［愛情純愛］由嗰一個Kiss開始，我地唔再係青梅竹馬: 33. 故意

喺放lunch嘅時候，佢地六人一齊去到楊楠恩口中嗰間粉麵店

沿路上楊楠恩一直都觀察緊，佢諗緊要點樣先可以喺街入去嘅時候分開梁玥嘉同宋千辰，而理所當然地坐喺佢地中間嘅人就係楊楠恩自己

一入到粉麵店嘅時候，本來楊楠恩的確可以分開兩人坐喺佢地中間，但係宋千辰同梁玥嘉一同行入嚟，佢兩個好自然咁樣就行到圓枱前坐低

粉麵店入面嘅阿姨拎咗幾杯熱水過嚟放喺枱面，一計不行，心中又生二計，楊楠恩喺梁玥嘉行到去圓櫈前準備坐低時，拎起阿姨啱啱酙嘅熱水

「嘶⋯」楊楠恩假裝因為杯好熱而唔小心鬆開咗手，水直接喺枱邊、梁玥嘉準備坐嘅位前倒瀉



「嘩！」梁玥嘉嘅反應迅速，一下子向後退，「嚇死我⋯」

「玥嘉你有冇事呀？Sorry呀⋯」楊楠恩即刻望向梁玥嘉，但梁玥嘉身上濕都冇濕

阿姨見到之後好快就行到過嚟用地拖拖乾地下，佢地都照樣坐低

「你有冇濕？」宋千辰坐低之後問梁玥嘉，兩人就好似喺度傾密計咁樣

「冇。」梁玥嘉望向宋千辰之後搖搖頭，然後望向坐喺李穎容隔離嘅楊楠恩關心道，「楠恩你有冇整親呀？」



「冇呀，sorry呀，啱啱個杯好熱，所以我先唔小心鬆咗手⋯」楊楠恩一臉抱歉咁講道

「唔緊要啦，睇下食咩～」梁玥嘉微笑着遞咗份餐牌比楊楠恩

幾個人喺點咗餐之後又開始各自睇手機，宋千辰、張子萊同霍思傑又開始打機，梁玥嘉則安靜地耷低頭睇手機

喺佢地點嘅餐都嚟齊之後，梁玥嘉做嘅第一件事唔係食嘢，而係拎起筷子同羹，將放喺佢嗰碗炸魚蛋片頭米線上面嘅蔥、芽菜同芫荽一次過夾起並用羹墊住，一次過夾晒去宋千辰嘅碗裏

「你啱啱唔叫走蔥走芫荽？」宋千辰一臉無奈咁等梁玥嘉夾完先可以食，「你夾完未，我好肚餓⋯」



「唔記得咗叫嘛。」梁玥嘉一直夾過去宋千辰嘅碗裏，差唔多冇晒同夾唔到嘅時候先停落嚟食嘢，「得啦得啦，食嘢啦～」

「嘩！」霍思傑咁啱望向宋千辰，因為忍唔住笑而差啲比宋千辰碗米線搞到嗆到，「你碗嘢咩事？」

霍思傑一問，張子萊、李穎容、楊楠恩都望向宋千辰碗嘢，只見宋千辰嘅碗面全都係綠色嘅蔥同芫荽，多到好似一個小山丘咁，仲要有啲白色嘅芽菜喺度

「係囉梁玥嘉。」宋千辰一邊無奈地將蔥、芫荽同芽菜混勻喺自己嗰碗米線入面，然後食咗一啖，明明有夾米線，但淨係食到蔥同芫荽嘅味道

「好彩今日你喺度啫～」李穎容笑住講道，「如果唔係遭殃嗰個就係我啦～今日我就唔同你爭啦宋千辰～」

好多時梁玥嘉都會唔記得叫走蔥走芫荽，所以佢同李穎容一齊食飯嘅時候佢會夾晒比李穎容，而李穎容嘅碗入面就會好似今日宋千辰嘅碗咁，不過因為平日宋千辰唔喺度，所以梁玥嘉先會夾過去比李穎容，今日宋千辰喺度，當然呢啲蔥、芫荽就會喺宋千辰嘅碗中出現

梁玥嘉一食嘢就開心，食嘢嘅時候臉上都會掛上幸福嘅笑容，宋千辰望到梁玥嘉嘅幸福笑容，嘴角都不禁揚起，完全可以體會到「笑容的確好有感染力，但你心上人嘅笑容更有感染力」嘅道理

⋯



喺放完lunch番到學校之後，梁玥嘉同李穎容兩個人去咗洗手間，今次楊楠恩冇跟住一齊去

「都唔知佢啱啱係咪特登⋯」李穎容同梁玥嘉企喺洗手盆前面講道，「個杯根本就唔係熱到咁。」

李穎容講起啱啱食飯嘅時候，楊楠恩倒瀉水嘅事，李穎容一直都覺得楊楠恩痴埋佢兩個度一定係有目的，所以總覺得楊楠恩嘅一舉一動都好奇怪

「你係咪諗多咗呀？」梁玥嘉無奈地笑了笑，「楠恩都佢都話咗係唔小心啦～你諗多咗啦！楠恩又點會咁做？佢咁做對佢有咩好處？」

「我都唔知點解釋比你聽，但總之我就覺得佢怪怪地，你小心佢啦！」李穎容一臉認真咁講，但相反梁玥嘉就唔太相信楊楠恩會咁樣做，「唔係我諗多，而係我真心真心真心覺得佢有時好奇怪，佢可能係妒忌你同宋千辰。」

「妒忌我地做咩啫？佢都知我同千辰係一早就識一齊大㗎。」梁玥嘉一臉天真咁講道，佢真係打從心底覺得楊楠恩唔係啲會害人嘅人

「哎呀～就係因為佢都知道你同宋千辰係青梅竹馬所以先要妒忌⋯！」李穎容真係比眼前仍然一臉天真無邪嘅梁玥嘉急死，李穎容捉住梁玥嘉嘅手，「你明唔明呀，佢就係中意宋千辰咪會妒忌你囉呀！我上次咪同過你講囉！你又唔信！」



「唔會掛⋯？」李穎容一提起宋千辰，梁玥嘉就擺出一個半信半疑嘅樣子，一提到同宋千辰有關嘅嘢，梁玥嘉先會有啲緊張起嚟，「但睇落唔似喎⋯」




IG Link: https://www.instagram.com/nd_cotttocandy/?hl=zh-tw