誰才是我？誰才是你愛的我？: 序章

兩位女生，慢慢步進理工大學。

「喂，個sem就完，我覺得我地應該 ...」其中一人先開口。
「應該好好休息，同埋諗下去邊度玩！」
「唔係囉，果個好摺嘅校草今年Grad啦，不如去望下佢？」
「有咩咁好望？咪又係人一個。」
「我一直好想知佢係咪好似人地講咁摺，照計校草應該好受女仔歡迎，真係會有一個日日鎖自己係圖書館嘅校草咩？」
「人講你就信 ...」
「所以咪去求證囉，你當我八掛，陪我去睇下啦好冇？」
「好啦好啦 ... 怕左你 ...」



步進圖書館 ...
「呢度！」
兩人飛奔到最角落的桌子。
「校草！」
「喂，校草，叫你呀 ... 你又有fans搵上門啦。」桌子旁的女生輕推正在埋首macbook前的男生。
「下？」男生嚇得把手中的書本全掉到地上：「咩 ... 咩話？等等 ... 張 ... 張paper呢？」

「好得意呀你！」
「原來你真係咁摺嫁！」


「睇下佢，只係掛住疊paper！」

「家姐 ... 救 ... 救命 ...」
「唉，咪搞佢啦！」
「唔係呢，佢真係好得意好cute呀！」
「校草」被肆意玩弄 ...

身為姐姐的 ...
「喂！睇夠望夠就走啦，阻住我細佬做paper，佢grad唔到係咪你兩個負責呀？」大吼一聲，「吵醒」整個圖書館的人。
「得得得，睇夠 ...」兩女急步離開，臉上仍擺脫不了興奮。



「家姐 ...」
「白痴仔！你睇下你！」

----------

觀塘樂華邨 ...
「阿爸，我地返黎啦！」姐姐先開口。
「你兩個返得黎岩岩好，煮落飯啦，入黎幫手。」

弄好桌子，放好飯菜 ...
「阿雪！你又偷食！」爸爸從廚房向口中咬著菜心的阿雪大吼。 「唔食囉 ... 阿爸，又豉汁蒸烏頭，次次你都就周若風，搵次就我唔得?！」
「平呀，你估屋企好多錢？你細佬又鍾意食，咪買囉，仲有，邊個話唔就你？」爸爸手上捧著一碟咸魚蒸肉餅。
「蒸肉餅！都係阿爸錫我！」阿雪待爸爸放好碟子，大送一個深情的擁抱。
「挑！搵鬼信！咦？阿風呢？」


「衝左入房啦，個傻仔到而家都未做好份paper，日趕夜趕，抵死！」
「你做好啦咩？成日都咁得閒嘅？」
「龍生，你都知，你個女聰明過你個仔幾多嫁啦！」

----------

這就是 ... 我的家。
有一個 ... 長得很美但總是取笑我的攣生姐姐，但其實待我很好 ...
有一個 ... 跟我和姐姐不同姓的親生爸爸，也待我很好 ...
怎麼不同姓？
對，爸爸姓龍，全名龍天賜。
我和姐姐，是跟媽媽姓的。
她叫周若雪，我叫 ... 周若風。
聽爸爸說，小時候我和姐姐出生不久，媽媽就把我倆帶走，但過了不夠一年又拋下我們。
爸爸不忍，把我倆接回來，父兼母職的把我倆養大。


我曾問爸爸，用不用改回姓龍，我還記得，當時他這樣回應：
「姓乜都好，咪又係我個仔，你到時想改咪改囉，老竇冇所謂。」
爸就是這樣的隨和。

至於姐姐，除了從小到大都愛取笑我以外 ...
「喂，周若風！」姐姐把一大碗盛滿?菜的熱飯放在電腦桌後，步出房間。
「唔該 ...」
她總是口硬心軟。
她很寵我，也很保護我。
甚至 ... 比我更像男生。

或許，只是我太怕事吧 ...
我是那種 ... 緊張便出現口吃的人 ...
而我一看到人，對，是人，一個也好，我都會變得緊張 ...
所以，我總是口吃，也最怕到人多的地方。


姐總是拿這事情取笑我 ...
「周若風，你到底可唔可以講到一句完整句子嫁？」
「呃 ...」
「唉，你真係冇得救。」

----------

而「校草」 ...
絕對拜我親愛的姐姐所賜。

「喂，周若風，咪再3mm好冇？」
3mm是髮型屋術語，電剷弄出來的最短效果。
唸中小學時，我都是一次3mm，待三四個月，頭髮都長出來後，又一次3mm。
「有 ... 有咩問題？頭髮剪完 ... 咪 ... 咪 ... 又長過 ...」
「周若風，你而家同我去剪個正常頭！大佬你係個大學生，執正少少好冇？」



這是我剛上大學後，又要去弄3mm時的事。
姐把我帶到一間髮廊，「命令」髮型師把我弄得最帥。
結果，我被弄了一個「飛落海頭」。
第二天更立即被一大堆女生「狙擊」。

「嘩！阿風你搞咩靚仔左咁多？」
「平時剪平頭裝真係唔覺，而家咁咪幾好！」
「你而家去選校草都得呀！」
「校草！校草！」

就是這樣 ...
接下來數年的大學生活，認識我的全人類都戲稱我為校草。
當然，只有軀殼而已。
怕事的性格壓根兒沒丁點改變，當然漸漸演變成「最摺的校草」。
其實 ... 我無辜的，好嗎？