好啊！不過唔怕，如果大家返工時間一樣，我車你返工啦！！」我話。

「仲要比架車我揸啊！」嘉欣話。

「得啦！」我話。

話咁快，我地好快就到機場，我就照舊去返四號停車場拍卡入去，當我想泊車嗰陣，見到有架黑色既Benz E250同時泊緊車，睇個車牌號碼我就知係我直屬上司Jeff。作為下屬既我，我當然要向上司打聲招呼，但其實佢份人好玩得，但佢見到嘉欣既反應有啲奇怪，唔使問啦又會以為嘉欣係我女朋友啦！







「Leslie，呢位係？」Jeff問。

「等我介紹下，呢個係我直屬上司Jeff，呢個係嘉欣，佢今日要第一日返工啊。」我就向嘉欣同Jeff互相介紹對方。

「你就係⋯⋯台北過黎我地部門Exchange既交換生？你好啊，原來你同Leslie識架？係咪第一日返工呢？」Jeff問嘉欣。

「係啊！諗住早啲過去行政Termimal報到先啊，不過⋯⋯我都係跟你地架？」嘉欣充滿好奇心地問。





「Exactly，既然你識Leslie，咁⋯⋯你以後既Shift就跟住Leslie行啦，陣間呢你就跟我同Leslie行下Terminal，順便幫你搞個Permit、介紹我地啲同事比你識。」Jeff話。

「好啊！」嘉欣就好開心嗲住我。

真係估唔到原來嘉欣就係我地部門既台灣交流生，諗起以後呢一年我地可以日對夜對，簡直係人生一大樂事啦！而家唯一祈望既係嘉欣能夠係AA做得開心，等佢可以係呢個「赤鱲角公司」留下一個美好既回憶，然後同啲同事相處得開心，咁就足夠啦！