［愛情純愛］由嗰一個Kiss開始，我地唔再係青梅竹馬: 48. 留堂

喺夜晚食完飯之後，梁玥嘉番到房，然後閂咗房燈，用MacBook煲劇；梁玥嘉同平常一樣，po咗個IG story之後就放低手機開始煲劇

煲劇煲到凌晨1點幾2點先瞓，翌日起身嘅時候又懶床搞到遲咗出門口

平日宋千辰同梁玥嘉會等埋對方先起行番學，只不過基本上兩人出門口嘅時間都差唔多，所以都已經冇話邊個等邊個，宜家基本上都係撞到就一齊番，撞唔到就算

「肯定又係煲劇煲到2點幾先瞓⋯」宋千辰望住梁玥嘉寫明「我仲想瞓」似的嘅模樣，佢都估到大概情況

番到學校之後更加唔洗講，梁玥嘉直接就伏喺枱上小睡片刻補眠



「嘩⋯一大清早就伏喺度瞓？」李穎容一推開課室門就見到梁玥嘉伏咗喺枱面

梁玥嘉聽到李穎容把聲愈嚟愈近便緩緩抬起頭

「你地一齊番嘅⋯？」梁玥嘉抬頭見到李穎容同楊楠恩一齊

「嗯，喺學校門口撞到穎容。」楊楠恩露出佢嘅招牌溫柔微笑

楊楠恩番埋位放低咗書包之後就行到梁玥嘉隔離嘅座位，靠坐喺枱邊



「你咁攰咁嘅？」楊楠恩柔聲地關心道，「唔舒服呀？」

「唔係，琴晚煲劇煲到好夜先瞓⋯」梁玥嘉坐起身，面向楊楠恩坐，手放喺枱上面托住頭，「今日差啲就唔知醒⋯」

「你日日都咁樣煲劇唔攰就假啦！」李穎容無奈地講道，「日日都煲劇煲到2點幾3點先瞓。」

「你煲劇煲到咁夜呀！」楊楠恩聽到之後一臉驚訝地講道，「我最遲1點就瞓啦！」

「成日都想睇多集睇多集⋯」梁玥嘉笑了笑，「會控制下㗎啦！」



「你係先好講！」李穎容嘅語氣中夾雜咗滿滿嘅不信任，「叫宋千辰管下你先得⋯」

「關千辰咩事？」梁玥嘉反咗一個白眼，無奈地講道，「佢管唔到我亦唔會管我囉！再講，佢自己都夜一夜先瞓啦！」

楊楠恩望向宋千辰，宋千辰聽到梁玥嘉叫佢個名便抬頭望向梁玥嘉嘅方向，楊楠恩見宋千辰望向佢地呢邊時，頓時就將視線移開，臉上掛着溫柔嘅笑容

「成日都咁夜瞓，對身體唔好㗎～」楊楠恩再次加入話題，「而且早啲瞓先夠精神㗎嘛～」

「你再唔早瞓呀！我地日日都提住你呀！」李穎容捉住梁玥嘉嘅手腕講道

「提到你瞓為止呀！」楊楠恩笑道

「有你兩個喺度我仲有得唔早瞓咩？」梁玥嘉都笑起嚟講道，「得啦我會慢慢早瞓番㗎啦！」

⋯



喺上放學前兩堂之前嘅小息，梁玥嘉、李穎容同楊楠恩三人又圍埋一齊傾計，梁玥嘉同楊楠恩湊得好近李穎容，兩人全神貫注咁聽緊李穎容講嘢

「你又瞓呀梁玥嘉？」李穎容望住又伏低喺枱面前梁玥嘉，「唔好瞓住啦，聽埋先啦！」

「我唔要呀！聽你講完鬼故之後我今晚一定唔洗瞓啦！」梁玥嘉哭喪著臉講道，梁玥嘉怕黑，更加唔洗講要佢聽完鬼故之後喺漆黑一片嘅房入面瞓覺

「唔怕㗎！你睇下楠恩都唔驚啦～」李穎容捉住梁玥嘉拉佢番嚟聽，「唔怕啦！」

「唔要呀！」梁玥嘉用力咁搖頭，此時，梁玥嘉感覺到放喺裙袋嘅手機震咗一下，於是佢拎咗手機出嚟睇

宋千辰：我今日要留堂

「Okay」梁玥嘉睇到之後回覆道，心中有啲無奈，明明可以直接同佢講，但宋千辰偏偏就要WhatsApp佢同佢講



「做咩呀？」李穎容見梁玥嘉睇手機便問道，「係咪有啲咩事？」

「冇呀，千辰同我講話佢今日要留堂咋嘛。」梁玥嘉聳肩，然後將手機放番入裙袋

「佢要WhatsApp同你講？你地喺同一個課室咋喎⋯」李穎容望向宋千辰，宋千辰正托住頭打盹

「慣㗎啦⋯」梁玥嘉都已經對此習以為常

放學嘅時候，梁玥嘉同李穎容一齊走，但平日同李穎容一齊走嘅楊楠恩仍然執緊嘢

「楠恩，你行未呀？」梁玥嘉行到去楊楠恩嘅座位旁邊

「我今日要留低喺學校，我要留堂，唔同你地一齊走啦⋯」楊楠恩一臉惋惜地講道

「咁好啦，我地走先啦。」梁玥嘉講道，然後同李穎容一齊邁步離開課室



楊楠恩望住兩人離開課室嘅身影，然後望向行緊向課室門口嘅宋千辰，見到宋千辰出咗課室之後，楊楠恩便孭起書包企起身，然後去咗圖書館

楊楠恩喺圖書館搵咗個位坐低，將功課拎出嚟放喺枱上面，打算邊做功課邊等5點鐘嘅到來

「一個鐘頭啫，好快過。」楊楠恩望一望手機螢幕上顯示嘅時間並喺心中講道




IG Link: https://www.instagram.com/nd_cotttocandy/?hl=zh-tw