［愛情純愛］由嗰一個Kiss開始，我地唔再係青梅竹馬: 14.鎖匙呢！？

宋千辰自己都唔明白自己除頸巾嘅意圖係咩，明明自己都覺得好凍，但整個人都好似唔受控咁將頸巾除咗落嚟，仲要幫梁玥嘉繫好，到底自己啱啱諗緊啲咩？

企喺升降機入面嘅時候，梁玥嘉將圍喺頸上嘅頸巾除咗落嚟，摺好然後遞比宋千辰

「嗱，還番比你⋯」梁玥嘉將頸巾遞出嘅同時抬眼望向宋千辰

宋千辰接過頸巾，兩個人再次沉默咗落嚟，梁玥嘉露出一個「為咗避免尷尬而要微笑」嘅笑容，然後手伸入裙袋入面搵鎖匙，但卻摸唔到鎖匙形狀嘅嘢，梁玥嘉便將書包孭到前面，拉開前面小隔嘅拉鍊，睇下鎖匙喺唔喺入面

「鎖匙呢？」梁玥嘉細聲喃喃自語，耷低頭望住袋搵，宋千辰一手拎住頸巾，一手拎住手機睇



「叮！」升降機去到16樓嘅時候停咗，然後打開門，宋千辰先行出去，仍然搵緊鎖匙嘅梁玥嘉跟喺後面

梁玥嘉一邊行一邊搵鎖匙，但搵勻晒所有有機會放鎖匙嘅地方都搵唔到

「千辰，我冇帶鎖匙⋯」梁玥嘉捉住宋千辰嘅書包帶，宋千辰回頭望一望佢，行到去自己屋企嘅門口停低，拎鎖匙開門

宋千辰行入去之後，梁玥嘉跟喺佢身後行入屋，明明雙腳已經踏入咗宋千辰嘅屋企，但梁玥嘉仍然死心不惜咁搵鎖匙

「放棄啦，搵唔到㗎啦⋯」宋千辰將皮鞋除落嚟放到鞋櫃前面，然後換上拖鞋，徑自走進屋內



兩個人又恢復正常，啱啱嘅尷尬又不翼而飛

梁玥嘉一隻手仍然喺小隔中尋緊鎖匙嘅蹤跡，一隻手伸到掛喺鞋櫃旁邊嘅鞋袋拎咗自己對拖鞋出嚟放到地上然後穿上

「我明明記得我今日出門口嘅時候有拎㗎！」梁玥嘉一邊行入屋，手一邊摸勻晒成個小隔

「唔好再搵啦，比你搵多一個鐘鎖匙都唔會搵到㗎啦～」宋千辰將個書包拎住行入房，梁玥嘉專注咁搵鎖匙，跟喺宋千辰嘅身後行入房

宋千辰冇留意到梁玥嘉跟佢尾入房，佢直接就好似平時一樣除校褸、長袖冷衫、背心冷衫；與此同時梁玥嘉冇留意到宋千辰除緊衫，佢一個人蹲喺書枱隔離，將書包放喺宋千辰嘅書包旁邊



「算啦，冇就算啦～」梁玥嘉企起身轉身嘅同時，宋千辰剛好除緊裇衫嘅衫鈕，聽到梁玥嘉嘅聲音轉身望

「呀！」「你做咩喺我房㗎！」

梁玥嘉瞬間用手掩住雙眼，宋千辰頓時轉身再次背向梁玥嘉

「好彩我係除衫唔係除褲啫！」宋千辰講道，梁玥嘉急步行到房門口打開房門行出去

梁玥嘉一下子跑到梳化盤着腿坐低，梁玥嘉將校褸除咗落嚟放喺自己旁邊，手喺兩邊臉頰前面，手心向下微微上下郁，鼓起兩泡腮成了金魚嘴般呼氣

宋千辰望住閂上嘅房門，梁玥嘉坐喺梳化上面，二人各自感覺到心跳加速嘅感覺，心跳「咚咚」嘅跳動聲直接傳到耳中，連耳膜都可以感受到微微嘅震動

梁玥嘉用手掩住臉頰，臉頰嘅溫暖存到心手

宋千辰換番居家服，著住短衫短褲行出房，行向梳化，一手就拎起放喺梁玥嘉身旁嘅校褸，梁玥嘉望向宋千辰



「幫你擺入房⋯」宋千辰稍微移開視線，轉身又再一次移入房

宋千辰行到入房到書枱前，佢拎住梁玥嘉嘅校褸放到櫈背上搭住，佢嘅雙手搭住喺櫈背上壓住梁玥嘉嘅校褸，微微耷低頭望住梁玥嘉嘅校褸

「突然怕咩羞⋯」宋千辰細聲地喃喃自語，著住短衫短褲嘅佢都覺得熱起嚟

梁玥嘉喺廳拎住手機坐，手機嘅螢幕忽然亮起嚟，手機嘅Face ID識別到之後就自動解鎖

「穎容？」梁玥嘉見到WhatsApp佢嘅人時先係一個問號，佢見到李穎容send嘅訊息時出咗第二個問號喺頭頂

穎容：救命⋯

李穎容send過嚟嘅message除咗救命兩個字之外，仲有一個反白眼嘅emoji



「做咩嗌救命？」梁玥嘉回覆問道，此時李穎容正錄緊音，其實梁玥嘉只係循例一問

但轉個頭李穎容嘅狀態又由「Recording audio⋯」變番做「Online」，然後梁玥嘉嘅手機響起嚟，李穎容直接打過嚟

「喂？有咩咁～重要嘅事令你要直接call我呀？」梁玥嘉笑言

宋千辰聽到喺客廳忽然傳嚟說話聲，便企好起嚟準備出去

「哎呀～啱啱我同楊楠恩一齊走，我就估到佢一定唔係外表睇起嚟咁簡單！」李穎容喺屋企拎住手機激動咁講道，好似發現咗啲咩驚天大秘密咁

「楊楠恩做咩？咩唔係表面咁簡單？」梁玥嘉聽唔明李穎容講咩，呢個時候宋千辰喺房行出嚟，見到梁玥嘉講緊電話






IG Link: https://www.instagram.com/nd_cotttoncandy/?hl=zh-tw