［打鬥/靈幻/鬼怪］《輪迴。道》/《噬魂》我由古惑仔變咗做現代道士: 407《第二季》

「咩原來係咁咋？！！陳天航！你知唔知我等咗幾耐先等到你變啊！」洛兒大反應的說

「邊有咁誇張啊？我以前好差咩！」我反駁

「唔差嘅～不過可以再好啲囉～」洛兒用調皮的語氣

「你講咩話衰妹，我比機會你講多次」我嚇她說

「冇～我咩都冇講過～你最好添～」





「算你啦」

「不過肥仔啊….」洛兒突然又轉了態度說話

「下？又嚟？！做咩啊？！」我一臉疑惑

「其實….你有冇諗過轉工？就算轉咗工都可以跟九叔學野㗎嘛」洛兒吞吞吐吐的說出

「你啊爸叫你講㗎？」一說到這些話題，氣氛就變的嚴肅





「呃…唔係啊，唔關佢事㗎～係我自己想問你咋」洛兒口窒窒的說，心虛了

「嗯～以你咁嘅反應，即係我估中咗啦～」

「唔係啊～佢係關心我地第日如果結咗婚生活會困難咋….你唔好嬲啦」

「我唔係嬲啊…..只係…唉唔緊要啦」我也無力說什麼

「你不如真係考慮下，嚟我公司做野？」洛兒試探的說出





「你又嚟啦….上次咪講咗，我唔中意你公司啊嘛」我有點不耐煩

「唔係啊….其實爸爸都講得啱㗎，為咗我地未來，係咪應該要計劃一下？」洛兒認真的說

「嗯….我會考慮」我說

「好啦，你真係唔好嬲啊」洛兒還在怕我生氣

「我唔會，我攰啦，我地早啲瞓啦」這刻我只想一人靜靜

「咁好啦，早抖肥仔」

「早抖」

這夜，注定又是失眠的一夜….





翌日，我跟啊仁故事請了上午假去接王奇出院

但我們倆去到時，已經有一人比我們早到了

「我仲以為你唔會嚟添，搞到我地請咗半日假」我對著那人說，那人當然就是夢晞

「你地嚟咗咪好，幫手抽野」夢晞輕挑的笑說

「你唔係嬲咗佢…地㗎咩」啊仁先指著我，但被我盯了一眼後馬上轉指王奇

「我嬲人好少會嬲過夜嘅～同埋嬲還嬲，佢受咗傷唔通我唔理佢咩～」夢晞說著說著，真的把他們的東西都塞了給我








「我幾時都話老婆最好㗎啦」王奇上前想抱住夢晞

「慳啲啦你」夢晞把他推開

「咁就唔該你地啦」王奇看向我們說

然後頭也不回的拖著夢晞離開病房

「啊！條友仔就咁行咗去喎！」啊仁看著我手上的東西說

「算啦，人地兩公婆和好，你咪當幫下兄弟囉」我把手上的兩袋東西，其中一袋遞給了他

「唉～無計啦～鬼叫我仁哥好人咩，做好人就係要蝕底啲㗎啦」他接過我手上的袋





「行啦！仁哥！」我一巴掌推在他的頭上

把王奇送回家後我和啊仁就差不多時間要回殮房，剛好還有點時間吃個午餐

「其實呢，我想問好耐㗎啦，你同呂醫生係咪有啲野姐～？」啊仁突然問我

「咳！…..」驚我一跳的問題，害我差點把口裏的飯都噴出來

「緊係冇野啦！你亂講啲咩啊」我調整好呼吸後馬上回答他的問題

「唔係呢，你地成日眉來眼去咁，好似關係非淺喎，依到得我地兩個，唔怕講喎～」啊仁用猥瑣的表情看著我，還要一直在戚眉

簡單一說，就是一副欠打的表情

「痴線啦，真係冇野啊….只係咁啱同佢啱傾，好投契姐，況且佢有老公，我又有女朋友」我馬上釐清關係，不要讓人誤會





「傻嘅！佢有老公！你有女朋友！咁咪打和囉！」啊仁興奮的說

「戇鳩….食飯啦！比洛兒聽到我就打柒你！」我反他白眼

「唔係呢….」他還想繼續說

「你再講我就一刀插死你」我拿起餐具盤裏的餐刀

「食飯囉～食飯啦～」啊仁擺著頭的吃飯，真的非常欠打

食完飯後我們回到殮房工作

「啊奇情況點？」九叔問我們

「佢冇乜啦，精精神神，仲識點我地幫佢拎野」我說

「嗯，仲有，你地英叔叫你地聽晚上嚟食飯，你地叫埋啊武」九叔輕輕點了頭後，隔幾秒後又說

「好啊！反正我一定得閒嘅！」啊仁聽到馬上答好

「我都可以啊，同啊武講聲，佢應該都冇問題」我也點頭

「如果女朋友得閒，帶埋佢」九叔居然主動提起洛兒

「係喎！九叔未見過洛兒㗎喎，咁帶埋佢嚟啦！」啊仁在旁搭嘴

「點解你講到你好似見過洛兒咁」我不解的看著啊仁

繼而再跟九叔說

「好啊，我會同佢講聲」