「恭喜你啊Ally!下一個結婚就係你啦。」Rosita話。

嘉欣冇出聲,只係不斷係咁對住我甜笑。雖然我都好想希望嘉欣能夠同一個對佢好好嘅人共諧連理,但係我好清楚知道嗰個人唔會係我。而家唯一可以做嘅,只可以默默咁樣守護着嘉欣。

唔知點解,呢一刻我對嘉欣既感覺好強烈,呢種感覺就係好似啱啱認識Jane嘅感覺好一樣,好想喺大庭廣眾之下向佢表白。我而家先至發覺原來我鍾意嗰個女仔⋯⋯唔係Jane⋯⋯而係嘉欣。

溫嘉欣,我真係好鍾意你呀,你可唔可以做我女朋友啊?

當然,Samuel佢哋見到我同嘉欣好怕羞,所以都唔敢再比壓力我哋。大家食唔到花生固然之好唔開心,但係⋯⋯今日嘅主角始終都唔係我哋,留返比Samuel同Rosita做返男女主角啦。



影到咁上下,差唔多夠鐘要去酒店。但因為今晚擺酒間酒店都係尖沙咀附近,所以我哋都係行路去算數。

「做咩啊諗緊嫁唔嫁得出啊?」我問嘉欣。

「嫁唔嫁得出呢唔關你事!」嘉欣話。

「如果你結婚嘅話⋯⋯記得請我喎。」我話。

「sorry喎,我諗到你死咗都唔會有呢一日喎。我呢係唔會鍾意任何人既。」嘉欣話。



「話唔定有一個真命天子好快會出現係你面前呢?」我話。

「真命天子?咪即係⋯」嘉欣話。

「即係邊個呀。」我話。

「冇嘢啦都係。你咁八卦唔話俾你知,等你心思思。」嘉欣好得戚咁講。

既然嘉欣咁講,我亦都無謂再勉強問落去。但憑佢嘅語氣睇得出,其實佢想講嗰個人⋯⋯就係我。但係⋯⋯我想將我地既感情再進一步先,無論如何我都要比嘉欣幸福,唔可以俾佢受到任何嘅傷害。



我哋一邊行一邊走,就去到今日擺酒嘅宴會廳。見到啲擺設全部都係以飛機為主,鬼叫Samuel同Rosita大家都係做航空業嘅咩。

趁未夠鐘開席,我就去一去洗手間。話時話今日忍左成日都冇去過,而家趁有機會就即刻去廁所交下水費。

去完出返黎,係我面前有一個好熟悉嘅女仔身影,冇錯啦呢一個女人就係曾經令到我最痛嘅女人—阿Jane。佢就一如以往咁樣,着住條白色嬲屌裙同Dior高踭鞋,喺度咩住個Channel手袋。講返佢個樣,好似林志玲,而且身材都幾撚正,有36D、25、36,身高都有170。同嘉欣身材都差唔多。不過Jane就懶係Cool咁,成日都對我西口西面,學埋晒啲ABC講英文,十足十好似個港女。唔似得嘉欣咁樣經常充滿笑容,又會係咁同我用粗口嬉笑怒罵。

以前同佢拍拖嗰陣,好多同學朋友仔都好羨慕我有一個咁好嘅女朋友。以前見親佢咁樣着一定會扯撚晒旗,然後借啲意想同佢做愛。但而家真係sorry呀,我而家見到佢完全一啲感覺都冇,原因係咩?因為我已經唔再愛佢,依家係我身邊有一個比佢更加重要嘅女人等緊我。

「盧頌賢,你企喺度!」Jane命令我。

「你想點啊?我哋已經玩完㗎啦!」我話。

「你做乜要避開我呀?」Jane問。

「你真係識講笑啦我點解要避開你姐?」我話。



「我知,當時我同其他男人上床你好嬲,拋棄你在先,我知你仲係鍾意我㗎,你根本就係喺度想示威!不如我哋喺返埋一齊啊。」Jane話。

聽完佢講呢一句,心諗佢係咪食錯藥。點解一個女人可以咁撚得人驚。

「冇可能。其實你要搵男人,大把男人嘅條件好過我多多聲啦!你做乜要搵我呀?有啲野,發生左就係發生左,唔可以返轉頭。」我話。

「我知你唔可以原諒我,但係你真係變咗啦!你以前對我好好㗎?點解你而家變成咁啊?」Jane問。

我乜嘢都唔知,我只係知道呢一個女人傷害得我好深,令到我完全唔可以相信愛情,甚至因為佢我搞到差啲要自殺。依家難得企起翻身,我就唔會再比呢個女人摧毁我嘅一切,既然係咁我就決定要同佢攤牌。

突然間,嘉欣怒匆匆咁樣走埋嚟我度大叫我全名。我見到佢無啦啦喺度喊,然後佢就沖埋黎。之後無啦啦成班人圍晒過嚟我度。

「啪!啪!啪!」我就比嘉欣摑咗N把,原來佢力氣都好大,我都Feel到有啲痛



一開始俾嘉欣摑,其實我都呆左,仲未知道發生咩事。我只係知佢一邊打,一邊好似潑婦咁樣鬧我,我見到佢喊到呼天搶地,簡直我見猶憐。

「嗚嗚~你個衰佬啊,呢頭就話同我結婚!嗰頭你就背住我同呢個女人喺埋一齊,我而家俾你搞大左個肚啊。你真係冇良心呀嗚嗚~你當初話愛我㗎!你做咩唔講嘢啊,你答我呀!你係咪想我攬住個仔跳樓自殺啊。」嘉欣係咁對住我破口大罵,然後一邊摑我。

聽完嘉欣咁講,一開始其實我都唔係好明佢點解要摑我,當我知道佢講我搞大左佢個肚嗰陣,我就明白原來佢用嘅絕招就係呢一樣。喺度扮大婆,同我一齊趕走Jane呢個小三。

既然係咁,我就乖乖配合佢既表演。

「欣你冷靜啲先你冷靜啲先,我同佢冇嘢㗎。」我就係咁意敷衍下。

「咩冇嘢啊?平時你出去玩我都算啦,但係今次呢個女人我真係忍唔到佢!一句講晒你跟佢定跟我。答我呀!嗚嗚。」嘉欣喊得好大聲。

「你冷靜啲先,有咩返屋企先啦好冇。」我話。

「呢個女人係邊個呀?盧頌賢你好同我解釋清楚。」Jane問。



「呢層呢其實⋯⋯⋯」我就喺度扮息事寧人,等嘉欣接落去。

「關你咩事呀死八婆,依家佢係我老公,我依家係要捉佢返屋企!你要溝仔就要行遠啲唔好搞我老公!Fuck u Bitch!」嘉欣好大聲咁講,仲舉埋中指。

老公,嗚啊!雖然而家嘉欣同Jane嘈緊交,但當我聽到老公呢兩個字係由嘉欣嘅口中講出嚟,個心唔知點解好似好興奮咁樣。不過做戲做全套,依家唯有不斷咁樣比呢兩個女人係咁鬧我,等Jane走咗之後,呢場戲就可以煞科。

「你個衰人原來咁賤格,搞大埋人哋個肚。我憎死你呀!哼!」Jane講完就頭也不回咁樣行開咗去好遠。

Jane走左之後,得返我同嘉欣係到⋯⋯見到佢頭先發晒癲咁樣鬧我,佢個惡樣幾乎拍得住媽咪罵我同爹地嗰陣。又不斷咁喊,我先知原來我係佢心目中真係好重要。但最估唔到嘅就係,佢講到好似真嘅係嘅一樣,今期嘅TVB視后應該可以由佢拎啦!唔知點解佢打個下,其實真係有少少痛,不過要扼到Jane,我就唯有要遷就下啦。
已有 0 人追稿