［愛情純愛］由嗰一個Kiss開始，我地唔再係青梅竹馬: 01. 界線

宋千辰企喺E班嘅班房門口，猶疑緊陣間入到去課室之後要點樣同梁玥嘉打開話題，喺猶疑咗好一會之後，宋千辰都係鼓起勇氣邁步行入去課室

「我行得啦，可以番去。」宋千辰好努力咁壓抑住自己嘅緊張，假裝淡定如以往咁行到去梁玥嘉嘅座位前

課室裏早就空無一人，因為已經過咗放學時間好一陣，只不過因為宋千辰啱啱比老師叫咗去幫手，所以先會遲咗，而佢叫咗梁玥嘉喺課室等埋佢先一齊走

「嗯，行啦⋯」梁玥嘉冇抬起頭望宋千辰，兩人嘅視線冇交集，梁玥嘉只係默默地企起身孭起書包然後行

兩個人一齊行，但喺二人之間卻相隔咗一少段距離



梁玥嘉一係耷低頭望住地下，一係抬起頭望住正前方或者左方，偏偏就唔望向宋千辰所在嘅右邊；宋千辰一直覺得有啲唔自在，只好一直望住前方行，兩個人都覺得同對方行埋一齊好尷尬

兩個人行到去同一幢私人住宅大樓，一齊行入升降機，兩個人同時伸手朝向同一個樓層，兩人嘅手指碰上對方嘅手，梁玥嘉同宋千辰嘅反應都係第一時間都係嚇咗一嚇然後縮開手，最後係宋千辰㩒下寫住「16」嘅樓層

升降機入面瀰漫著濃濃嘅尷尬氣氛，兩個人明明企埋一齊但係卻尷尬無比，大家都唔望大家，亦都唔講嘢

「叮！」升降機去到16樓，門打開，兩個人先後行出去，然後同樣地轉向升降機嘅左手邊

宋千辰見到梁玥嘉行咗去隔離B室嘅門前拎出鎖匙，而唔係同佢一齊喺A室嘅門前等佢開門



「嘉嘉，阿姨唔係叫你過嚟食飯咩？」宋千辰終於開口講嘢，結束咗dead air嘅狀態

「嗯，我換件衫再過嚟⋯」梁玥嘉望向宋千辰，露出一個尷尬嘅微笑，然後瞬間移開視線，鎖匙一扭將厚重嘅木門推開

「嗯⋯」宋千辰嗯咗一聲，見到梁玥嘉移咗入去隔離嘅單位，閂上門之後佢先推門行入A室

梁玥嘉同宋千辰係鄰居同時係青梅竹馬，兩個人讀同一間幼稚園、同一間小學、同一間中學，兩個人一齊長大，彼此嘅父母都認識，兩人亦都已經識咗好多年，由K.1去到F.6，今年已經係認識嘅第17年末

宋千辰或者梁玥嘉以前好常會因為屋企冇飯食而去對方屋企食飯，因為雙方父母都要為口奔馳，有時實在係忙得太緊要，所以都會拜託對方家照顧孩子，雖然宜家因為已經大個而冇咁經常出現呢啲情況，不過去對方屋企食飯嘅事都係有發生



本來宋千辰同梁玥嘉嘅關係就係單純嘅青梅竹馬關係，係對方最親近、最了解自己嘅朋友一樣，對於朋友以上嘅感情，除咗好似屋企人一樣嘅親情外，應該唔會有其他⋯但就喺半個月前，出現咗兩個人嘅感情轉捩點

⋯

半個月前

「其實識咗你一段時間，我覺得你個人幾好⋯」一個女仔企喺宋千辰嘅面前，表情有啲羞澀，臉頰上泛起淡淡嘅紅霞講道，「我覺得我地幾襯，所以想問你，可唔可以同我一齊，因為我中意咗你⋯」

企喺眼前嘅呢個女仔係喺一年前宋千辰喺Joint School Activity識嘅女仔，佢就喺隔離嘅女校就讀，叫邱凱棠，佢生得幾標緻，性格亦唔差，可以話係一個「荀盤」嚟，正常嘅男仔一定會受佢嘅表白，正常男仔嘅話⋯

邱凱棠嘅表白冇令宋千辰覺得驚訝，宋千辰反而好冷靜，因為佢早就喺其他人嘅口中得邱凱棠要同佢表白，所以佢亦一早諗好咗一個對應方案去搪塞一下

「Ashley，對唔住，我已經有女朋友。」宋千要一臉冷靜咁講道，然後望向後方，「嘉嘉！」

早就答應咗宋千辰會幫佢一把嘅梁玥嘉行出嚟，行到去宋千辰嘅身邊，毫不緊張地望住邱凱棠，只係微微一笑點一點頭以示禮貌



「你唔係話你單身㗎咩？」邱凱棠一臉驚步，同宋千辰嘅冷靜形成咗一個極大嘅對比，「邊會突然有女朋友？」

「我同嘉嘉係青梅竹馬，一早就已經一齊咗，只不過冇人問起所以我先冇講我有女朋友。」宋千辰牽起梁玥嘉嘅手，兩個人嘅舉動都好自然，因為以前細個嘅時候都拖過手，宜家嘅佢地都係平常心咁去做呢一齣戲

「冇可能！你搵佢同你一齊做戲厄我㗎？」邱凱棠唔相信呢個「事實」，「你證明呀！你點證明佢真係你女朋友呀？」

宋千辰同梁玥嘉都冇預料到呢個女仔會要求佢地證明佢地嘅情侶身份，呢個係意料之外嘅事，但都嚟到呢一步，呢齣戲一定要做埋落去

宋千辰假裝無奈，然後將梁玥嘉拉咗一下，梁玥嘉整個人轉咗90度，然後臉帶着少許愕然咁抬頭望宋千辰，宋千辰諗都冇諗，手放到梁玥嘉嘅臉頰上，指尖掃過梁玥嘉着臉頰，食指放喺佢嘅下顎下，捏住梁玥嘉嘅下巴強制性要佢抬頭

宋千辰同梁玥嘉對望，就喺下一個宋千辰瞬間直接就吻喺梁玥嘉嘅唇上，梁玥嘉嘅腦海瞬間就空白咗，邱凱棠都不禁瞪大眼，眼裏滿是失望同震驚






IG Link: https://www.instagram.com/nd_cotttoncandy/?hl=zh-tw