我娶左個台妹做我老婆啊！: Chapter 53

我安頓好嘉欣之後，就走去收銀嗰度俾錢。負責做收銀既依然係嗰個靚姐，估唔到佢一眼認得我。點解？因為我以前成日返學都會黎呢到食飯，嗰個阿姐好好人， 每次都會叫廚房加多啲飯比我食。 

「靚姐，早晨啊！我要兩個飯啊唔該。 」我用返熟悉嘅口吻講。

「頌賢早晨啊，咁得閒返黎探阿姐啊！唔使返工咩？」靚姐話。

「放假啊今日，今日要兩個飯啦！」我話。

「嘩你兩個咁多啊！係咪照舊啊！」靚姐話。 





「唔係，今日有朋友黎，帶佢黎呢到食飯。」我話。 

「女朋友呢？咁照舊兩個滷肉飯啦，兩杯凍檸茶啦！糖漿你自己加啦！」靚姐幫我叫左。

我就係到等緊嘢食，然後一齊拎俾嘉欣。呢個時候有好多狗公喺度凝視着嘉欣，但佢哋一見到我出現之後就用不忿嘅眼神望住我。咁又難怪嘅，因為佢哋以為我哋兩個拍緊拖呀嘛哈哈！

「我哋唔客氣啦！」我同嘉欣就學啲日本人講。

見到嘉欣食得津津有味，搞到我成個人都開心晒。最驚佢唔鍾意呢度啲嘢食姐。





「嘩好好食喎呢個飯，有啲似以前喺台灣讀書時食嘅便當！」嘉欣話。

「最緊要你鍾意啫！」我話。

「其實食咩有乜所謂呀，最緊要一齊食飯嗰個對象係邊個姐！欣欣最鐘意同賢賢食飯啦。」嘉欣對我單咗一下眼，然後又伸脷。

通常女仔如果做呢個表情，一定會對個男仔有啲暗示。傻妹我知道你係鍾意我嘅。

估唔到一餐咁簡單嘅canteen飯，我同嘉欣一路食一路笑，喺度講返我哋各自喺以前大學時期嘅青春歲月，大家又做過啲柒野，睇吓台灣同香港嘅大學文化風氣有咩分別。講真啦，同嘉欣相處真係好舒服，完全有咩講咩，唔需要轉彎末角，希望佢唔好變第二個Jane啦。





食完之後，就繼續展開我地既HKU之旅，嘉欣就不斷叫我幫佢係我母校到「打卡」，或者一齊合照。下次有機會去台灣既話就一定要叫佢帶我去台大打卡先。 

突然間，見到Muso（全稱：Music Society）既人係到做表演，而家做主音既竟然係我學妹Yannie，係喎呢黎又到佢地既壓軸節目--Sing Contest。而Yannie就係我Facauty師妹，樣貌身材都好出眾， 同嘉欣差唔多高。當年就係我做媒人，介紹佢比Andy識，後來就不負我所望，佢地兩個好快就一齊左。只係因為尋日佢有啲事，冇去Rosita同Samuel既婚禮。

「喂，機場大王！做咩帶Ally過嚟HKU啊。」Yannie一見到我同嘉欣又喺度笑。

「帶佢嚟我哋間母校一天遊。」我話。

「你就好啦，有個靚女陪你！」Yannie話。

「Yannie你做緊表演啊？」嘉欣打趣地問。

「玩吓㗎咋，不如你上台同我一齊合唱啦，揀首國語歌呢？」Yannie講完就帶嘉欣上黎。

「我要聽我要聽！」我就喺度食花生。





「收嗲啦屌你！」嘉欣又講粗口鬧我。

我就聽嘉欣既話，然後Yannie就拖住嘉欣上台，唱咗一首周杰倫嘅《告白氣球》、以及梁靜茹既《想念是呼吸的痛》。

話時話，對上一次聽嘉欣唱歌，已經係幼稚園上唱遊堂嘅時候。嗰陣時個Miss俾佢好高分，唔知而家佢嘅聲有冇甜到呢。

見到Yannie同嘉欣一齊手拖手對唱，講真佢哋兩個把聲真係不相伯仲，但你話要我二選一嘅話，我一定會揀嘉欣。點解？除咗係佢甜美嘅歌聲之外，佢就係同我同床共枕嘅女人。

 唱完之後，我就當然要俾個like嘉欣啦！呢個時候我哋就同Yannie道別，繼續展開我哋嘅旅程！

「我唱得好唔好啊？」嘉欣悄悄然問我。

「好聽呀！都話搵日Neway！同你玩足三個鐘！」我話。





「好不過你請。喺香港你請我去Neway，喺台灣我帶你去錢櫃囉！」嘉欣話。

「你話㗎，唔准反口！」我話。

「係啦係啦我聽曬你話啦！」嘉欣話。

我哋兩個又喺度嬉笑怒罵，搞到好多人喺度食花生。如果你話將來我哋兩個喺埋一齊，結咗婚之後帶我哋嘅小朋友嚟呢度玩你話幾好呢，但唔知道嘉欣⋯⋯到時會唔會留喺香港？還是我會跟佢返台灣⋯⋯⋯算啦諗咁多嘢都係冇用！最緊要而家要活在當下，好好珍惜我哋兩個相處嘅日子！