［愛情純愛］由嗰一個Kiss開始，我地唔再係青梅竹馬: 60. 好想知

張子萊係故意趁宋千辰去咗廁所先問呢條問題，所有人嘅臉上都寫住「好想知」一樣咁望住梁玥嘉

「呃⋯」梁玥嘉有啲猶疑，佢忽然語塞，唔知可以點答一樣

「你快啲答啦，你再唔答宋千辰要出嚟啦！」張子萊望一望廁所嘅門然後催促道

李穎容一臉津津有味地望住梁玥嘉，佢早知梁玥嘉中意宋千辰，但宜家李穎容更加想知道梁玥嘉會點答呢個問題

「咔！」廁所嘅門打開，宋千辰喺廁所行出嚟，所有人都望向宋千辰，然後又望向梁玥嘉



「轉到邊個呀？問咗啲咩呀？」宋千辰坐番喺梁玥嘉隔離

「轉到梁玥嘉。」李穎容笑道，雙眼直勾勾地望住梁玥嘉，「問多次啦張子萊！」

「你對你嘅青梅竹馬有冇朋友以外嘅感情或者想法？」張子萊頓時問多一次，宋千辰望向梁玥嘉，但梁玥嘉望咗佢一眼之後就瞬間移開視線

「冇⋯」梁玥嘉當然唔係講緊真心話，佢默默地搖頭，然後擺出一副天真嘅模樣，「可以有咩其他感情？」

梁玥嘉答完之後就輕推咗塗改帶一下，大家都再次沉醉喺遊戲之中，只有宋千辰一樣，雙眸中嘅光忽然黯然失色



聽到梁玥嘉嘅答覆，宋千辰嘅內心完全開心唔起，無法再走回遊戲世界之中

「呢個係佢嘅真心話⋯？」宋千辰表面冇事，但卻不禁喺心中諗道，「定係佢只係唔想喺大家面前講真話⋯？如果呢個已經係佢嘅真心話，咁咪即係佢冇當我係一個異性⋯？但連Kiss完之後佢都⋯」

宋千辰望一望梁玥嘉，見到梁玥嘉仍然挽得好開心，宋千辰不禁輕輕一笑⋯梁玥嘉嘅回覆刻咗喺宋千辰嘅腦海之中，宋千辰喺之後嘅時間中亦冇開懷大笑過

⋯

時間去到5點半，佢地都執好嘢離開K房，踏上回家嘅路



「拜拜～」「拜拜啦！」

「楠恩，我地聽日再見啦～」梁玥嘉停喺路口對楊楠恩講道

「嗯！我地聽日見啦！」楊楠恩點點頭，微微笑道，然後同其他人一齊繼向前行

餘下嘅路剩低梁玥嘉同宋千辰兩人，宋千辰一直都冇出聲，臉上亦冇表情，雙手插喺hoodies嘅口袋中

「攰咗成晚仲好精神～番到去要沖個熱水涼然後灘床煲劇先得！」梁玥嘉伸咗一個懶腰，笑笑口地講道，明顯地，梁玥嘉仍未察覺到宋千辰嘅異常，腦海中仲諗緊陣間要點樣叫住宋千辰然後入屋拎禮物比佢

「嗯⋯」宋千辰只係冷淡地嗯咗一聲，佢都冇心情答梁玥嘉啲咩

「你好攰呀？」梁玥嘉望住宋千辰，剛才嘅尷尬已經消失得無影無蹤，「番去早啲瞓啦～聽日我地仲要去溜冰～」

宋千辰只係點一點頭，咩都冇再講；梁玥嘉心裏感到有啲疑惑，佢宜家先感覺到宋千辰怪怪的，但梁玥嘉都冇問啲咩，兩人就係咁樣唔講嘢直到踏出升降機



「你唔好入去住，我有嘢比你！」梁玥嘉拉一拉宋千辰嘅衫袖，宋千辰回頭望佢嘅時候講道

梁玥嘉見宋千辰點頭示意冇問題，便即刻用鎖匙開門入屋，匆忙地喺枱底拎出寫住Log-on嘅膠袋行番出去門口

「嗱，送比你㗎～」梁玥嘉露出可愛嘅笑容，雙手拎住膠袋嘅手提帶遞比宋千辰，微微側着頭道，「Merry Christmas～」

宋千辰嘅嘴角頓時不禁上揚，但好快就收起咗淡淡嘅笑容，一臉嚴肅仲要撇開了臉

「唔係對我冇多餘嘅感覺咩⋯做咩送禮物比我呀⋯」宋千辰口不對心咁講道，明明心裏好高興，但偏要咁樣講

「咁⋯啱啱大家都喺度嘛～」梁玥嘉衝口而出地講道

「你咁講即係你對我係有朋友以外嘅感覺？」宋千辰腦袋好使轉得快，瞬間捉住咗重點問道



「唔、唔係呢個意思！」梁玥嘉頓時否認，然後隨即拉開話題，「你、你要唔要㗎！唔要就算啦！」

「我要！嘉嘉送比我嘅，我點會唔要？」宋千辰心中嘅霧霾頓時散去，露出爽朗嘅笑容接過膠袋，「我都買咗嘢比你。」

「真係！？」梁玥嘉頓時好似小朋友一樣一臉興奮雀躍，「喺邊呀？」

「搵到就係屬於你，搵唔到就冇啦～」宋千辰開咗家門，拉住梁玥嘉入屋，「噓⋯唔好嘈醒我爸媽。」

兩人喺門口除咗鞋，宋千辰輕輕地閂上門，拉住梁玥嘉嘅手腕入房，然後閂上房門

其實宋千辰喺琴晚出門口之前忽然靈機一動，將份禮物拎咗出嚟，拎走咗個膠袋，收起咗份禮物，想等梁玥嘉自己搵份禮物嘅位置

宋千辰將梁玥嘉送比佢嘅禮物送喺書枱上面，然後坐喺電腦椅上等梁玥嘉自己好似盲頭烏蠅咁搵






IG Link: https://www.instagram.com/nd_cotttocandy/?hl=zh-tw