［打鬥/靈幻/鬼怪］《輪迴。道》/《噬魂》我由古惑仔變咗做現代道士: 580《第二季》

「點啊死仔？？」英叔問

「見到….一個光頭佬，佢好高大」葉尚生進入了意識界

「光頭佬？」陳天航聽到葉尚生說這句時有點反應

「係，我同佢交緊手….佢好犀利…」

「唔止我一個….仲有..啊烈，佢同我一齊聯手」





「我？」 啊烈聽到自己有份也馬上專注點

「我地兩個都唔係佢手腳！」葉尚生額前開始冒汗

轟隆！！外面又是一聲旱天雷

「啊！！！」葉尚生突然大叫，並把手鬆開了，雙腳發軟，軟坐在地

「嗄…嗄…..嗄…..」葉尚生突然背汗淋漓，滿面冷汗





「死仔！咩事啊？！」英叔和葉靈馬上上前關心

「呼…..我比個光頭佬打穿咗個肚」葉尚生還有點魂魄未定

「個光頭佬會係咩人嚟，咁犀利…..連你都唔係佢對手」啊武認真的問

「如果我冇睇錯…佢係殭屍，仲要唔係低級個隻」葉尚生擦去額前的汗，在英叔和葉靈的扶助下站起來

「我諗我識佢….羅東」陳天航突然說出羅東的名字





「啊航，你又識？！」眾人對陳天航又認識一個敵人感到好奇

「如果我冇估錯，啊生口中講嘅光頭佬應該就係上次個兩個人嘅同伴——羅東，佢係段天嘅近身保鏢，我見過佢」陳天航說

「又係佢地，嗰個段天到底係咩人啊？身邊個個都係怪物」啊武無奈說道

「武仔，你唔會咁天真，仲覺得嗰個咩段天會係普通人啊嘛？」英叔忍不住說

「我試下再睇多次，睇下可唔可以睇多少少」葉尚生再次伸手去握住畫龍戟

「量力而為啊死仔，攰就抖下先啦」看得出英叔對葉尚生很是關心

「我得嘅」葉尚生點頭說

「點解生哥好似睇完啲畫面就咁攰」啊烈問出一句





「烈哥仔，唔係你估同靈器連結係咁易㗎，淨係咁樣睇下畫面就已經接近抽乾死仔嘅體力咁淨㗎啦」英叔解釋道

「明白…」啊烈點頭

「我今次見到唔係我地….係…」葉尚生又是汗流滿面

「係咩啊？」英叔問

「好亂…好多人，係戰爭，但唔係依家，似係古代」

「三界大戰嘅畫面？」

「應該係…」葉尚生也還沒清楚





「我見到…」

「咩啊？？」

「有個好似啊航嘅人…但老好多」

「有啊航？？佢做緊咩啊？」

「佢作緊手印、施緊法….」

轟隆！！！一聲極響亮的雷聲

「嘩！！！」葉尚生突然大叫一聲往後倒地

「死仔，你唔係啊嘛？哈哈哈！男人老狗比個雷嚇親？」英叔笑著挖苦葉尚生





「唔係啊！係啱啱行雷個一下突然有個人企咗係我面前！」葉尚生解釋說

「有個人企咗係你面前？但你睇到嘅應該係過去嘅畫面，唔可能有人望到你㗎喎」

「我都唔知啊….但我好肯定佢係望住我」葉尚生被嚇了一驚

「嗯～其實你地都唔洗知發生過咩事啊，好好過你地嘅生活咪好囉」陳天航突然說出奇怪的話，語調也跟平常不同

「搞咩啊啊航你，講野怪怪地嘅」啊烈第一個發現陳天航的不妥

「老野」英叔叫了一聲

「嗯」九叔也馬上點頭回應





「𡃁仔，你過嚟」英叔向陳天航招手

「我？」陳天航表情有點疑惑

「我叫𡃁仔啊嘛，緊係叫你啦」英叔眼神銳利的看著陳天航

啊烈和啊武好像也懂英叔九叔的想法，二人向陳天航踏近一步

「咩事啊你地？」陳天航問眾人

「𡃁仔，伸隻手出嚟」