「你係咪有中意嘅人啫?突然講啲咁嘅嘢⋯」宋千辰認真地講道,然後又喺臉上掛上咗淡淡嘅笑容,「如果係嘅話,咪直接講,大家識咗咁耐⋯我會替你開心㗎啵~」

梁玥嘉心中覺得有啲愕然,佢望住宋千辰,但宋千辰唔敢直視梁玥嘉,只因為宋千辰心虛,啱啱講嘅「會替你開心」嘅說話,只不過係表面嘅說話,根本就唔係佢內心嘅說話

喺啱啱佢講出「會替你開心」嘅說話時,佢嘅內心只覺得比大石壓得更重;喺梁玥嘉定睛望住佢嘅時候,心中閃出一絲害怕同擔心,怕梁玥嘉會答佢:「嗯,有中意嘅人。」所以只好假裝自然咁移開咗視線,一邊掛着看似平凡嘅笑容,一邊食麥樂雞

梁玥嘉見到宋千辰嘅笑容一轉眼又悄悄塌咗落嚟,心中忽然感覺到一絲甜絲絲嘅感覺

「冇呀,只係隨口問下啫~」梁玥嘉笑起嚟,「好驚我有中意嘅人咩?」



「痴線!」宋千辰第一個反應當然係否認,心中卻有種鬆一口氣、如釋重負嘅感覺,笑容亦從容咗好多,「我點會驚?要驚嗰個係你先啱呀!」

兩個人又變番好似平時一樣有講有笑,互相取笑對方同時,心中開始藏起各自嘅秘密

食完嘢之後兩人如常一齊番屋企,喺梁玥嘉同宋千辰行到去門口準備推門行出去嘅時候,見到一個熟悉嘅身影行到嚟門口停低,對方亦見到兩人

邱凱棠同佢嘅朋友隔住玻璃門與梁玥嘉、宋千辰四目交投,企喺前面嘅宋千辰推開門,邱凱棠同佢嘅朋友後退咗兩步

「嘉嘉。」宋千辰將門推開,望向梁玥嘉,梁玥嘉見宋千辰頂住門,便直接行出去M記外面



「嗨⋯」邱凱棠尷尬地微微一笑

宋千辰不失禮貌地微微一笑、點一點頭,然後行到去梁玥嘉身旁自然地將佢嘅手牽手就行

邱凱棠心裏尷尬無比,佢好意打個招呼,本來以為宋千辰都會同佢講聲「嗨」之類回應,但宋千辰只係點一點頭,令邱凱棠覺得喺朋友面前冇面

邱凱棠尷尬咁拉開門同朋友一齊行入去,宋千辰同梁玥嘉喺行遠咗之後就鬆咗手

本來已經快要忘記之前Kiss嘅事,但邱凱棠一出現,又再次勾起兩人嘅記憶,腦海一記起,心臟瞬間傳嚟訊號



「又會突然喺度見到佢⋯」宋千辰假裝着自然,回頭望同時偷偷瞄咗梁玥嘉一眼

「嗯⋯」梁玥嘉點一點頭,望住前面想令自己冷靜落嚟

宋千辰小心翼翼地望向梁玥嘉同時,梁玥嘉剛好回頭望向後面卻發現宋千辰望住自己,兩個人對上視線,腦袋都一片空白,要講咩先啱?

「行啦行啦!快啲番屋企!」宋千辰先移開視線,加快咗腳步,耷低頭嘅瞬間覺得自己臉頰熱熱的

「喂⋯!等埋我呀!」梁玥嘉邁步追上宋千辰,心中仍然得覺得有啲唔自在,忽然又記起李穎容喺lunch time講嘅嘢:「你係咁諗啫,宋千辰會唔會都係咁諗呀~」

梁玥嘉悄悄地微微抬起頭,抬眼望向企喺自己身旁嘅宋千辰

「如果係佢,佢會點答、點諗⋯?」梁玥嘉不禁喺心中問道,有啲好奇到底宋千辰遇到同一個問題嘅時候,佢會點答,會唔會同自己一樣,會猶疑,定係佢仍然會果斷咁選擇否定,「千辰⋯!」

宋千辰望向梁玥嘉,佢嘅心先啱啱稍微平靜落嚟



「算啦,冇嘢啦~」梁玥嘉猶疑咗一陣之後,都係決定唔講出佢想問嘅嘢

「吓?你講一半唔講一半嘅⋯」宋千辰本來已經做好心理準備咁平靜地聽梁玥嘉講,點知梁玥嘉突然間又話冇嘢,「想講咩啫?」

「冇呀!」梁玥嘉搖搖頭,但無法壓抑着內心嘅好奇,所以梁玥嘉轉咗一個講嘅方法,以閒聊嘅形式講出同問出佢想知嘅嘢,「今日lunch time嘅時候,我同穎容同楊楠恩一齊食飯,然後佢地忽然間又問起我同你。」

「唔洗問,一講到問起我同你就估到。」宋千辰未等梁玥嘉講出口,佢已經估到其他人又講咗啲咩

「聽到都覺得厭⋯」梁玥嘉假裝抱怨咁講道,「如果真係一齊,成件事會好好笑⋯」

「嗯,你啲衰嘢我都已經睇過晒,冇嘢可以再發掘~」宋千辰笑起嚟講道,「如果我地真係一齊⋯」

宋千辰一講,梁玥嘉就特別專心嘅聽住,同時,宋千辰自己都不自覺地認真咁沉思着



「做咩唔講嘢嘅佢⋯」梁玥嘉望住沉默嘅宋千辰心諗,心中不禁緊張同好奇起嚟,「佢諗緊咩?」

「感覺好奇怪!」宋千辰思考完之後開口講道,然後望住梁玥嘉笑咗一笑,「對咗咁多年,大家都太了解對方啦,一齊嘅話會好怪。」

聽咗宋千辰呢一番說話,喺梁玥嘉嘅心中莫名其妙地有種失望嘅感覺流出嚟,但係佢冇表現出嚟,只係笑咗一笑

「都係,我地太熟,太了解對方啦!」梁玥嘉瞬笑容掩蓋佢心中嘅感覺




IG Link: https://www.instagram.com/nd_cotttoncandy/?hl=zh-tw