［愛情純愛］由嗰一個Kiss開始，我地唔再係青梅竹馬: 10. 不一樣的態度

「冇喎⋯」梁玥嘉依舊答出同一個答案，但佢今次，語氣又好，內心都好，都多咗一份猶疑

身邊嘅人對佢嘅呢一份猶疑，的確係難以察覺，但梁玥嘉自己最清楚，佢知道自己回答嘅時候都少咗一份堅定，多咗一份猶疑不定

「你係咁諗啫，宋千辰會唔會都係咁諗呀～」李穎容托着腮，揚起嘴角笑道，唔完全講明，令成句話嘅意思變得格外曖昧

楊楠恩望一望李穎容，然後望向梁玥嘉，眼神裏有明顯嘅愕然，佢冇諗到李穎容會忽然間咁樣講

「可、可能宋千辰都係咁諗呢～」楊楠恩好似有啲慌張咁講道，然後又連忙微笑起嚟



「好難講㗎～」李穎容望向楊楠恩意味深長地笑咗一笑，「宋千辰對玥嘉嘅態度都唔一樣啦，難保佢對玥嘉冇嗰種感覺㗎～」

「咪亂講啦⋯」梁玥嘉無奈咁講道，拎住叉將意粉卷起

梁玥嘉若有所思地耷低頭望住眼前嘅意粉，手托住腮，楊楠恩見到梁玥嘉沉思嘅模樣，臉上嘅笑容都微微塌下咗一下

「好啦！快啲食嘢啦！嘢食都凍啦！」楊楠恩拎起叉，微笑道

⋯



「喂！」宋千辰將餐盤放喺面前，佢同梁玥嘉對住坐

宋千辰將薯條倒咗啲出嚟，打開麥樂雞嘅紙盒，撕開甜酸醬嘅錫紙，準備食嘅時候見到梁玥嘉仲呆咗喺度

「發咩呆呀？」宋千辰伸出手，一下子就拍落梁玥嘉嘅額頭上

梁玥嘉因為呢一拍瞬間回神，皺起眉頭，稍稍抬眼瞪住宋千辰，手放喺額頭上摸咗兩摸

「發咩呆啫？食嘢啦！」宋千辰拎起薯條，沾咗茄汁之後放入口，「陣間比我食晒㗎啦！」



梁玥嘉冇答佢，只係自顧自的食嘢

「搞咩呀？我做錯嘢？」宋千辰心中有啲不解，望住梁玥嘉最近對佢嘅態度好似比以前冷淡咗啲咁，佢以為係咪自己做錯咗啲咩，「反叛期？唔會呀⋯我最近都冇得罪佢啲咩呀⋯」

宋千辰一邊食嘢，腦海中滿滿嘅問號，獨自苦惱着

「平時喺學校都冇嘢㗎⋯」宋千辰喺心中講道，佢稍稍抬眼望向梁玥嘉，梁玥嘉正一手拎麥樂雞，一手拎住手機睇，「唔通係唔想同我單獨一齊？都咁多年啦，有咩介意⋯」

梁玥嘉耷低頭睇手機，唔望宋千辰亦唔同宋千辰講嘢嘅原因係因為佢一望到宋千辰個樣就諗起今日食lunch嗰陣李穎容佢地兩個講嘅嘢

「忽然講埋啲咁嘅嘢⋯」梁玥嘉喺心中抱怨道，「但我點解會猶疑嘅⋯？」

「嘉嘉！」宋千辰喺深呼吸之後定睛望住梁玥嘉，梁玥嘉緩緩抬起頭，彷彿要做好心理準備之後先可以望宋千辰一樣將動作放慢

「嗯？」梁玥嘉望住宋千辰，宋千辰一臉誠懇咁望住梁玥嘉，「做咩呀⋯」



「冇呀，你嬲呀？」宋千辰一問，梁玥嘉隨即擺出一副摸不著頭腦嘅表情，手自然咁將手機嘅螢幕鎖上，呢個微少嘅動作宋千辰留意到

「吓？」梁玥嘉嘅眉頭輕輕一皺，「嬲咩呀？」

宋千辰冇答，只係默默咁望住梁玥嘉，雙眼微微用力撐大，梁玥嘉一頭霧水咁望住宋千辰

「冇嘢⋯」宋千辰見梁玥嘉冇答便稍微壓低聲線吐出兩個字，然後微微耷低頭，目無表情咁繼續食嘢

梁玥嘉頭微微耷低，抬眼望咗宋千辰一眼，本來拎住薯條嘅手提起，將薯條放入口中，用沾了鹽嘅姆指同食指再次拎起另一條薯條，但今次佢冇直接將薯條放入口中，動作懸喺半空停咗落嚟

「你⋯」梁玥嘉先係細聲咁吐出一個單字，宋千辰聽到梁玥嘉開口講嘢便抬起頭望住梁玥嘉，梁玥嘉帶着好奇心同少許猶疑再次開口，「你有冇諗過如果我地都搵到自己嘅另一半之後會點⋯」

宋千辰聽到之後，心中忽然響起「咯噹」一聲，好似有啲咩跌咗落嚟令佢頓時醒起嚟一樣，宋千辰腦海中浮現出嘅第一個想法係梁玥嘉已經遇到自己中意嘅人，所以最近先會對自己冷淡咗落嚟



「做咩呀？你有中意嘅人啦咩？」宋千辰好似平日一樣揚起嘴角笑起嚟，但呢一刻嘅佢卻覺得有啲沉重，一如往常嘅笑容喺一瞬間變得好沉重

將呢句話問出口時，心臟跳得快而難受，感覺就好似心臟比一塊大石頭壓住一樣，想跳得快，但卻因為石頭嘅重量而呼吸得格外辛苦

「唔係⋯只係問下⋯」梁玥嘉感覺到宋千辰嘅唔自然，所以佢都覺得唔自在一呢種「直覺」源自於佢對宋千辰嘅了解，「我地都識咗咁多年啦，將來總會有自己嘅生活，唔再係我同你兩個人成日一齊。」

梁玥嘉托住頭，將薯條放入口中，看似平日一樣嘅微笑中暗藏咗一份難以言喻嘅傷感；宋千辰第一次聽到梁玥嘉認真咁呢啲事，緩緩地收起咗笑容




IG Link: https://www.instagram.com/nd_cotttoncandy/?hl=zh-tw