［愛情純愛］由嗰一個Kiss開始，我地唔再係青梅竹馬: 61. 愛哭鬼？

「你收咗喺邊呀！」梁玥嘉輕聲地講道

微微鼓起兩泡腮、嘟起小嘴嘅可愛模樣對宋千辰嘅心造成重擊

梁玥嘉掀起宋千辰張被，伸手入去被入面摸咗兩摸、掃咗兩掃；梁玥嘉望向宋千辰，一下子將張櫈轉咗去另一邊，然後彎腰望向枱底

「我點會收喺枱底然後叫你搵？」宋千辰不禁失笑

「你收咗喺邊呀？」梁玥嘉扁着嘴，撒嬌一樣講道



「你估下～」宋千辰笑了笑講道，梁玥嘉轉身望向宋千辰嘅衣櫃，一下子打開頂頂衣櫃嘅門

梁玥嘉蹲喺衣櫃前，伸手入去掃咗兩掃，但手摸到嘅都係衫嘅質地，都冇異樣；宋千辰將櫈轉向梁玥嘉嘅方向，手放喺櫈嘅扶手上托住額

「你收咗喺邊呀？」梁玥嘉回頭望宋千辰，扁着嘴，一副可憐兮兮嘅模樣，「你收埋咗我嘅禮物喺邊呀？」

「你搵下咪知。」宋千辰毫不心軟地講道，佢就係要梁玥嘉自己搵，只有咁樣佢先可以見佢耐啲

「唔⋯」梁玥嘉一臉苦惱地坐喺床邊，抬頭環顧四周，「會喺邊呢⋯」



「你慢慢諗，我拆禮物先～」宋千辰從膠紙中拎出瞬禮物紙包好嘅禮物，然後開始拆掉包裝，「哦～你又會買呢個嘅？」

「上次見你好似好中意呢個咁，咁咪買咗呢個囉⋯」梁玥嘉見到宋千辰嘅反應，以為佢唔中意，便企起身想拎番，「唔中意就算，我收番！」

「邊個話唔中意？」宋千辰見梁玥嘉嘅手朝Figure伸去，反應好快地拎走咗盒Figure，「我只係估唔到你會買呢個啫～我冇話唔中意。你快啲搵啦，搵唔到就冇㗎啦～」

「你收咗喺邊啫⋯」梁玥嘉扁着嘴，撒嬌般講道，「有冇提示呀？」

「好易搵㗎咋，只係你搵唔到咋嘛。」宋千辰將撕掉嘅包裝放到膠袋入面，然後將盒Figure先放埋一邊，「再搵下就有。」



「喺邊呢⋯」梁玥嘉觀察着周圍，忽然望到緊閉着嘅窗簾

床緊貼嘅窗台，窗台係可以坐到一個人嘅闊度，窗簾嘅長度剛好到窗台

梁玥嘉爬到床上，跪着行到去窗台前，一下子掀開窗簾，見到一大袋嘢放咗喺窗簾後面

「搵到啦！」梁玥嘉興奮地拎起嗰袋嘢，「你擺喺呢度都有㗎！」

「你宜家搵唔到咩？」宋千辰起身坐到床上面，「唔拆開睇下？」

宋千辰剛說完，梁玥嘉就已經急不及待地拆禮物

「嘩！」梁玥嘉一拎個柴犬攬枕出嚟時嘅第一個反應，明顯地超開心，笑容都止不住了，「我好中意呀～」

「You see～都係我了解你。」宋千辰嘅語氣中都係滿滿的自豪



「知啦知啦！多謝你啦～」梁玥嘉緊緊地攬住攬枕唔放手，臉上盡是高興嘅笑容，「你最了解我啦得未呀？」

宋千辰見到梁玥嘉笑得開心，佢都覺得好開心，見到中意嘅人高興，自己都會一齊高興⋯雖然只係啲微不足道嘅事，但梁玥嘉都已經覺得好開心

「你唔係要番去煲劇咩？」宋千辰問道，「你仲唔番去？」

「做咩趕我走啫？」梁玥嘉誤以為宋千辰想佢快啲走，忽然鬧起情緒，一臉不悅地企起手，「咁我番去囉！」

「喂⋯！」宋千辰坐起身，喺床上盤着腿坐，身子向左邊微微一傾一伸出左手，一下子將梁玥嘉拉回

梁玥嘉比宋千辰用力一下子拉回，跌坐喺床邊；宋千辰嘅左手喺梁玥嘉坐到床邊嘅一刻鬆開

「你做咩咁嘅表情？」宋千辰望住梁玥嘉扁着嘴，一副唔高興嘅模樣問道，「人地唔知仲以為我唔要你。」



「係你叫我走⋯」梁玥嘉向宋千辰嘅方向望，見到宋千辰嘅臉上掛着淡淡嘅笑容同時直勾勾地望住自己，梁玥嘉頓時再次撇開了臉，「拉住我做咩⋯」

宋千辰望住梁玥嘉一副好似「生氣中嘅女朋友」一樣模樣，連語氣都格外委屈，沒好氣地笑了笑，然後伸手放喺梁玥嘉頭頂上摸咗兩摸

「你好似嗰啲嬲咗男朋友嘅女朋友一樣⋯！」宋千辰臉帶笑容講道，「我唔會唔要你，放心啦，所有人離開你都好，我都唔會。」

「咁如果有一日你拍拖呢⋯」梁玥嘉喺心中愈諗愈唔開心、愈諗愈悶悶不樂，心中好似比大石壓住一樣，「你拍拖嘅對象唔係我嘅話，咁你都係要離開我⋯！」

梁玥嘉嘅視線落喺宋千辰身上同時，忽然鼻子一酸、眼眶一紅，一臉委屈地喊起嚟，佢都唔知點解自己會喊，就係一刻間覺得宋千辰終有一日會離開自己而覺得難受

宋千辰呆咗咁望住梁玥嘉，梁玥嘉嘅眼淚嚟得太突然，搞到佢都唔知要比啲咩反應先好，既疑惑又慌張⋯

梁玥嘉撇開臉唔望宋千辰，用衫袖抹眼淚，心中覺得好不安，宋千辰唔係一個普通朋友咁簡單

「唉⋯」宋千辰伸手放喺梁玥嘉嘅頭頂，溫柔地摸了摸安慰着，「如果係我講咗啲咩令你唔開心，我同你講對唔住，雖然我都唔知我講咗咩令你唔開心⋯」



梁玥嘉望住宋千辰，輕輕手將宋千辰放喺佢頭上嘅手拉咗落嚟，一時衝動地攬住宋千辰，雙手攬住宋千辰嘅頸




IG Link: https://www.instagram.com/nd_cotttocandy/?hl=zh-tw