我娶左個台妹做我老婆啊！: Chapter 31

「舅父、舅母。」我話。

「頌賢，做咩帶埋個女仔黎既？」舅父話。

「呢位靚女係欣欣呢？」舅母問。

「Hello，我叫嘉欣啊！係頌賢既租客。」嘉欣係到自我介紹。

「Oh！欣欣好耐冇見啦，頌賢既爹地媽咪同我地講左有個女仔住係到，原來就係你啦哈哈。大個左靚女左啊！」舅母話。



嘉欣被舅母咁樣講一講，搞到佢都有少少怕醜。話晒大家咁耐冇見，當然要講返啲客氣既說話啦！不過我舅父舅母其實份人好Nice，所以希望嘉欣唔好見怪。

我地邊行邊去攞車，舅父舅母見到我架FD2又係到嘩然，唔使問又係問我「買左新車啊？你架舊車呢？」嗰啲例牌說話。但舅父一見到我架FD2又係到流口水。喂喂喂你唔係有保時捷911、寶馬M3、同Land Rover Discovery既咩？我呢啲日本車其實唔岩你架

上到車，嘉欣就坐我隔離，而舅父舅母就坐係後面。見到佢地係到笑得好開心，我諗除左架車既內籠坐得舒服之外，當然唔少得係我隔離既嘉欣小公主啦！嘉欣全程好醒目，不斷咁同舅父舅母打好啲關係，搞到舅父舅母笑得好開心。溫嘉欣小公主你係得既。

呢個時候，媽咪就打電話黎。由於我揸緊車加上冇戴AirPods，所以就叫嘉欣幫我接聽。

「媽咪講咩啊？」我問嘉欣。



「佢問你接左舅父未。然後呢就叫我地一齊去葵芳新都會食飯。」嘉欣話。

「好啊！」我話。

由港珠澳返屋企，基本上都係好似平時咁行，過左青嶼幹線就落青衣再落葵芳。黎呢到基本上都係泊新都會廣場，不過平時如果黎呢區都係坐地鐵，唔會揸車黎呢到咁傻仔。點解？由屋企黎呢到，坐地鐵都係十分鐘，非常方便、快捷。

去到新都會，爹地同媽咪就Wtsapp我叫我地上黎但馬屋到就得。呢間係一間日式自助火鍋，上網睇個性價比其實算幾好，而且有時會有好多人黎排隊。好在今日都唔算多人，所以唔使等好耐就泊到車。





一上到去，爹地媽咪已經開定個爐係到招呼我地，一坐低佢地四位老人家都係講下家事、機場啲野，同埋澳門好去處。當然我同嘉欣好認真去聽，當然，如果佢地傾到家事既話，我同嘉欣當然唔出聲啦。我地兩個同四位家長都係講下公司既野，而嘉欣仲話想向四位老人家取下經，了解下香港航空業既背景同發展，同時嘉欣仲將佢係台灣既工作經驗Share比四位家長聽，而我地都聽得好入神，搞到全程都係講多過食。

食完飯後，由於爹地媽咪冇揸車，只係坐地鐵過黎，加上我想帶嘉欣行下葵廣同新都會。於是我就將FD2既車匙攞比爹地，幫手車媽咪同舅父佢地返屋企，話我自己同嘉欣坐地鐵返去就得。

「欣，行唔行街啊？」我問嘉欣。

「好啊！Yeah！」嘉欣歡呼。

「行啦我地！不如⋯⋯我地行呢到先。」我提議。

我地首先由新都會開始行，呢到基本上同大型商場冇分別，行行下嘉欣就想我帶佢去Muji。

一入到去，嘉欣就好開心咁樣瘋狂掃貨。基本上都係買下衫，買下零食，買下文具。結果搞到一袋二袋，最後當然係我比錢啦。見到嘉欣變成一個快樂既美少女，我都開心晒。

「Yeah！好開心啊！」嘉欣話。



「欣啊，不如帶多你去一個地方啦！」我話。

「係邊架？」嘉欣問。

「隔離啊！葵涌廣場啊！」我話。

「我要去！我要去！快啲帶我去！」嘉欣迫不及待咁講。