「Okay~」李穎容拎番手機,將相用airdrop send番比佢地幾個,「宜家係11點58分~」

張子萊同李穎容仲有霍思傑拎起咪,楊楠恩手上拎住包薯片,張子萊同霍思傑插播咗一首陳奕迅嘅《Lonely Christmas》

「你地好lonely咩?我地成班人一齊過聖誕,有幾lonely呀?」李穎容望住已經陶醉地唱緊嘅兩人,一臉無言地講道,仲要反咗一個白眼

「你又點會明白單身嘅lonely呀~」張子萊講道,兩人又開始你一句我一句咁

梁玥嘉手上冇拎住咪,只係拎住手機,畢竟啱啱佢、楊楠恩仲有大家都已經唱咗一陣;梁玥嘉開咗IG,打算用Boomerang 影張影唔到樣嘅自拍



「我又影!」梁玥嘉一舉起手機,宋千辰即刻就坐到梁玥嘉身旁

楊楠恩坐喺梁玥嘉嘅另一邊,同梁玥嘉之間大概隔咗一個人嘅距離,楊楠恩見到梁玥嘉同宋千辰靠得好近,心中又不禁妒忌起嚟,輕輕咬牙,然後拎咗一塊薯片放到口中,繼續睇李穎容佢地三人唱歌

「我自己影相你坐過嚟做咩啫⋯」梁玥嘉一臉無奈地望住宋千辰

「你唔想同我一齊影相咪算囉。」宋千辰假裝有啲嬲,故意將聲線稍微冷下來講,然後仲要做個假動作假裝自己要坐開

「唔係~唔係唔係,一齊影囉!」梁玥嘉頓時伸手捉住宋千辰嘅衫袖,宋千辰嘅嘴角偷偷地以小幅度揚起,然後坐番好喺梁玥嘉隔離



梁玥嘉右手揸手機,左手比咗一個Yeah,喺㩒下圓型嘅拍攝制同時,左手嘅食指同中指拍埋咗一下;而宋千辰冇比Yeah手勢,只係喺影嘅時候,頭向梁玥嘉嘅方向側咗一側

梁玥嘉直接Po咗喺Story,冇tag任何人,只係喺呢個Po中加咗一個時間,剛好係0000

「你唔唱歌?」梁玥嘉問宋千辰,此時嘅宋千辰只係望住其他人、聽住佢地唱歌

「啱啱咪唱完囉,宜家要聽佢地唱歌。」宋千辰望向梁玥嘉笑了笑道,「你咪又係坐咗喺度,有資格話我唔唱歌咩?唔通你係胖虎?」

「痴線,你先係呀!」梁玥嘉比宋千辰逗笑了,「我唱歌不知幾好聽呀!」



「Hey!一齊唱一齊唱!」霍思傑同張子萊好high,兩個人又跳又叫,「一齊唱一齊唱!」

終於六個人一齊企起身一齊癲一齊唱歌,high到一個點,房入面嘅燈仲要較到最暗,就好似一個小型disco咁

嚟到凌晨3點,大家都癲咗幾個鐘,宜家係中場休息一樣,房內播着歌,大家坐喺梳化,手拎坐零食,枱上放着唱K包咗嘅嘢飲

「好悶呀⋯不如搵啲嘢挽呀!」李穎容頹廢咁坐喺梳化上面,頭靠着梁玥嘉嘅博頭

「挽咩呀?」張子萊第一個表示感興趣

「我地有6個人,不如挽⋯真心話大冒險呀!」李穎容坐好起嚟,點一點人數,然後興奮地講道

梁玥嘉望住李穎容,心中有陣陣不安感飄過,總覺得一講要挽呢個「危險遊戲」會發生好多事⋯揀真心話又死,揀大冒險都會死,但大家都同意咗挽,佢冇理由話唔挽

「為咗增加遊戲嘅娛樂性同刺激性,每人一定要揀至少兩次大冒險。」張子萊豎起兩隻手指,大家都點一點頭,「咁開始啦!搵個嘢轉。」



李穎容喺袋入面拎咗個筆袋出嚟,喺筆袋入面拎咗一個塗改帶出嚟放喺枱面

「邊個會帶埋筆袋出街咁好笑㗎⋯」張子萊一臉嫌棄咁望住李穎容

「你理得我呀!」李穎容將筆袋放番入佢自己個布袋入面,「順住轉,楠恩轉先。」

楊楠恩身子向前傾,伸手掂住塗改帶嘅頭,輕輕順時針一推,塗改帶轉起嚟,所有人都專注地望住轉動中嘅塗改帶

「第一個係邊個!第一個係邊個!」霍思傑望住塗改帶緊張地講道

塗改帶愈轉愈慢、愈轉愈慢,漸漸地停咗落嚟,塗改帶嘅嘴向住張子萊

「你先喎~打頭陣呀張子萊!」霍思傑笑道,然後問出挽呢個遊戲必問嘅一句,「真心話定大冒險?」



「真心話!」打頭陣嘅張子萊諗唔諗就直接回答道

「好man咁喎!咁你有冇中意嘅人呀?」霍思傑都唔比時間張子萊諗,直接就提問

張子萊聽到霍思傑嘅問題,瞬間由自信嘅表情變成無奈樣,大家紛紛笑起嚟

「你上一秒仲好自信㗎!」梁玥嘉真係比兩人逗笑了,掩着嘴笑道,「快啲答啦!真心話呀!」

張子萊諗緊要答啲咩,心中有啲後悔做咩要咁快答揀真心話,但其餘五人都邊笑邊期待地望住佢,耐心等候佢嘅答案




IG Link: https://www.instagram.com/nd_cotttocandy/?hl=zh-tw