一諗到呢度,宋千辰就覺得唔自在,將來會有一個人取代佢特別嘅位置,諗起就覺得唔好受,但又唔係完全因為「有人會取代佢」呢件事而唔好受,總之就係喺心中有另一樣嘢正在醞釀緊

「搞到我好似突然好在乎佢咁⋯」宋千辰微微低頭望住書本,但書頁中嘅字一個都睇唔入腦,一個更貼切嘅詞語彈咗出嚟,「好似我中意佢咁⋯」

喺心中默唸出「我中意佢」呢四個字,心臟先緊縮一下,然後慢慢地加快跳動嘅速度,用盡一切方法暗示某啲訊息比宋千辰

宋千辰將手放到額頭上,輕力地拍咗自己額頭兩下,微微側頭望向梁玥嘉,望到梁玥嘉嘅側面,感覺到唔一樣嘅感覺同時,宋千辰瞬間耷低頭

「專心專心!」宋千辰喺心中對自己吶喊道,順便用手拍拍自己嘅臉頰,「唔好諗咁多!諗多咗啦諗多咗啦!」



「叮噹叮噹⋯叮噹叮噹~」放學嘅鐘聲響起

宋千辰好快就執好嘢行到去梁玥嘉嘅座位前,見到梁玥嘉仲執緊嘢

「今日咁慢嘅你?」宋千辰挪揄梁玥嘉道,梁玥嘉望一望佢,然後將功課file從櫃桶拎出嚟放入書包,著上校褸

學校嘅校褸係一件深藍色嘅大褸嚟,著上之後總好過冇著,至少可以保暖,今日天氣忽然凍咗好多,總話呢幾年天氣好反常,一係好熱,一係好凍,今日剛好就係好凍,梁玥嘉嘅雙腿都喺度輕微地顫抖着

「放埋啲嘢入locker就行得啦⋯」梁玥嘉因為凍所以講嘢都特別細聲,佢冇理宋千辰有冇聽到佢講咩,直接就拎咗啲唔會拎番屋企嘅書離開座位行去locker嗰邊



梁玥嘉將locker門開咗,然後將啲書一次過塞晒入去,閂locker門,扣番個鎖然後番埋位,拎書包,走

梁玥嘉喺沿路上都冇咩點出聲,宋千辰偶爾望一望梁玥嘉,只見梁玥嘉一臉疲倦嘅樣子,雙手插實喺衫袋入面,如無必要都唔會拎隻手出嚟

喺行離咗學校一段距離之後,宋千辰先開口,雖然兩人就算唔講嘢都唔會覺得尷尬,不過突然咁靜真係有啲唔知點咁

「今日好凍⋯」宋千辰抬起頭望一望天空,「仲要係陰天。」

「嗯⋯好凍⋯」梁玥嘉嘅校褸拉鍊拉到去嘴前,拉到最高嘅位置,已經凍到連嘴都唔想郁,插喺校褸袋中嘅手都已經凍到好似喺冰箱拎出嚟一樣,「今日出咗門口先發現冇拎暖包⋯」



宋千辰呢一刻先發現梁玥嘉今日原來連頸巾都冇戴到,學校有規定17度或以下先可以戴頸巾,而最近嘅溫度基本上都係喺17度以下,而梁玥嘉幾乎可以話係頸巾不離身,今日梁玥嘉居然連頸巾都冇戴到就出咗門口係一件好罕有嘅事

梁玥嘉嘅鼻尖都已經因為凍而變得紅紅的,宋千辰見到之後,默默地將圍喺自己頸上嘅頸巾除咗落嚟,拉住梁玥嘉嘅手腕,然後將長長嘅頸巾圍喺梁玥嘉嘅頸上,繞咗兩個圈

梁玥嘉對於宋千辰嘅舉動既愕然又有啲動心嘅感覺,宋千辰都唔知點解自己要除低自己嘅頸巾圍喺梁玥嘉嘅頸上,真係單純地因為佢覺得梁玥嘉覺得凍?

「行啦⋯」宋千辰因為覺得尷尬又害羞,所以直接就轉身,雙手插喺校褸嘅口袋中繼續向前行,唔願意再企喺梁玥嘉嘅面前多一秒

梁玥嘉呆企喺原地,低頭望向啱啱宋千辰圍到佢頸上嘅頸巾,梁玥嘉伸手輕輕掃過頸巾,縱使仍然覺得好凍,但係喺心中卻多咗一份暖意

梁玥嘉抬起頭望向宋千辰嘅背影,宋千辰一直行,梁玥嘉嘅心跳因為宋千辰突如其來嘅一個舉動而加快,心底裏再次湧出嗰種難以言喻嘅情感

宋千辰見梁再嘉冇跟上嚟便停低步伐,整個人轉咗90度然後望向梁玥嘉

「梁玥嘉你仲唔行?我就嚟凍死啦⋯!」宋千辰努力地壓抑住內心嘅尷尬同害羞,故作鎮定咁講道



「嗯⋯」梁玥嘉小急步跑到宋千辰嘅身旁,兩人再次並肩而行,兩人都冇再講過嘢,梁玥嘉只敢喺心中獨自思考,「佢自己都凍⋯仲除頸巾比我⋯」

梁玥嘉悄悄地抬眼望向宋千辰,心中有悸動嘅感覺,梁玥嘉捉住頸巾嘅末端

「佢係咪因為知我凍,所以先⋯」梁玥嘉心諗,「但以前佢都唔會,一直以嚟都冇試過係咁⋯算啦算啦!都應該係我諗多咗啫~」

「嘉嘉做咩唔出聲⋯我啱啱做咩呀喺度?突然間除頸巾做咩?」宋千辰偷瞄咗梁玥嘉一眼,見到梁玥嘉嘅雙手插番喺衫袋入面,宋千辰諗起啱啱佢將頸巾圍到梁玥嘉頸上時,梁玥嘉嘅一臉愕然咁,「我真係做多咗啦做多咗啦⋯!」




IG Link: https://www.instagram.com/nd_cotttoncandy/?hl=zh-tw