「好!約實下次㗎啦!」英叔笑說

「九叔啊,你個徒弟…」王奇倏然望向九叔

「我都正想問啱啱嘅情況」王奇說的剛好合九叔的意

「佢跟咗你幾耐?」王奇先問九叔

「幾個月左右」





「幾個月…咁佢都算好有天份」王奇回想著剛剛短暫的戰鬥

「係?」九叔冷冷笑著,嘴角偷偷上揚

「嘩!你睇下你,人地讚下你徒弟姐,你就含春咁笑,洗唔洗啊」英叔指著九叔嘲諷

九叔看一眼英叔,也懶得作反應

「佢係差啲臨場經驗,啱啱隻色餓鬼都係佢收尾,一劍穿頭」王奇說出剛剛的情況





「嗯,我知點安排」九叔聽到後,腦內已萌生了一個想法

「咁另一個呢?我記得上次係殮房係見到兩個」

「另一個其實更有天份,不過佢為人太急,唔肯擺時間,想一步登天,要慢慢教」九叔對啊仁的嚴格也不是毫無根據

「九叔,你努力啲教好佢地,咁你兩個就唔洗做得咁辛苦啦」王奇拿出一個細布袋,蹲下查看地上的綠血灰燼

他打開布袋,雙指凌空畫符





咻!!

布袋瞬間吸入地上所有灰燼,王奇將布袋索緊收到褲袋裏




「英叔九叔,我要返去,廢事我老婆問點解咁夜都唔返去」

「好,下次再傾」九叔轉身往象山走去,英叔跟在其後

「嘩!啊奇!咁記得下次帶我去見你老豆啊」英叔回頭再說

「好!得!」王奇揮手再見





而剛剛,我送夢晞回去的路上

「其實你地跟九仔係學咩?」夢晞突然問我

「呃….你有興趣知?」她突然這樣問,我也一時不知怎說

「嗯」夢晞點頭

「你都做咗法醫咁耐,應該都見過九叔出手同唔少古怪野啦,就好似啱啱咁」

「其實我不嬲都唔信依啲,所以冇特登問九仔,我相信科學,啱啱個啲只係未解釋到嘅科學現象」夢晞選擇對剛剛的事用「科學」來掩飾

「好~你堅持自己諗法都啱嘅,不過我跟九叔學緊嘅就係應付日常工作需要用到嘅野」

「你同啊仁都信?」





「信啊,當你經歷過,你就冇得唔信….」回想起泰國那次的經歷…也是一額汗

「唔緊要啦~就算大家信嘅野唔同都唔會影響我地做朋友嘅」夢晞左右擺頭

「唔知你有冇同我同一種感覺….」我剛說到一半

「我地好似好熟咁」夢晞就接著說出我想說的

「係….我就係想咁講,明明唔係傾過好多次計,但就好熟悉」我尷尷尬尬的說著

「其實我一早有咁嘅感覺㗎啦,我什至覺得我地之前係識嘅」夢晞原來比我還要早感覺到熟悉感

「我啱啱都覺得自己唔係第一次救你….個感覺,好奇怪」





「我有問過九仔㗎,佢話可能係上世結緣~哈~我都係聽下就算」

「上世….如果可以我都想知自己上世做過啲咩識過咩人」我仰望天空,這晚的天空雲少星亮

「今日個天,好靚」夢晞又跟我想著同一樣的事情

我倆同時望向大家

「……」

「嗯…….」

大家定格看著大家的眼睛,沒說話,氣氛變得有點曖昧









叮~鈴~叮叮

噹噹~叮~

我和夢晞的電話同時響起,鈴聲把我倆拉回現實

「呃….我女朋友搵我…」我看一看手機是洛兒的來電

「嗯….我老公都打比我」夢晞也尷尬的拿起電話

我們自覺的分開兩步

「喂~洛兒,做咩啊?」

「冇啊~姨姨搵我話你一直冇覆佢,我見我wts 你都冇覆,驚你有事咪打比你~」

「啊!我唔記得睇手機,我冇事啊~學野學遲咗咋嘛~啱啱係九叔屋企走啦,依家返去啦」剛剛的突發事件令我無暇抽身玩手機

「你下次點忙都覆一覆你啊姨啦~佢擔心㗎」洛兒的聲線是依舊的溫柔

「好啦~我知啦,我返到去再同你講」

「好~咁夜返去小心啲啊」

「收到!冇問題」

我這邊電話掛斷
已有 0 人追稿