［愛情純愛］由嗰一個Kiss開始，我地唔再係青梅竹馬: 09. 對峙

梁玥嘉雙腳踩到地上，著番睡拖之後起身行去開門，見到宋千辰企喺佢家門前，手上拎住一盒嘢

「媽媽買比你食，拎住啦⋯」宋千辰嘅腦袋都未完全從Kiss嘅觸感中回神過嚟，佢嘅視線無意地落喺梁玥嘉水潤嘅唇上，瞬間覺得耳根、臉頰都要發紅發熱，「拎住啦！」

「哦。」梁玥嘉接過盒蛋糕，然後拎住蛋糕行入廚房，當梁玥嘉喺廚房行番出嚟嘅時候，見到宋千辰仲企喺門口，「你仲企喺度做咩？」

「吓，冇⋯」宋千辰比梁玥嘉問嘅問題搞到口都窒埋，即刻好似平日冇事一樣傻傻一笑，然後欲轉身行番去隔離單位

呢一刻，宋千辰自己都覺得有啲疑惑，覺得有啲奇怪，自己點解會出現一個咁嘅反應呢？其實都只係正常不過嘅問答模式，但自己點解會係咁嘅反應？



梁玥嘉望住呆企喺門前嘅宋千辰，一臉疑惑咁微微側側頭，然後遞起手放到宋千辰嘅面前晃咗兩下

「你仲企喺度發咩呆呀？」梁玥嘉挑起一邊眉，疑惑咁望住宋千辰，「仲有嘢？」

「唔係。」宋千辰回過神，但卻仍然好似未完全清醒一樣，呆呆地搖頭，抬眼望梁玥嘉

宋千辰一個踏步行到梁玥嘉嘅面前，梁玥嘉比宋千辰突如其來嘅舉動稍微嚇咗一下，佢抬起頭同宋千辰對望

喺宋千辰清澈嘅雙眸中，梁玥嘉可以從中見到自己嘅倒影，佢嘅雙眸總係如此清澈，清澈得可以見到星河一樣



「嗯？」梁玥嘉先用喉嚨發音將沉默打破

「你真係冇唔開心？」宋千辰認真咁望住梁玥嘉問道

「吓⋯？冇呀⋯」梁玥嘉滿頭問號，但卻好似慢咗半拍先回答過嚟咁

「嗯。」宋千辰點一點頭，「陣間試下個蛋糕啦！」

宋千辰講完之後就行番去A室嘅門口，門仍然打開著，梁玥嘉呆咗兩秒之後先行番入屋閂上木門



宋千辰一番到入屋就即刻行番去梳化坐低，雙眼望住電視機，但係佢嘅雙眼卻係放空着，因為就喺啱啱嗰刻，佢心中忽然產生咗一個從來都冇出現過嘅念頭，喺同梁玥嘉「對峙」着嘅一刻，佢忽然想見多梁玥嘉一面，想搵一個借口令佢可以望佢多一秒

呢個想法令佢自己嘅內心都有啲愕然，宜家一冷靜咗落嚟，宋千辰就不禁喺心中問自己做咩突然會有咁嘅想法

喺隔離屋嘅梁玥嘉喺閂上木門之後行到去廚房，喺雪櫃中拎咗啱啱拎到嘅蛋糕出嚟，放到去旁邊嘅櫥櫃面上小心翼翼咁打開

「哦～好靚呀～」梁玥嘉望到盒中嘅四件蛋糕時不禁驚呼道，佢下一個瞬間就行出咗廚房，行番入房拎手機

梁玥嘉打開IG嘅相機，幫蛋糕影咗張靚靚嘅相之後就po咗出story，然後又小心翼翼咁將蛋糕盒閂番埋，放番入雪櫃中

梁玥嘉喺閂上雪櫃嘅一刻，忽然諗起宋千辰啱啱望住佢嘅時候認真嘅表情

「佢係咪有嘢想講？」梁玥嘉企喺雪櫃前喃喃自語，獨自沉思咗一陣之後又自言自語道：「算啦～應該都唔係啲咩重要事啫～」

宋千辰留意到梁玥嘉喺story po咗嘢，平日都唔會特別在意嘅佢，今次卻有啲好奇到底梁玥嘉po咗啲咩



「收到blink blink嘅蛋糕～」story中寫咗一句，如此簡單嘅一句卻令宋千辰嘅嘴角上揚了

宋千辰回覆梁玥嘉嘅story：「邊個拎過嚟比你咁好？」

「幫我多謝呀姨～」梁玥嘉好快咁回覆道，仲要send咗一個紅色心心

一個emoji，令宋千辰瞬間紅了臉頰，心臟快速地跳過不停，點解⋯？宋千辰like咗梁玥嘉嘅訊息，然後將手機嘅螢幕鎖上，心放到臉頰上，似乎感覺到臉頰嘅溫熱

「搞咩⋯」宋千辰問自己，「奇怪呀⋯！」

⋯

翌日放咗學之後，梁玥嘉同宋千辰就好似平日一樣一齊行番屋企，但喺番屋企之前，佢兩個一齊去咗M記食嘢



「你都係照舊㗎啦～」宋千辰放低書包喺梁玥嘉對面嘅座位

「嗯。」梁玥嘉好似逃開宋千辰嘅視線一樣，唔望宋千辰，只係遞咗$50比宋千辰

宋千辰心中覺得怪怪的，但係佢都冇多問，默默地拎住銀包行出去買嘢食

事源係今日嘅lunch time，梁玥嘉、楊楠恩同李穎容一齊食lunch嘅時候咁啱講起戀愛話題，於是就好似挖咗一個坑咁，楊楠恩同李穎容兩人忽然將話題嘅中心放喺梁玥嘉嘅身上

「你同宋千辰成日出雙入對，又識咗咁多年，真係冇感覺咩？」楊楠恩忽然將重心放到梁玥嘉身上，「你冇諗過要同佢一齊之類咩？」

梁玥嘉聽到楊楠恩嘅說話，輕微地顫了一下，第一次會喺聽到同一個問題時覺得腦袋一片空白，或者只係等緊有人可以問出呢一個問題，開始要正視一下自己一直以「冇可能」呢個理由而埋藏著、壓抑著嘅感情






IG Link: https://www.instagram.com/nd_cotttoncandy/?hl=zh-tw