無驚無險又過了一個月,呢一個月我同嘉欣都係一齊返工放工,放假又會一齊做運動同約會。當然我同嘉欣做事好有分寸,返工嗰陣會認真做野,所以啲同事都唔會特別踢爆我地兩個曖昧緊,話時話我同嘉欣呢種關係都幾刺激,返工就扮同事,放工就一齊返屋企。呢半個月我都好好運,係機場On Duty嗰陣唔會遇到Jane,我諗佢自從上次比嘉欣用大婆身分鬧走之後都唔會再搵我,唔好話見面啦,甚至一個WhatsApp訊息都冇留比我。九成九一定又係到釣金龜啦。

人就係咁,好多時以為身邊最愛既人離我而去就好似世界末日咁,但而家諗返轉頭只不過係一件小事,呢件小事只會令自己更成熟去處理感情。講真如果唔係因為Jane出現返我面前,我都唔知道原來我最愛既就係嘉欣。

呢一日,我同嘉欣返早更,係T1到個離境大堂到巡場。

「欣你搞咩啊?精神咁差既?」我問嘉欣。

「咪因為你囉,你尋晚不斷踢我。搞到我冇覺好訓。」嘉欣扮嬲咁講。



「吓??唔知邊個到扮豬叫呢?」我話。

「你去死啦!」嘉欣扮嬲。

「Sorry啊!睡公主得未呢?」我話。

「未得喎,欣欣而家要罰你請我飲Cafe!你知我要咩架啦!」嘉欣話。

「係啦,你係到等到我啦!唔好行開啦!」我話。



我就走去Starbucks到買咖啡,當然我順便買埋比自己提下神啦,由於我同嘉欣都偏愛少甜,所以就叫兩杯Cold Brew。至於咖啡錢我就遵守承諾唔使佢還啦!

等緊Cafe途中,突然聽到Counter好大聲,好似潑婦鬧街咁樣。

「Calling Leslie⋯⋯Ally佢⋯⋯出左事啊!!你即刻過去CX Counter睇佢啦!」Jeff用Walkie叫我。

「收到!!Over!!我而家即刻去!」我回應Jeff。

個Starbuck姐姐見到我突然間咁緊張,就叫我陣間先再返嚟攞咖啡,去咗搵嘉欣先。



平時如果遇到突然情況,我都會比較冷靜,用返一貫既經驗去處理,因為黎黎去去都係嗰啲Case,接到就分返比相關既部門去處理,然後自己去寫返份Report解釋成件事既來龍去脈,以及如何去解決後續既事情。但當我聽到嘉欣出事,我個人變得好緊張,好感情用事,完全無法控制自己,我緊張既已經唔係諗份Report要點打,而係唔可以比嘉欣出事。因為⋯⋯佢除左係我同事,佢亦都係我心中最愛的人。

欣,等我!!

我完全冇理會到嗰兩杯咖啡,就已經衝左出去CX Counter,見到既場面⋯⋯

果然,我真係冇估錯,又係阿Jane個8婆係到鬧事。今次佢同身邊幾個Bitch姊妹係咁圍攻嘉欣,並不斷用惡意言語攻擊佢,又係咁用電話拍片,只係未差在出埋手。身邊又有好多花生友食緊花生,完全唔肯伸出援手。

而Jeff見到我,就即刻向我打眼色,叫我無論如何都要拆掂佢。

死啦,死啦!我見到嘉欣已眼濕濕,呼吸聲變得好急促,好似就黎想喊咁。而Jane佢地就好似大獲全勝,佢地係咁羞辱嘉欣既原因係咩???理由好簡單,因為Jane依然死咬住我唔放,而嘉欣為左幫我出頭就扮我未婚妻趕Jane走。其實Jane呢個女人係公主病,死要面子係全世界都知,但我真係估唔到佢原來咁恐佈、輸打贏要,因為佢以為我同嘉欣真係一齊,所以⋯⋯為左唔想我好過,就搵嘉欣悔氣。

係Jane心目中,既然得唔到我既心,佢亦都唔會比嘉欣得到我!!既然係咁,我一定要做返男人既責任,就算係我而家身穿機管局既制服,陣間可能冒著被處分既危機,我同我自己講過,如果再比我遇到自己鐘意既人,我一定唔會再放手。

「一追再追 只想追趕生命裡一分一秒 原來多麼可笑 你是真正目標」



於是,我就係人群中沖左出黎,阻止Jane既奸計得逞。而嘉欣見到我既出現,就好似等緊白馬王子,迎接佢呢個灰姑娘,將佢由地獄拉回人間。

「冇事嘛?欣!停手啊!」我問嘉欣,並示意嘉欣企係我後面。

「盧頌賢,你終於肯出黎啦!」Jane話。

「你想點樣啊,我同你已經玩完架啦!你點對我冇所謂,呢件事同嘉欣無關!佢係無辜架,你即刻向佢道歉啊!!如果唔係我就Call警察!」我好大聲咁講,攞住對講機指Jane講。

「你為呢個女人黎鬧我!明明我同你一齊先架,佢究竟有咩好姐??點解你要拋棄我啊!我知佢根本冇懷孕,你都係利用佢黎激我架嘛!我話你聽⋯⋯我Jane Lau得唔到既男人,其他女人唔使旨意得到!包括佢啊!我知你鐘意呢個女人先拋棄我啊嘛!你一直都背住我鐘意呢個女人啊嘛!點啊冇聲出啊??你夠膽就係到鬧我,我包保你地兩個工都冇得做!」Jane好串咁話。

「收嗲啊!!!死八婆!!!!!」我已經控制唔到自己,撕聲力竭地向Jane回擊。

「盧頌賢,你夠膽再講多一次!」Jane用返佢一貫既態度咁鬧我。



「我叫你收嗲啊!!!死八婆!!!而家嘉欣係我女朋友,我話你聽啊!我由始至終鐘意既人係佢啊!!你夠膽動佢一條頭髮,我一定搵你算帳!!你夠膽就係呢到打我!係,以前我曾經真心好愛你,但係你由頭到尾都一直支配我,然後背住我同其他男人偷食!就算你要我身敗名裂,我都唔會再受你擺佈,因為⋯⋯你實在太乞人僧啦!我唔會再對你妥協、再去容忍你!」我同Jane作最後既攤牌。

「你真係咁憎我??」Jane最後問我。

「係!由我地分手嗰刻開始,我已經同你冇拖冇欠,大家就此劃清界線!」我好堅決地回應Jane。

Jane佢地知道大勢已去,就係眾目睽睽之下摑左我一巴掌,然後拎住手上既登機證同Passport,頭也不回喊住衝左入去禁區。而其他花生友知道今次我為嘉欣挺身而出,就不斷係到對我拍手,大家都知道冇花生食就知難而退。呢一巴掌,亦都代表我同Jane既關係從此互不相欠,以後我還我,佢還佢,我冇同佢計較既原因就係呢一巴掌,就當係我欠左佢咁多既感情一次過還清。

「雖則你難忘記 這戀愛遺物終需棄置」


搞掂完Jane呢個前度,而家面對既就係嘉欣呢個現任。而呢班花生友見到我做返一個男人應該要做既事,就即刻拍手掌。我知道咁樣可能要面對好嚴重既後果,但如果我選擇去逃避既話,我今生今世一定會後悔,抬唔起頭做人。

當我想走向嘉欣安慰佢既時候,佢就好似細路女不停地哭泣地走出門口,咁又難怪既,係眾目睽睽之下向佢表白,而我地更加係著住制服On Duty,如果我係嘉欣既話,個心一定好亂。

「Leslie,如果你係鐘意Ally既話,就即刻去追佢返黎,我警告你啊,如果收工前你帶唔到佢返黎,即刻收大信封!!快啲去啊!加油!」Jeff搭我膊頭一下。



「知道啦!」我回應Jeff。

Jeff呢一番說話,為我搵返嘉欣打左支強心針。但問題⋯⋯我要去搵左嘉欣先。我一直追住嘉欣,而嘉欣就加快腳步去左Departure Hall入口既街道,向住天橋方向行。

雖然嘉欣跑步都好快,但係佢又點會快得過我呢??結果唔使10分鐘就截停左佢。

「欣!!!你唔好走啦!!!你想去邊啊??」我命令嘉欣。

「你追住我做咩姐??返去啦!唔好理我啦!」嘉欣話。

「唔得!!我唔可以比你走架!」我話。

「你做咩要對我咁好啊??你知唔你咁做好有問題架??你會隨時要被炒魷魚架!!你唔好咁傻仔啦!我有啲咩值得你對我咁好姐???」嘉欣好大聲咁回應。



「我唔係傻仔!!我好清楚我而家係到做緊咩!就算我將來冇左份工,我都唔想再扼你,我唔想再扼我自己⋯⋯啊!!好!你想知點解我會咁對你啊??因為⋯⋯我⋯⋯鐘意你啊!!!我話你聽啊,你就算而家返台灣,我都會跟住你去台灣,你呢世都唔使旨意避開我。」我用盡我所有氣力講。

「賢賢?!我⋯⋯⋯⋯」嘉欣雙眼通紅、淚光閃閃,我知道佢呢一次哭泣係開心既眼淚。

「溫嘉欣,你可唔可以做我既女朋友啊,我想今生今世去照顧、陪伴你,要你每日都要開開心心!應承我好冇啊?」我呢廿六年黎最勇敢既就係呢一句,我好大聲咁向嘉欣表白。

我捉住嘉欣雙手,然後攬住佢。而嘉欣同時攬到我好實,個頭就緊我肩膊,忍唔住喊得好大聲。我知道⋯⋯其實我已經成功左,但係我好想親耳聽到嘉欣對我既感覺。

「你⋯⋯好傻啊⋯⋯雖然我同你見返⋯⋯唔係好耐⋯⋯但係⋯⋯⋯除左爹地媽咪⋯⋯⋯我從來未試過⋯⋯身邊有個男仔對我咁好架啦⋯⋯⋯⋯你知唔知你呢句說話⋯⋯我等左廿年啦⋯⋯咁多年黎⋯⋯我一直都冇拍拖⋯⋯因為呢廿年以黎⋯⋯我由始至終⋯⋯我鐘意既人⋯⋯係你呀⋯⋯嗚嗚⋯⋯我⋯⋯唔想冇左你⋯⋯如果冇左你⋯⋯我真係好驚啊嗚⋯⋯我想今生今世同你喺埋一齊。」嘉欣向我剖白,佢啲眼淚整濕左我件制服,我而家就更加要攬得嘉欣實啲,唔可以放手。

「欣,我話你知啊,我今生今世都唔會放手架啦!」我摸著嘉欣個頭講,佢冇回應,呢刻佢微笑地哭泣著。

過左一陣,嘉欣就冇咩點再喊,不斷地用佢水汪汪既眼睛凝望著我,我都當然望返佢。呢刻我咩都唔會再理,只係想同溫嘉欣相愛著。

「賢賢⋯⋯你頭先同欣欣講既野係咪真架?你要做欣欣既男朋友啊?你唔會為左⋯⋯」嘉欣怕怕羞羞,細細聲地問我。

「我真心鐘意你架!除左你⋯⋯我唔會再鐘意任何人,我只想你可以安心做我女朋友。我知道我係你心目中未必係100分既男朋友,但你係我心目中永遠都係100分既女朋友。應承啦好嗎??」我話。

嘉欣冇回應我,只係對我微笑點頭。然後佢就主動Kiss我既嘴唇,就好似20年前我係呢到Kiss佢,我做到啦!20年前我對佢既承諾,就係今日終於兌現到。嘉欣而家已經係我女朋友。呢個Moment應該係我成世人最開心既Moment,比起有得升職加薪,都唔夠嘉欣可以做我條女咁開心。



「我鐘意你啊,盧頌賢!」

「我鐘意你啊,溫嘉欣!」

我地向對方表白後,大家既緊貼自己既額頭,然後我托起嘉欣個下巴,Kiss佢一下。我知道好多人係到望緊我地,但係I don't care,因為冇野可以取代到嘉欣,包括我呢份工。
 
已有 0 人追稿