宋千辰動作迅速地拎住公仔去比錢,然後拎去比職員包起份禮物,拎住膠袋就起程歸家

「嘉嘉應該會中意⋯」宋千辰望住手上拎住嘅膠袋,不禁莞爾一笑

番到屋企之後嘅第一件事,就係要將份禮物收起,但睡房唔大,都唔知可以收得去邊

「唉⋯直接放枱底算啦⋯」宋千辰將膠袋放咗喺書枱下嘅位置,「唱完K番到嚟先比佢啦⋯」

宋千辰坐喺電腦椅上,伸手拉開放喺枱上嘅收納抽屜,拎出嗰條已經變得殘舊嘅手繩,偶爾放低現在懷緬過去都係一種享受



雖然話大家係17快18年嘅青梅竹馬,但其實兩人第一次見面時係2歲幾差唔多3歲嗰陣,之所以話係17年嘅青梅竹馬,只係因為雙方嘅媽媽一早就認識,所以方便計算先話係17年

由3歲到宜家17歲,看似一段好長嘅時間實際上轉眼即逝,一轉眼就過咗十幾年,彼此成為咗最了解彼此嘅人,但同時卻又成為咗開始唔了解對方心思嘅人⋯青梅竹馬遇上青春期,對兩人嚟講係一道難題,彼此猜度着對方心思、唔想被睇穿同時,又借「青梅竹馬」嘅名義靠近對方⋯



「喂?」梁玥嘉一手拎起放喺枱上震緊嘅電話,另一隻手伸入打開咗嘅衣櫃拎咗袋禮物出嚟,「打比我做咩呀?」

「你行得未?」宋千辰問道



「行、行得啦行得啦。」梁玥嘉將袋禮物一下子就掉咗入枱底放着,然後便匆匆忙忙地閂上房門出門口

梁玥嘉拎咗對波鞋,直接穿落去著,連鞋帶都唔鬆開就著落去,一隻鞋著好咗,另一隻又未得,仍然踩住鞋踭;梁玥嘉一邊用手整番好個鞋踭一邊開門,一打開屋企嘅大門,就見到宋千辰已經企咗喺佢門外背靠着牆企,宋千辰見大門開咗便企番好,行前咗一小步

「你著好鞋先啦⋯我又唔係唔等你⋯」宋千辰輕皺起眉願

「我出去啦!」梁玥嘉朝屋內講咗一聲之後就閂上屋企嘅大門,未著好鞋嘅左腳微微踮起,唔想踩凹個鞋踩,「等等,我未著好⋯」

梁玥嘉單起腳,用手指勾住鞋踭,等隻腳可以穿到入去;宋千辰見梁玥嘉好似企得唔穩一樣,便喺hoodies嘅口袋中抽咗其中一隻手出嚟輕輕捉住梁玥嘉嘅前臂扶住佢,梁玥嘉嘅手輕輕用力捉住宋千辰嘅衫袖



「嘻嘻⋯」梁玥嘉微微抬起頭望住宋千辰笑了笑,然後跺腳一下,「行啦~」

宋千辰同梁玥嘉搭車去到唱K嘅地方門外等,張子萊同李穎容都已經喺度

「你book咗係咪?」霍思傑問道,「book咗就直接入去等佢地啦,話比佢地知邊間房咪得。」

佢地最後都係揀咗入咗K房先,喺房入面等霍思傑同楊楠恩嚟,到咗嘅人先點歌

「洗唔洗叫嘢飲?可以睇咗先。」李穎容跪喺梳化上面,望住喺牆上嘅點歌機揀緊歌,張子萊企喺李穎容旁邊一齊揀歌

「等埋佢地先啦~」梁玥嘉放低餐牌,起身行到去李穎容隔離,單腳跪喺梳化上面,「揀咗歌先,我喺group度講咗喺咩房。」

楊楠恩比霍思傑早到一步,楊楠恩一邊喺走廊行一邊抬起頭望房number;楊楠恩搵到房號,行到門前輕輕推開門,探頭入去,見到先到嘅四人都企晒喺門邊點緊歌

「嗨~」梁玥嘉同李穎容一見到楊楠恩便熱情地打招呼,兩個男仔只係禮貌地揮揮手



「霍思傑係最後一個。」張子萊講道,然後同宋千辰一齊行到去梳化坐低

兩人才剛坐低,K房嘅門又再次打開,點緊歌嘅三個女仔同時望向門口,見到霍思傑行入嚟,佢個背囊鼓鼓的,梁玥嘉嘅注意力完全落晒喺霍思傑個鼓鼓脹脹嘅袋度

「你個袋咗脹嘅?」梁玥嘉抵不住好奇心問道,「唔通你買咗聖誕禮物比我地?」

「嘩~果然係好兄弟喎~對我地咁好~」張子萊一下子熊抱着霍思傑,霍思傑一臉嫌棄咁推開張子萊

「我係買咗零食⋯」霍思傑打開背囊,將一包又一包嘅薯片拎出嚟放喺枱面,「睇下我幾細心啦!」

宋千辰同霍思傑二話不說拎起其中一包薯片「嚓」一聲開咗,食起薯片

平日喺學校成日都操卷,難得放兩個星期長假,今日又係平安夜,聽日係聖誕節,當然要挽得盡興,以放鬆心情同舒緩壓力;青春裏唔應該只有讀書,更應該有難能可貴嘅友誼同瘋狂嘅時候



「我地一齊影張相呀不如!」李穎容拍一拍身旁嘅楊楠恩同梁玥嘉講道,然後拎出手機開出某個「女生手機必有」嘅自拍apps

三個女仔靠埋一齊,李穎容拎住手機同兩人一齊自拍,三個男仔見到,即刻上前,企喺佢地身後逼

「點影到晒咁多人呀!」李穎容無奈地笑道,然後默默地將手機放咗喺梳化嘅櫈背上面靠着牆,較咗倒數三秒自動自拍




IG Link: https://www.instagram.com/nd_cotttocandy/?hl=zh-tw