我娶左個台妹做我老婆啊！: Chapter 32

我同嘉欣就沿住行人天橋，去左葵涌廣場。

到底呢個商場有啲咩特別？呢個商場雖然比較老舊，但係有好多小食，以及好多平靚正既服裝，好平民化既店鋪。如果你係一個女仔，又想掃平貨同食野既話，呢到一定會好岩你。

「做咩帶我黎葵涌廣場呢？」嘉欣問。

「帶你掃下平貨，食下小食咁囉！」我問。

「當然要啦！屌你仲唔行！」嘉欣就扯住我隻手行。





話就話扯住我隻手，但嘉欣只係輕輕咁扯，如果有得同佢手拖手一齊行，一定好開心。但嘉欣好似早有目標，反客為主咁周圍掃啲小食。重點既係，佢好似做足功課咁，佢帶我行嗰幾間都係網上推介最高人氣既食店。仲一口氣買左好多小食，有海膽、芝士撈麵、雞蛋仔、章魚燒。簡直係多不勝數。

嘉欣個胃口都幾大，但佢食野嗰陣仍然保持高貴優雅既氣質，唔會狼吞虎讌。講真，佢真係可以做KOL，可以係YouTube開個Channel向啲台灣朋友介紹下香港既美食。



而嘉欣好識做，今次就輪到佢搶住比錢，仲話要請返我食。我當然要畀面，同佢一齊開心Share啦！

「好食嗎？」我問嘉欣。





「好好食啊！多謝你帶我黎啊！」嘉欣好開心咁講。

「你鐘意就得啦。」我話。

「好鐘意呢種地方啊！下次我要向啲台灣朋友介紹返呢到先得。」嘉欣話。

呢個時候，我就用iPhone黎偷影嘉欣食野個可愛樣，但點知當我想按下快門嗰陣，比嘉欣發現左。

「影啲咩啊？」嘉欣用佢雪亮既眼睛凝望住我。





「冇⋯⋯冇影啊！」我話。

「你講大話，有影我既！幫我影幾張相啦！」嘉欣話。

嘉欣真係人細鬼大，就係因為我既無心插柳，搞到佢想我影低佢既美態。於是我就開Snow黎幫佢影下相。而嘉欣都好配合，學啲日本妹咁擺出啲可愛姿勢，好Kawaii呢。結果⋯⋯我幫佢影左起碼都有20張相。

「影到本公主點啊？」嘉欣問。

「當然好靚呢！」我話。

「睇過，不錯喔！我好鐘意啊！不如⋯⋯輪到我幫你影呢。」嘉欣話。

我就好似啲小朋友咁，扮返啲小朋友既Pose。等嘉欣小公主幫我影相。而嘉欣不斷咁要我換動作，搞到影左好多張相。

過左一陣，嘉欣就攞返佢既影作比我睇。話時話佢影相都幾叻，影到我好似啲文藝青年咁。





既然我同嘉欣都幫左對方影相，點可以唔一齊合照呢？於是我就即刻較返自拍Mode，嘉欣一見狀，就即刻自動波，好嗲咁挨住我。我地一時又伸脷，一時又嘟嘴，嘉欣仲不時係到好像女朋友咁抱住我，搞到我真係好似佢男朋友咁。

「欣，開心嗎？」我問。

「當然開心啦！」嘉欣話。

「你鐘意就好啦！」我話。

「只要係你帶我去既地方，我都鐘意。」嘉欣話。

聽完嘉欣講呢一句，我就知我地既關係又近一步，雖然我地兩個只係好熟既朋友兼同事，但係最少佢起碼唔會對我有任何既抗拒。你問我對嘉欣既感覺係點？我可以同你講，同嘉欣小公主一齊工作，一齊生活，一齊玩樂，真係好舒服，完全唔會有任何既壓迫感。

見啲鋪頭差唔多夠鐘Close，我同嘉欣都係時候要返去。於是我地就過馬路行去地鐵站坐車返美孚。





由於呢個鐘數係過左食飯時間，基本上人流唔算太多，所以我地一上車就有得坐。

「衰人！」嘉欣話。

「咩啊？」我問。

「聽日我地係咪返夜啊？」嘉欣問。

「係啊。總之你以後就係跟我返工啦！」我話。

「Yeah！不過⋯⋯你都幾孝順啊！」嘉欣話。

「做咩咁講？」我問。

「嗱你唔想世伯伯母坐地鐵返屋企，就主動比返架車佢地揸。仲話主動帶我行街。我就知你一個孝順父母既乖乖仔啦。」嘉欣嗲住我咁講。





「咁我架車坐得五個人，冇辦法啦！更何況⋯⋯爹地媽咪咁辛苦養大我。要比佢地舒服下，我同你坐下地鐵啦！」我話。

「嘻嘻。孝順父母既男仔我最鐘意！」嘉欣話。

呢個時候，列車已經到左美孚，我同嘉欣就行返屋企。