［愛情純愛］由嗰一個Kiss開始，我地唔再係青梅竹馬: 32. 背地裏

宋千辰睇到梁玥嘉嘅回覆之後笑咗一笑，腦海中已經即刻幻想到梁玥嘉會係咩反應，佢估梁玥嘉一定係臉頰泛紅同時帶着一副無奈嘅表情，無奈到直接反白眼

「Kiss多一次⋯」宋千辰灘落床喃喃自語講道，「唔好傻啦⋯！」

宋千辰自己都不禁紅了耳根，臉上卻掛上了甜絲絲嘅笑容

⋯

「叮噹叮噹⋯叮噹叮噹～」上完兩堂之後又到咗小息時間



梁玥嘉企起身，伸咗一個懶腰之後打算去個洗手間，李穎容同楊楠恩都跟上表示一齊去廁所

「梁玥嘉，你係咪有啲嘢未解釋呢？」李穎容眯起眼望住梁玥嘉，「又話同我睇嘅⋯」

「睇咩呀？」未知發生咗咩事嘅楊楠恩一臉好奇咁問道

「楠恩呀你知唔知呀！」李穎容行到去楊楠恩隔離捉住楊楠恩嘅手，「梁玥嘉明明話同我一齊睇《比悲傷更悲傷的事》㗎嘛！結果佢自己去咗睇呀！」

「我都想睇呀～好催淚咁～」楊楠恩都對呢齣電影感興趣



「佢睇咗啦！」李穎容對楊楠恩抱怨道，然後望向梁玥嘉，擺出一副要興師問罪嘅樣，「你同邊個睇咗呀？」

「同千辰去睇，佢同我講話上咗，咁咪一齊睇囉⋯」梁玥嘉有啲心虛，都唔敢直視李穎容，「我地係即興去睇。」

李穎容直勾勾地望住梁玥嘉，梁玥嘉瞬間就移開視線；企喺一邊嘅楊楠恩聽到梁玥嘉話同宋千辰一齊睇戲之後，心中有啲羨慕，但更多嘅係妒忌

「唉～」李穎容嘆咗一口氣，但呢個嘆氣似乎係語帶雙關，佢望住梁玥嘉偷偷地笑了笑

喺佢地去完廁所番到去課室嘅時候，梁玥嘉佢地三個人又圍埋一齊傾計



「下次同你一齊睇其他戲啦～」梁玥嘉對李穎容撒嬌道，「嚟啦～唔好嬲啦～」

「哼！死人宋千辰成日截我糊，阻住晒！」李穎容一臉不滿咁講道，然後拎起放喺枱虛嘅空膠樽朝放喺燈制下面嘅垃圾桶掉去

「嘩！」宋千辰同張子萊剛喺小食部買完嘢食番到嚟課室，一踏入課室行咗兩步就有嘢喺眼前飛過，直接入咗垃圾桶

「李穎容你咩料呀？想掉死人呀？」張子萊行向李穎容，企喺梁玥嘉面前

「死人宋千辰截我糊！」李穎容眯起眼指住宋千辰講道

「我？」宋千辰行到去梁玥嘉嘅枱邊坐喺上面，梁玥嘉望到宋千辰手上拎住咗啱啱先喺小食部買番嚟嘅炭燒雞串

「我要食。」梁玥嘉伸手捉住咗其中一條雞串嘅竹籤之後先抬頭望向宋千辰，宋千辰直接就將裝住雞串嘅膠袋遞到梁玥嘉嘅面前

楊楠恩坐喺李穎容隔離嘅坐位上，雙眼一直望住梁玥嘉同宋千辰嘅一舉一動



「我做咗啲咩呢？」宋千辰笑咗一笑問道

「玥嘉明明喺套戲上之前就講咗同我一齊睇《比悲傷更悲傷的事》㗎！你又截我！」李穎容一臉不服氣，「成日都截我糊，你唔可以咁樣霸住玥嘉㗎！」

「我邊有霸住佢？」宋千辰一臉無奈咁講，梁玥嘉伸手拍咗李穎容嘅手一下，示意佢唔好亂講嘢，宋千辰同梁玥嘉對望，「聽唔聽到呀？唔好霸住我呀～」

宋千辰開玩笑般講道，李穎容擺出一副食花生食得津津有味嘅表情望住兩人

「痴線，佢叫你唔好霸住我呀！」梁玥嘉無奈地反咗一下白眼，「小學雞⋯」

宋千辰望住梁玥嘉無奈嘅表情，心中卻覺得津津樂道的，喺宋千辰嘅眼中只睇到梁玥嘉一人一樣；楊楠恩嘅眼中好似只有宋千辰一樣，佢定睛望住宋千辰，臉上卻冇半點笑容

人地話當你中意一個人時，你會特別留意佢，一舉一動、眼神、笑容等等，都會留意得一清二楚



所以楊楠恩留意到亦睇得出，喺宋千辰望向梁玥嘉時，就好似望向滿天星斗一樣，雙眼中有着亮點，佢一人安靜地坐喺一邊猜想着宋千辰對梁玥嘉嘅真正心意⋯

「今日不如一齊食lunch？」楊楠恩臉上掛上了笑容，忽然提出一齊食飯嘅想法，「喺街市附近有一間食魚蛋粉㗎，不如一齊去食～」

「都好喎，嗰間粉麵店我都知喺邊呀！之想都有諗住食。」李穎容第一個就同意咗一齊食飯嘅提議

「好呀。」張子萊回答道，宋千辰冇出聲，只係靜靜地坐喺梁玥嘉嘅枱邊食嘢

「唔得⋯一定要諗個辦法⋯」楊楠恩喺心中講道，「要點樣做先得呢⋯？」

喺楊楠恩溫柔嘅微笑下，卻係另一張面孔，但卻無人知曉佢正盤算緊啲咩⋯






IG Link: https://www.instagram.com/nd_cotttocandy/?hl=zh-tw