［愛情純愛］由嗰一個Kiss開始，我地唔再係青梅竹馬: 17. 又被開玩笑

見到搭喺掛校服嘅衣架上嘅頸巾，記起今日放學之後嘅事，宋千辰伸手摸頸巾，嘴角不禁微微的揚起

梁玥嘉番到屋企，即刻拎埋衫褲去沖涼

「今日想浸～」梁玥嘉喺放喺洗手盆隔離拎咗一個獨立包裝嘅溫泉浴鹽

開咗一大缸水之後將浴鹽嘅包裝撕開倒入水中，浴鹽頓時浴化喺熱水之中，等到水位差唔多嘅時候，梁玥嘉閂上水龍頭，然後坐入去熱水中

「呼～」梁玥嘉頓時感覺到壓力同疲倦瞬速飛走，當佢睜開眼時，佢開始沉思着李穎容今日同佢講嘅嘢，「楊楠恩中意千辰⋯？」



諗到楊楠恩其實係中意宋千辰呢點時，心中有種唔舒服嘅感覺；好快地又諗起宋千辰今日幫佢圍上頸巾嘅舉動，心中又閃過一絲甜意

兩人喺兩個唔同嘅地方，但係卻諗住同一樣嘢

「好似喺呢一年，我遇到中意嘅人⋯中意咗嗰個一直喺我身邊十七年嘅人⋯！」

「我中意咗佢，我地之間會唔會有距離⋯？」兩個人同時又諗到另一個問題

梁玥嘉斜坐喺浴缸中，水啱啱好浸過咗雙肩，頭微微抬起靠住牆



「如果楊楠恩真係中意千辰，咁我要點好⋯」梁玥嘉喃喃自語道，「楊楠恩真係因為千辰所以同我做朋友⋯？但楊楠恩唔似啲咁嘅人⋯」

梁玥嘉一諗到呢度就覺得好苦惱，輕輕皺起眉頭

「算啦，佢真係中意千辰先算啦⋯」梁玥嘉深呼吸，然後好似安慰自己一樣講道

⋯

「我出門口啦！」梁玥嘉企喺玄關位著鞋，然後拉開深啡紅色嘅厚重木門，踏出家門



梁玥嘉行到出嚟之後企喺屋企門口，然後望一望隔離屋

「咔。」隔離A室嘅門開咗，宋千辰行出嚟，閂上門，然後見到梁玥嘉已經企咗喺度睇手機

宋千辰上下打量咗梁玥嘉一下，眼見今日梁玥嘉有戴頸巾，不禁笑咗一笑，但好快就收起咗笑容，若無其事咁向前行

「行得啦，你遲到你嘅事呀！」宋千辰講道，梁玥嘉抬起頭，邁步跟上去

兩人彷彿忘記咗中意對方嘅事，又好似平日一樣相處，打鬧講笑，心意各藏心裏，唔露出任何破綻，就好似平時一樣咁相處

梁玥嘉雙手插喺校褸袋入面，因為袋入面放咗暖包

「今日都係好凍。」梁玥嘉開口講道，「幾時先唔會咁凍？」

「夏天囉。」宋千辰一邊睇手機一邊講道，笑咗一笑，「你今日記得戴頸巾啦？」



「琴日冇戴頸巾真係凍到生不如死，所以今日記得啦～」梁玥嘉笑咗一笑，然後望向宋千辰，伸出手將宋千辰拎住手機嘅手㩒低，「睇緊咩？」

「最近上咗套新戲，想睇，睇緊佢個預告片。」宋千辰將手機微微打側，等梁玥嘉可以睇到，「有冇興趣？驚慄懸疑片嚟。」

「呢套我都想睇呀！」梁玥嘉即刻表示有興趣，但梁玥嘉係嗰種又中意睇但又要驚嗰一類嚟，「幾時睇呀？」

「又要驚又要睇，你到時唔好嚇親我添呀！」宋千辰無奈咁講道

「我就係中意睇！」梁玥嘉嘟起嘴，哼咗一聲

兩個人以前都有試過一齊睇戲，所以都冇咩太大感覺，彼此都覺得係好平常嘅事嚟，冇覺得係約會之類嘅感覺

番到學校上咗兩堂之後就係小息，宋千辰坐喺位度睇緊場次



「睇咩呀？睇場次？你睇戲咩？」張子萊望向宋千辰嘅手機，「睇邊套呀？」

「最新上嗰套驚慄片囉。」宋千辰講道

「Hey man，我想睇，一齊。」張子萊拍咗宋千辰嘅博頭一下

「我都想睇，一唔一齊呀？」霍思傑忽然又加巴口入嚟講埋一份

「吓？」宋千辰窒咗一窒，眼睛嘅餘光見到梁玥嘉開緊locker就順便嗌佢過嚟問佢，「梁玥嘉！」

梁玥嘉聽到有人叫佢之後，拉住同佢一齊開locker嘅李穎容一齊過去，楊楠恩見到佢兩個行又跟住一齊行

「咁大聲叫我做咩呀？」梁玥嘉行到去宋千辰隔離

「佢地又話想睇喎，你介唔介意？」宋千辰指一指張子萊同霍思傑



「Okay呀～」梁玥嘉比咗個Okay手勢

「哦～原來人地本來係同佢個嘉嘉睇㗎～」霍思傑頓時拉住張子萊講道

張子萊同霍思傑對望，然後一同嘆氣，搖搖頸；梁玥嘉同宋千辰既無言又無奈咁望住佢地兩人「唱雙簧」，都唔知要笑好定係要反駁好




IG Link: https://www.instagram.com/nd_cotttoncandy/?hl=zh-tw