「講我壞話呀?」宋千辰問道

「你諗多咗啦⋯邊個得閒講你⋯」梁玥嘉將電話放番入裙袋,順便朝宋千辰反個白眼,「唔好咁自戀好唔好?」

「邊個叫你咁鬼祟啫?」宋千辰拎住電視遙控,大腿上放咗一個方型嘅灰色抱枕

「痴線,你就鬼祟。」梁玥嘉攬住另一個灰色抱枕,打咗一個呵欠,揉揉眼

「眼瞓呀?」宋千辰嘅手肘放喺梳化嘅扶手上托住下巴,「瞓陣先囉~」



「唔洗⋯」梁玥嘉搖搖頭,又拎手機出嚟睇,下巴靠着抱枕邊

宋千辰托住頭繼續睇電視,梁玥嘉則坐喺隔離昏昏欲睡地點着頭;宋千辰忽然發現成個環境好安靜,除咗電視聲之外就冇其他聲音,佢向左邊望,見到梁玥嘉已經瞓著咗

「啱啱又話唔洗,轉個頭就瞓著咗⋯」宋千辰只係喺心中諗,然後無奈一笑

梁玥嘉早就將髮圈拆咗,一頭柔順嘅長髮披喺肩上,一小束嘅頭髮喺肩上滑下

宋千辰盡量唔發出任何聲音,將電視嘅聲量都較細咗,默默地望住梁玥嘉嘅側面



淡紅嘅臉頰,長長嘅睫毛,一頭柔順黑中帶點啡嘅秀髮⋯宋千辰係第一次認真咁望梁玥嘉,以前都冇試過定睛留意佢

小束嘅髮絲遮擋咗梁玥嘉嘅臉,宋千辰伸手輕輕地將髮絲繞到梁玥嘉嘅耳後,輕輕收回手坐番喺自己嘅位置上望住電視

「我地真係可以一直都係青梅竹馬咩⋯」宋千辰喺心中細聲地問道,呢個問題,想問梁玥嘉同時都係問緊自己

宋千辰企起身行去廁所,此時梁玥嘉緩緩地睜開雙眼

梁玥嘉根本道冇完全瞓著,喺宋千辰伸手嘅一刻佢已經醒咗,但係雙眼覺得好攰,眼皮都好沉重



忽然感覺到宋千辰嘅手掂佢時嘅觸感,梁玥嘉嘅心又再一次加快咗跳動嘅速度

「咔。」

聽到開門嘅聲,梁玥嘉瞬間合起雙眼,宋千辰喺廁所行出嚟,照樣坐番喺同一個位



當梁玥嘉醒過嚟嘅時候,天空都已經黑晒

「幾點啦?」梁玥嘉坐好起嚟,揉揉眼,搔搔頭

客廳冇開燈,只有電視仍然開住,仍然播緊音樂節目,但卻不見宋千辰嘅身影,整個客廳就只有梁玥嘉自己一人

「嗚~」蹲喺梳化旁邊嘅宋千辰一邊發出「嗚嗚」聲一邊慢慢地起身,扮鬼嚇梁玥嘉



「呀!」梁玥嘉果真比宋千辰嚇到,瞬間尖叫起嚟,宋千辰頓時大笑起嚟,「宋千辰!」

梁玥嘉將抱枕一手拎起直接朝宋千辰扔去,宋千辰一下子將飛到自己面前嘅抱枕推開

「瞓醒啦?」宋千辰企起身,一臉滿足咁望住梁玥嘉

「做咩唔開燈?」梁玥嘉心中有啲怯怯的,因為梁玥嘉特別怕黑,再加上啱啱比宋千辰嚇咗一嚇

「你驚咩啫?」宋千辰行向玄關位,伸手拍落燈制度開咗廳燈,「又唔係冇人,我喺度你驚咩?」

「你明知我怕黑仲嚇我!」梁玥嘉拎住抱枕打宋千辰,「你好黑人憎呀!」

「我嚟咋嘛~你驚咩喎~」宋千辰調皮地笑着



「邊個叫你明知我怕黑都要咁樣嚇我⋯」梁玥嘉微微鼓起兩泡腮,細聲地講道

「唔嚇你啦唔嚇你啦~」宋千辰笑咗一笑,抬頭望鐘,「阿姨叔叔番嚟未?」

「應該番咗⋯」梁玥嘉都抬起頭望住時鐘,「我打比我媽問下。」

梁玥嘉拎起手機,打電話比媽媽

「媽你番到屋企未呀?」梁玥嘉喺電話一接通就問道

「番到啦,你未番嚟嘅?補課咩?」番到屋企一陣嘅梁媽媽正喺廚房洗緊菜

「唔係呀,我喺千辰屋企,我冇帶鎖匙。」梁玥嘉講道,「你喺屋企就得啦,我宜家過番嚟啦~」

梁玥嘉收咗線之後,就行入宋千辰間房拎書包同校褸,正當梁玥嘉打算著番件校褸嘅時候,宋千辰行入嚟



「你行番過隔離先兩三步,洗唔洗著校褸呀⋯」宋千辰一臉無奈咁講道,「你打開門行兩步都到你屋企門口啦!」

「哦⋯唔著囉~」梁玥嘉將已經套咗入去袖入面嘅手抽番出嚟,然後孭起書包,將校褸搭喺前臂上

梁玥嘉行到玄關位,將拖鞋除落嚟放番入鞋袋,換番皮鞋,但冇著實,只係掂起腳尖行

宋千辰幫佢打開門,喺閂上門之後,屋內多咗一份空虛感,佢閂咗電視,行番入房,拖鞋同地板觸碰磨擦嘅聲音格外響亮




IG Link: https://www.instagram.com/nd_cotttoncandy/?hl=zh-tw